Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Tudlui ang Inyo Kabataan

 LEKSION 1

Ang Sekreto nga Gusto Naton Mabal-an

Ang Sekreto nga Gusto Naton Mabal-an

May nagsugid na bala sa imo sang sekreto?— * Ang Biblia may ginasugid nga isa ka espesyal nga sekreto nga ginatawag “sagrado nga likom.” Sagrado ini kay halin ini sa Dios. Kag ginatawag ini nga likom ukon sekreto kay wala ini mabal-an sang mga tawo. Pero, gusto ini mabal-an bisan sang mga anghel. Gusto mo man bala mabal-an ini nga sekreto?—

Ano sa banta mo ang gusto mabal-an sang mga anghel?

Sang una pa nga panahon, ginhimo sang Dios ang una nga lalaki kag babayi. Ang ila ngalan amo sanday Adan kag Eva. Ginhatagan sila sang Dios sing manami nga ilistaran nga ginatawag hardin sang Eden. Kon nagtuman sanday Adan kag Eva sa Dios, tani nahimo nila kag sang ila mga anak ang duta nga paraiso pareho sang hardin nga ila gin-istaran. Kag magaistar sila sa Paraiso asta san-o. Pero dumduman mo bala kon ano ang ginhimo nanday Adan kag Eva?—

Wala nagtuman sanday Adan kag Eva sa Dios, gani wala na kita nagaistar sa paraiso subong. Pero, nagsiling ang Dios nga panamion niya liwat ang bilog nga duta, kag ang tanan mabuhi sing wala katapusan kag mangin malipayon. Paano niya ini himuon? Halin sang una wala ini mabal-an sang mga tawo kay sekreto ini.

Pero sang nagkadto si Jesus sa duta, ginsugid niya sa mga tawo ini nga sekreto. Nagsiling sia nga parte ini sa Ginharian sang Dios. Gintudluan niya ang mga tawo nga ipangamuyo ang pag-abot sini nga Ginharian. Himuon sini nga Ginharian nga paraiso ang duta.

Nalipay ka bala kay nabal-an mo ini nga sekreto?— Dumduma nga ang mga nagatuman lamang kay Jehova nga Dios ang makaistar sa Paraiso. Ginasugid sa aton sang Biblia ang istorya sang mga lalaki kag babayi nga nagtuman kay Jehova. Gusto mo bala mabal-an ang istorya parte sa ila?— Sige, kilalahon naton ang pila sa ila kag tun-an kon paano sila mailog.

^ par. 3 Sa sini nga mga istorya, makakita ka sing marka pareho sini (—) pagkatapos sang pila ka pamangkot. Mas maayo kon magdulog ka kag pasabton anay ang imo bata.