Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Tudlui ang Inyo Kabataan

 LEKSION 4

Nalipay si Tatay Niya kag si Jehova sa Iya Ginhimo

Nalipay si Tatay Niya kag si Jehova sa Iya Ginhimo

Ano ang ginpromisa ni Jefte kay Jehova?

Bisan indi mahapos, gintuman sang bata ni Jefte ang ginpromisa ni Tatay niya

Nakita mo bala ang bata nga babayi sa piktyur?— Sia ang bata nga babayi ni Jefte. Wala ginsugid sang Biblia ang iya ngalan, pero bal-an naton nga nalipay si Tatay niya kag si Jehova sa iya ginhimo. Istoryahan naton ang parte sa iya kag sa iya tatay nga si Jefte.

Si Jefte isa ka maayo nga tawo kag pirme niya ginatudluan ang iya bata parte kay Jehova. Makusog man sia kag maayo nga lider. Gani, ginpangabay sia sang mga Israelinhon nga mangin lider nila sa pagpakig-away.

Nangamuyo sa Dios si Jefte nga buligan sia nga magdaug. Nagpromisa si Jefte nga kon magdaug sia, ihatag niya kay Jehova ang una nga maggua sa ila  balay kon magpauli sia. Magaalagad ini sa bilog niya nga kabuhi sa tabernakulo sang Dios. Ang tabernakulo amo ang lugar diin ang mga tawo sadto nagasimba sa Dios. Kag nagdaug gid si Jefte! Pagpauli niya, bal-an mo bala kon sin-o ang una nga naggua sa ila balay?—

Husto, ang bata ni Jefte! Bugtong lang niya ini nga bata kag karon kinahanglan niya ini ihatag. Ginsubuan gid si Jefte. Ugaling, nakapromisa na sia. Nagsiling ang iya bata: ‘Tay, nakapromisa ka na kay Jehova. Dapat mo ini tumanon.’

Kada tuig, ang mga amiga sang bata ni Jefte nagabisita sa iya

Nasubuan man ang bata ni Jefte. Sa tabernakulo, indi sia puede magpamana kag magbata. Pero mas importante para sa iya nga tumanon ang ginpromisa ni Tatay niya para malipay si Jehova. Mas importante ini sangsa mamana ukon magbata. Gani, naglakat sia kag nag-istar sa tabernakulo sa bilog niya nga kabuhi.

Sa banta mo, nalipay bala si Tatay niya kag si Jehova sa iya ginhimo?— Huo. Kon matinumanon ka kag palangga mo si Jehova, mangin pareho ka sa bata ni Jefte. Malipay gid sa imo sanday Nanay kag Tatay mo kag si Jehova.