Ang Pagtamod sang Biblia

Fêng Shui​—⁠Para Bala Ini sa mga Cristiano?

SA Asia, ginapili ang mga lulubngan nahisanto sa sini. Ginadesinyo kag ginadekorasyonan ang mga tinukod nahisuno sa sini. Ginabakal kag ginabaligya ang mga propriedad pasad sa sini. Ginatawag ini sa Tsino subong fêng shui, isa ka porma sang pagpamakot. Bisan pa nangin bantog sa Asia ang fêng shui sa sulod sang mga siglo, sining ulihi lang nga tinuig naglapnag ini sa Nakatundan nga kadutaan. Ginagamit ini sang iban nga arkitekto sa pagdesinyo sang mataas kaayo nga mga tinukod, mga opisina, kag mga puluy-an. Ginagamit ini sang iban nga ginang sa pagpuni sang ila mga puluy-an. Madamo nga libro kag Internet Web site ang nagasakdag kag nagatudlo sini.

Ano ang rason ngaa nagbantog ini? Suno sa isa ka tagsakdag, ang fêng shui makahatag sing “mas maayo nga pangabuhi, kapagros, mas maayo nga mga pag-asawahay ukon pag-updanay, mas madamo nga manggad, kag kalinong sa hunahuna.” Bisan pa makagalanyat gid ini pamatian, ano gid bala ini, kag paano ini dapat tamdon sang mga Cristiano?

Ano Bala Ini?

Ang Tsino nga mga tinaga nga fêng shui literal nga nagakahulugan sing “hangin-tubig.” Ang fêng shui nagsugod pa sang nagligad nga linibo ka tuig sang tion nga madamo na nga pilosopiya sang Sidlangan ang nagaluntad. Lakip sa sini amo ang pagpati sa ginatawag kuno nga pagkabalanse sang yin kag yang (kadulom kag kapawa, init kag bugnaw, negatibo kag positibo). Ang ideya sa yin kag yang gintingob sa ideya sang ch’i, nga literal nga nagakahulugan sing “hangin” ukon “ginhawa.” Ang yin, yang kag ch’i, pati na ang ginatawag nga lima ka elemento nga kahoy, duta, tubig, kalayo kag metal, nagahuman sing importante nga mga bahin sang fêng shui nga teoriya. Ang mga sumalakdag sang fêng shui nagapati nga ang mabaskog nga mga enerhiya nagadalagan sa tanan nga bahin sang duta. Ang tulumuron amo ang paghibalo sang mga lokasyon diin ang mga enerhiya, ukon ch’i, sang duta kag sang langit ginabalanse. Ginahimo ini paagi sa pagbag-o mismo sa porma sang duta ukon paagi sa paghimo sing mga pagbag-o sa sulod sang isa ka tinukod sa isa ka partikular nga duog. Ang pagpahanabo sini nga pagkabalanse makahatag kuno sing swerte sa mga nagaobra ukon sa mga nagaistar didto.

Sa masami, ang mga sampaton sa fêng shui nagakonsulta anay sa isa ka geomantic compass.⁠ * Isa ini ka magamay magnetiko nga compass nga naplastar sa tunga gid sang tsart sa astrolohiya. Ang compass nagaunod sang mga concentric circle, nga ginabahinbahin sang mga linya. Ang geomantic compass nagaunod sang mga impormasyon tuhoy sa mga butang subong sang mga konstelasyon, mga panahon, kag mga panag-on sa mga siklo sang adlaw. Kon ginaanalisar ang isa ka duog ukon tinukod, ginakuha ang madamo nga impormasyon halin sa compass. Ginatan-aw sang sampaton sa fêng shui kon diin nga bahin sang naguwa nga mga linya kag mga tipulon nagatabo ang kamot sang compass, kag gikan sa sini ginahibalo niya kon ano ang kinahanglan agod “kay-uhon” ang isa ka duog.

Ang malapit nga topograpiya, mga kanal sa tubig, mga imburnal, kag bisan gani ang pagplastar sang mga bintana kag mga puwertahan sa isa ka tinukod mahimo binagbinagon sa pagpamat-od kon paano balansehon ang isa ka duog. Halimbawa, ang isa ka tag-iya sang tiendahan sa Canada nagpakabit sing salaming sa nalikod nga puwertahan sang iya tiangge agod “tadlungon” ang pagplastar sang mga puwertahan sini. Ang isa ka nagahimo sing geomancy (manugpakot) mahimo man magrekomendar nga sayluhon ang mga tanom ukon mga kagamitan, islan ang isa ka retrato, magdugang  sang mga wind chime, ukon magbutang sing aquarium agod mangin balanse ang isa ka tinukod ukon isa ka hulot.

