Likawi ang Siod sang Pagsugal

“Wala maapektuhan sang pagsugal ang akon lawas, kag pirme ko ginakontrol kon pila ang ubuson ko sa sugal. Apang ginabaton ko nga kada maghampang ako sing loterya, pirme ko ginapili ang ginakabig ko nga amo ang akon swerte nga mga numero.”​—Linda.

MADAMO nga sugarol ang nagapati sa swerte nga mga numero ukon swerte nga mga anting-anting. Mahimo ginahunahuna nila nga indi sila serioso sa ila mga disparatis, apang ginahimo nila ini gihapon.

Ang iban nga mga sugarol nagapangamuyo pa gani sa Dios agod buligan sila nga magdaug sa ila napilian nga sugal. Apang, ang Biblia nagaunod sing pagpakamalaut sang Dios sa mga nagapangangkon nga nagasimba sa iya apang “nagaaman sing lamesa para sa dios sang Swerte.” (Isaias 65:11) Huo, ginakangil-aran sang Dios ang mga buhat nga nagasakdag sang disparatis nga pagpati sa swerte. Ang sugal kinaandan na nga nagapalig-on sing  bulag nga pagsalig sa ginatawag nga Lady Luck ukon swerte.

Dayag nga ginadabukan man sang sugal ang gugma sa kuwarta. Sa karon nga katilingban nga nagadugang ang pagkawalay interes sa espirituwal nga mga butang, ang kuwarta ginapakadios, kag ang sugal isa ka popular nga paagi sa pagsimba sa sini. Ang bag-o nga mga katedral amo ang matahom nga mga casino, kag ang bag-o nga kredo amo nga maayo ang pagkasakon. Natukiban sang mga manugpanalawsaw nga ang katuyuan sang kalabanan nga nagakadto sa casino, indi ang malingaw ukon ang palibot, kundi ang magdaug sing “daku gid nga kantidad sang kuwarta.” Apang, ang Biblia nagapaandam: “Ang gugma sa kuwarta amo ang gamot sang tanan makahalalit nga mga butang, kag paagi sa paghingamo sini nga gugma  ang iban nagtalang gikan sa pagtuo kag nagsuntok sang ila mga kaugalingon sing madamong kasakitan.”​​—⁠1 Timoteo 6:⁠10.

Sa 1 Corinto 6:​9, 10, ang Biblia maathag nga nagasiling: “Indi kamo magtalang. Wala sing . . . mga sumilimba sa idolo . . . ni mga tawo nga sakon . . . ang makapanubli sang ginharian sang Dios.” Ang pagkasakon indi lamang isa ka makapaluya nga balatian sa katilingban; isa ini ka makamamatay nga balatian sa espirituwal​​—⁠apang isa ka balatian nga may bulong.

Nakatigayon Sila sing Kusog sa Pagbag-o

“Makapila ko na gintinguhaan nga untatan ang pagsugal,” hinumdom ni Kazushige, nga ginsambit sa una nga artikulo. “Narealisar ko nga ginaguba sang akon pagsugal upod sa akon mga abyan sa karera sang kabayo ang akon pamilya. Pirme lang nagakapierde ang kuwarta nga madaug ko. Napierde ko pa gani sa sugal ang kuwarta nga gintigana sang akon asawa para sa pagkabun-ag sang amon ikaduha nga anak nga lalaki, kag sang ulihi ginagamit ko na sa sugal ang kuwarta sang kompanya nga akon ginaobrahan. Subong resulta, nadula ang akon pagtahod sa kaugalingon. Pirme nagahibi ang akon asawa nga nagapakitluoy sa akon nga untatan ko na ang pagsugal, apang indi ko gid masarangan.”

Nian nagsugod si Kazushige sa pagtuon sang Biblia upod sa mga Saksi ni Jehova. Sia nagsiling: “Sa dugang nga pagbasa ko sang Biblia, nagdugang pa ang akon kompiansa nga may Dios kag nga makabenepisyo ako sa pagpamati sa iya. Nagdesisyon ako nga paagi sa kusog nga ginahatag sang Dios, untatan ko ang pagsugal. Sa akon katingala, indi lamang nga nauntat ko ang pagsugal kundi gindumtan ko man ini. Karon kon madumduman ko ang kabudlayan nga gintuga sang akon pagsugal sa akon pamilya, nagasakit ang akon buot. Nagapasalamat gid ako kay Jehova nga Dios nga ginbuligan niya ako nga mabugto ko ang akon pagkagiyan sa sugal kag nga ginbuligan niya ako nga mangin mapuslanon ang akon pagkabuhi!”​​—⁠Hebreo 4:⁠12.

