Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Tudlui ang Inyo Kabataan

 LEKSION 6

Si David Wala Nahadlok

Si David Wala Nahadlok

Ano ang ginahimo mo kon nahadlok ka?— Siguro nagakadto ka kay Nanay ukon kay Tatay mo. Pero may isa pa gid nga makabulig sa imo. Sia ang pinakagamhanan sa tanan. Kilala mo bala kon sin-o sia?— Siempre, wala na sing iban kundi si Jehova nga Dios. Istoryahan naton subong ang parte sa isa ka pamatan-on sa Biblia nga si David. Wala sia nahadlok kay kabalo sia nga buligan gid sia pirme ni Jehova.

Halin sang bata pa gid si David, gintudluan na sia nanday Nanay kag Tatay niya nga palanggaon si Jehova. Nakabulig ini sa iya nga mangin maisog bisan pa may makahaladlok nga mga sitwasyon. Kabalo sia nga Abyan niya si Jehova kag buligan gid Niya sia. Isa ka bes, sang nagabantay si David sang mga karnero, may daku nga leon nga nagtaban sang isa ka karnero! Kabalo ka bala kon ano ang ginhimo ni David? Ginlagas niya ang leon kag ginpatay ini paagi lamang sa iya mga kamot! Kag sang may oso nga naglagas sa mga karnero, ginpatay man ini ni David! Sin-o sa banta mo ang nagbulig kay David?— Siempre, si Jehova.

May isa pa ka bes nga nangin maisog gid si David. Ang mga Israelinhon nagapakig-away sa mga Filistinhon. Ang isa ka soldado sang mga Filistinhon mataas gid, isa ka higante! Ang iya ngalan amo si Goliat. Ginayaguta sining higante ang Israelinhon nga mga soldado kag si Jehova. Ginhangkat ni Goliat ang mga Israelinhon nga makig-away sa iya. Pero, ang tanan nga Israelinhon nahadlok gid. Sang mabatian ini ni David, ginsilingan niya si Goliat: ‘Batuan ko ikaw! Buligan ako ni Jehova, kag mapierde ka gid!’ Sa banta mo, maisog bala si David?— Huo, maisog gid sia. Gusto mo bala mabal-an kon ano dayon ang natabo?

Ginkuha ni David ang iya labyog kag namulot sing lima ka mahining nga bato, kag ginkadtuan niya ang higante. Sang nakita ni Goliat nga bata pa si David, ginyaguta niya ini. Pero si David nagsiling: ‘Magapakig-away ka sa akon nga may espada, pero magapakig-away ako sa imo sa ngalan ni Jehova!’ Dayon, ginbutangan niya sing bato ang iya labyog, nagdalagan pakadto kay Goliat, kag ginlabyog ini. Sa agtang gid sang  higante nagdulot ang bato! Natumba sia kag napatay! Gani, nagpalagyo ang mga Filistinhon kay hinadlukan sila. Paano napierde sang bata nga si David ang isa ka higante?— Ginbuligan sia ni Jehova, kag mas gamhanan gid si Jehova sangsa higante!

Wala nahadlok si David kay kabalo sia nga buligan sia ni Jehova

Ano ang matun-an mo sa istorya ni David?— Natun-an naton nga si Jehova mas gamhanan sangsa kay bisan sin-o. Kag Abyan mo si Jehova. Gani kon nahadlok ka, dumduma nga buligan ka ni Jehova nga mangin maisog.

BASAHA SA IMO BIBLIA