Ang Cristianong Pagtamod

Sing talalupangdon, ang mga libro sa fêng shui ginaklase sang kalabanan nga mga librarya upod sa mga sinulatan tuhoy sa astrolohiya kag sa pagpamakot. Sa katunayan, ginalaragway sang Webster’s Ninth New Collegiate Dictionary ang geomancy subong “pagpamakot paagi sa mga numero ukon sa mga linya ukon sa geograpiya.” (Italiko amon.) Gani, lapnag na nga ginabaton nga ang fêng shui kag iban pa nga mga sahi sang geomancy mga porma sang pagpakot sang kapalaran. Nagadalahig ini sang pagpamakot kag espiritistiko nga mga buhat, nga indi na bag-o sa katawhan.

Sang ang mga Israelinhon nagbiya sa Egipto kag sang ulihi nagsulod sa duta sang Canaan sang ika-15 nga siglo B.⁠C.⁠E., ang tanan nga sahi sang pagpamakot lapnag sa sining kadutaan. Paagi kay Moises, ang Dios nagsiling, subong narekord sa Deuteronomio 18:14: “Ining mga pungsod nga ginatabog mo nagpamati sa mga salamangkero kag sa mga nagapamakot; apang nahanungod sa imo, wala ka ginhatagan ni Jehova nga imo Dios sing bisan ano nga kaangay sini.” Ang madamo nga porma sang pagpamakot sa Egipto kag Canaan naghalin sa dumaan nga Babilonia. Sang gingumon ni Jehova ang lenguahe sang katawhan sa Babilonia, naglapta sila sa iban nga mga duog, dala ang mga buhat may kaangtanan sa Babilonianhon nga pagpamakot kag espiritismo.​​—⁠Genesis 11:​1-9.

Si Jehova nga Dios matigdas kag sulit-sulit nga nagpaandam sa Israel nga indi paghimuon ang mga buhat sang pagpamakot sang iban nga mga pungsod, nga nagasiling: “Indi dapat masapwan sa imo ang bisan sin-o . . . nga nagagamit sing pagpamakot, ang nagahimo sing madyik ukon ang bisan sin-o nga nagapangita sing tanda . . . Kay ang tanan nga nagahimo sining mga butang kalangil-aran kay Jehova, kag bangod sining makangilil-ad nga mga butang ginatabog sila ni Jehova nga inyo Dios gikan sa atubangan mo.” (Deuteronomio 18:​9-​12; Levitico 19:​26, 31) Ang mga nagabuhat sing pagpamakot dapat gid nga patyon.​​—⁠Exodo 22:18; Levitico 20:27.

Ngaa ginapakamalaut gid ang pagpamakot? Ang Binuhatan 16:16-​19 nagasugid tuhoy sa isa ka babayi nga may “isa ka demonyo sang pagpamakot.” Huo, ang pagpamakot may kaangtanan gid sa demonismo. Sa amo, ang pagbuhat sing bisan ano nga porma sang pagpamakot isa ka pagpakig-angot kay Satanas kag sa iya mga demonyo! Magaresulta ini sa espirituwal nga kalaglagan.​​—⁠2 Corinto 4:4.

Ang pila ka popular nga estilo sang pagdekorar kag pag-landscape, sa Sidlangan ukon sa Nakatundan, mahimo nga naimpluwensiahan sang butig relihioso nga mga buhat subong sang fêng shui. Apang sa masami, nadula na sing bug-os sini nga mga estilo ang relihioso nga importansia sini. Walay sapayan sini, isa ka maathag nga paglapas sa kasuguan sang Dios ang paggamit sing fêng shui sa pagpakot sa palaabuton ukon sa pagdala sing swerte ukon maayong panglawas. Ang paghimo sini isa ka paglapas sa maathag nga sugo sang Biblia nga likawan ang pagtandog sing bisan ano nga butang nga “di-matinlo.”​​—⁠2 Corinto 6:​14-​18.

[Nota]

^ par. 7 Sa Nakatundan nga kadutaan ang mga nagahimo sang fêng shui nagtinguha sa paglaragway sini sing mas sientipiko, ang iban naggamit pa gani sang mga kompyuter agod buligan sila sa pag-analisar sang geograpiko nga mga duog.

[Retrato sa pahina 27]

Ang geomantic compass

[Credit Line]

Pahina 2 kag 27: Hong Kong Tourism Board