Si John, nga ginsambit man sa una nga artikulo, nagsugod man sa pagtuon sang Biblia. Naghinumdom sia: “Nabuligan ako sang akon pagtuon sa Biblia nga timbangtimbangon liwat ang akon kahimtangan. Sa una gid nga tion, nabuksan ang akon mga mata sa halit nga ginatuga sang akon pagsugal sa akon pamilya kag sa akon. Nahangpan ko na nga ang pagsugal nagapalambo sang isa ka makagod kag sakon nga panimuot sa katawhan​​—⁠mga kinaiya nga ginadumtan ni Jehova. Samtang ginapadayon ko ang akon pagtuon, ang akon gugma kay Jehova naghatag sa akon sing kusog nga manginpadlos sa sugal. Nagsugod ako sa pagsugal bangod damgo ko nga makasapo sing mas maayo nga kabuhi. Karon nga gin-untatan ko na ang pagsugal kag malipayon nga nagaalagad kay Jehova, natuman na ini nga damgo.”

Nagdesisyon man si Linda, nga asawa ni John, nga likawan ang pagsugal. “Indi ini nangin mahapos,” siling niya. “Apang sang magsugod kami sang akon bana sa pagtuon sang Biblia upod sa mga Saksi ni Jehova, natun-an ko nga hatagan sing igtalupangod ang mas importante nga mga butang sa kabuhi. Natun-an ko nga indi lamang higugmaon ang mga butang nga ginahigugma sang Dios kundi dumtan man ang mga butang nga ginadumtan niya, lakip ang tanan nga porma sang pagkasakon. Wala labot nga may katuyuan na ang akon kabuhi, mas madamo pa ang akon kuwarta.”​​—⁠Salmo 97:10.

Paagi sa pagpalambo sing relasyon kay Jehova nga Dios, ikaw man makatigayon sing kusog kag kaalam nga kinahanglanon agod likawan ang siod sang sugal. Pauswagon sini ang imo pinansial, emosyonal, kag espirituwal nga kahimtangan. Nian makatigayon ka sing kalipay nga maeksperiensiahan ang kamatuoran sang mga pulong nga narekord sa Hulubaton 10:22: “Ang pagpakamaayo ni Jehova​​—⁠amo ina ang nagapamanggad, kag wala sia nagadugang sing kasakit sa sini.”

[Blurb sa pahina 11]

Ang pagkasakon indi lamang isa ka makapaluya nga balatian sa katilingban; isa ini ka makamamatay nga balatian sa espirituwal

[Kahon/Mga retrato sa pahina 9]

Ang Pagsugal kag ang Labaw sa Kinaugali nga Gahom

Sa isa ka report sa National Gambling Impact Study Commission, ginpatuhuyan sang mga manugpanalawsaw sa Duke University ang kaangtanan sa ulot sang kon paano ginapasayod ang sugal kag sang pagpati sa labaw sa kinaugali nga gahom. Ang report nagsiling: “Madamo nga pasayod [sa loterya] ang dayag gid nga materyalistiko . . . Apang indi pagkamateryalistiko nga ginabangdan sang lakas nga pagpangabudlay kag pagbatas kundi sa baylo sang mga genie kag madyik nga mga lampara, nga napasad sa mga paglaum, mga damgo kag disparatis. Kag nahibaluan sang tagsa ka manedyer sang loterya nga ginapasad sang madamo sang iya maayo gid nga mga kustomer ang ila patad sa personal nga mga disparatis, astrolohiko nga mga tsart, mga manugpakot nga may kaugalingon nga estilo, kag ginakilala nga ‘mga libro sang damgo’ nga nagalista sang mga numero nga nagahisanto sa mga ngalan, mga petsa, kag mga damgo. Sa baylo nga isiling nga ang tanan nga numero may pareho nga tsansa nga mapilian kag nga sa pagpatad sa popular nga mga numero mabuhinan ang ginapaabot nga parte sang isa ka tawo sa hampang nga parimutuel, ginapalig-on sang mga ahensia sang loterya ang mga nagapatad nga magpili (kag magpabilin) sa mga numero nga may kahulugan sa ila.”

[Mga retrato sa pahina 10]

“Ang akon gugma kay Jehova naghatag sa akon sing kusog nga manginpadlos sa sugal.”​—⁠John

“Wala labot nga may katuyuan na ang akon kabuhi, mas madamo pa ang akon kuwarta.”​​—⁠Linda

[Mga retrato sa pahina 10]

“Sa akon katingala, indi lamang nga nauntat ko ang pagsugal kundi gindumtan ko man ini.”​—⁠Kazushige