Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Tudlui ang Inyo Kabataan

 LEKSION 12

Maisog ang Hinablos ni Pablo

Maisog ang Hinablos ni Pablo

Istoryahan naton ang parte sa isa ka pamatan-on nga nagluwas sang kabuhi sang iya tiyo. Ang iya tiyo amo si apostol Pablo. Wala naton mabal-an ang ngalan sini nga pamatan-on, pero bal-an naton nga maisog gid sia. Gusto mo bala mabal-an kon ano ang iya ginhimo?—

Si Pablo ginpriso sa Jerusalem. Gindakop sia kay nagawali sia parte kay Jesus. May malain nga mga lalaki nga akig kay Pablo, gani nagplano sila nga patyon sia. Nagsiling sila: ‘Hambalon naton ang kumander sang militar nga ipadala sa iya mga soldado si Pablo sa hukmanan. Dayon, banggaan naton sila sa dalan kag patyon si Pablo!’

Ginsugid sang hinablos ni Pablo sa iya kag sa kumander sang militar ang malain nga plano

Nabatian sang hinablos ni Pablo ini nga plano. Ano ang iya himuon? Ginkadtuan niya si Pablo sa prisuhan kag ginsugiran. Ginsugo sia dayon ni Pablo nga isugid ining malain nga plano sa kumander sang militar. Sa banta mo, mahapos bala para sa hinablos ni Pablo nga maghambal sa kumander?— Indi, bangod ang kumander mataas nga opisyal. Pero maisog ang hinablos ni Pablo gani nagkadto sia kag nanugid sa kumander.

Naghulag dayon ang kumander. Nagkuha sia sing halos 500 ka soldado para proteksionan si Pablo! Ginsugo niya sila nga dal-on si Pablo sa Cesarea sina mismo nga gab-i. Naluwas bala si Pablo?— Huo, indi na sia mabanggaan sang malain nga mga lalaki! Wala nadayon ang ila plano.

Ano ang matun-an mo sa sini nga istorya?— Puede ka man mangin maisog pareho sang hinablos ni Pablo. Kinahanglan nga maisog kita sa pagsugid sa mga tawo parte kay Jehova. Mangin maisog ka man bala kag padayon nga mag-istorya parte kay Jehova?— Kon himuon mo ini, mahimo maluwas mo man ang iban.