Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Tudlui ang Inyo Kabataan

 LEKSION 3

Si Rahab Nagpati kay Jehova

Si Rahab Nagpati kay Jehova

Kuno abi, ara kita sa siudad sang Jerico, sa duta sang Canaan. Ang mga tawo diri wala nagasimba kay Jehova. Diri man nagaistar ang isa ka babayi nga si Rahab.

Sang bata pa si Rahab, nabatian na niya ang mga istorya kon paano gintunga ni Moises ang Pula nga Dagat kag ginpangunahan ang mga Israelinhon pagua sa Egipto. Nabatian man niya nga ginbuligan ni Jehova ang mga Israelinhon nga mapierde ang ila mga kaaway. Kag subong, may balita nga ang mga Israelinhon nagakampo na malapit sa Jerico!

Gintago ni Rahab ang mga espiya bangod nagapati sia kay Jehova

Isa ka gab-i, duha ka Israelinhon ang nagkadto sa Jerico para sekreto nga magpanilag sa siudad. Ginatawag sila nga mga espiya. Nagkadto sila sa balay ni Rahab, kag ginpadayon niya sila. Sina man nga gab-i, nabal-an sang hari sang Jerico nga may mga espiya sa siudad nga ara sa balay ni Rahab. Gani, nagpadala ang hari sing mga lalaki para dakpon sila. Gintago ni Rahab sa atop ang mga espiya kag ginsilingan ang mga lalaki nga ginsugo sang hari: ‘May mga espiya gid man nga nagkadto diri, pero nakalakat na. Kon lagson ninyo sila, basi maabtan pa ninyo sila!’ Bal-an mo bala kon ngaa gintago ni Rahab ang mga espiya?— Bangod nagapati sia kay Jehova kag kabalo sia nga ihatag ni Jehova sa mga Israelinhon ang Canaan.

Pero antes maglakat ang mga espiya, nagpromisa sila nga maluwas si Rahab kag ang iya pamilya kon laglagon ang Jerico. Bal-an mo bala kon ano ang ila ginpahimo sa iya?— Nagsiling sila: ‘Ihigot mo ining pula nga lubid sa imo bintana. Kon himuon mo ini, ang tanan nga ara sa imo balay maluwas.’ Gintuman ni Rahab ang ginsugo sang mga espiya. Bal-an mo bala kon ano dayon ang natabo?—

Ginluwas ni Jehova si Rahab kag ang iya pamilya

Pagligad sang pila ka adlaw, ang mga Israelinhon nagmartsa sa palibot sang siudad. Nagmartsa sila sing isa ka bes kada adlaw, sa sulod sang anom ka adlaw. Pero sang ikapito nga adlaw, nagmartsa sila palibot sa siudad sing pito ka beses. Dayon nagsinggit sila tanan sing mabaskog. Kag ginrumpag ni Jehova ang mga pader sang siudad. Pero ang balay nga may pula  nga lubid sa bintana wala maguba! Nakita mo bala ini sa piktyur?— Huo, naluwas si Rahab kag ang iya pamilya!

Ano ang matun-an mo kay Rahab?— Nagpati si Rahab kay Jehova bangod sa maayong mga butang nga nabatian niya parte sa iya. Madamo ka man sing maayong butang nga ginatun-an parte kay Jehova. Nagapati ka man bala sa iya pareho ni Rahab?— Sigurado gid nga nagapati ka.