Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Sabat sa 10 ka Pamangkot sang mga Pamatan-on

 PAMANGKOT 1

Sin-o Gid Bala Ako?

Sin-o Gid Bala Ako?

NGAA IMPORTANTE INI?

Kay kon kilala mo ang imo kaugalingon kag nabal-an mo ang imo panindugan, makabulig ini sa imo nga makahimo sing husto nga mga desisyon kon nagaatubang sang pagtilaw.

ANO ANG HIMUON MO?

Pamensari ini nga sitwasyon: Ang menor-de-edad nga si Karen mga napulo pa lang ka minuto sa party sang may naghambal sa iya nga pamilyar ang tingog.

“Ti, matindog ka lang dira ’ya?”

Pagbalikid ni Karen nakita niya ang iya amiga nga si Jessica nga may ginabitbit nga duha ka nabuksan na nga botelya. Nabal-an ni Karen nga ilimnon ini. Gindaho ni Jessica ang isa ka botelya kay Karen kag naghambal, “Sa husto ka na nga edad para mag-enjoy!”

Mabalibad kuntani si Karen, pero amiga niya si Jessica. Kag indi niya gusto nga pensaron sang amiga niya nga killjoy sia. Isa pa, kabuot man kay Jessica. Gani kon nagainom sia, indi man malain mag-inom. ‘Mainom man lang,’ hambal ni Karen sa iya kaugalingon. ‘Indi man magdroga.’

Kon ikaw ang ara sa sitwasyon ni Karen, ano ang himuon mo?

PAMENSARA ANAY!

Para makahimo ka sing husto nga desisyon sa sini nga sitwasyon, kinahanglan may identidad ka. Ang identidad amo ang nagapakilala sa imo kon ano ka nga sahi sang tawo kag kon ano ang imo panindugan. Paagi sini, may ikasarang ka nga kontrolon ang imo kaugalingon imbes nga kontrolon ka sang iban.—1 Corinto 9:26, 27.

Paano mo mapalambo ini nga ikasarang? Ang pagsabat sa masunod nga mga pamangkot makabulig sa imo.

 1 ANO ANG AKON MGA IKASARANG?

Kon nahibaluan mo ang imo mga ikasarang kag maayo nga mga pamatasan, mangin mabakod ang imo panindugan.

HALIMBAWA SA BIBLIA: Si apostol Pablo nagsulat: “Bisan indi ako lantip maghambal, lantip ako sa ihibalo.” (2 Corinto 11:6) Nahangpan gid ni Pablo ang Kasulatan, amo nga nakapanindugan sia bisan pa ginpamatukan sia. Wala niya gintugutan ang negatibo nga mga hambal nga magpaluya sa iya.—2 Corinto 10:10; 11:5.

USISAA ANG IMO KAUGALINGON: Isulat ang imo talento ukon ikasarang.

Ano ang imo maayo nga batasan? (Halimbawa, may pag-ulikid ka bala sa iban? maalwan? masaligan? wala nagakaleyt?)

2 ANO ANG AKON MGA KALUYAHON?

Pareho sang mabakod nga kadena nga may maluya nga parte, mahimo man maguba ang imo identidad kon tugutan mo nga kontrolon ka sang imo mga kaluyahon.

HALIMBAWA SA BIBLIA: Nakahibalo si Pablo sang iya mga kaluyahon. Nagsulat sia: “Sa akon tagipusuon, nagakalipay gid ako sa kasuguan sang Dios, apang nakita ko sa akon lawas ang isa pa ka kasuguan nga nagapakig-away sa kasuguan sang akon hunahuna. Ini nga kasuguan amo ang sala . . . kag ginakontrol ako sini.”—Roma 7:22, 23.

USISAA ANG IMO KAUGALINGON: Ano nga kaluyahon ang kinahanglan mo kontrolon?

 3 ANO ANG AKON MGA TULUMURON?

Masakay ka bala sa taxi kag hambalon ang drayber nga maglibotlibot asta maubos ang iya gasolina? Indi gid ina maalamon kag magasto pa!

Ano ang leksion? Kon may mga tulumuron ka, may direksion ang imo kabuhi. Nakahibalo ka kon diin ka makadto kag may plano ka kon paano makalab-ot didto.

HALIMBAWA SA BIBLIA: Si Pablo nagsulat: “Ang akon paagi sang pagdalagan indi wala sing padulungan.” (1 Corinto 9:26) Imbes nga magpaanod-anod lang sa lakat sang panahon, may mga tulumuron si Pablo sa iya kabuhi kag nagtinguha sia nga lab-uton ini.—Filipos 3:12-14.

USISAA ANG IMO KAUGALINGON: Isulat ang tatlo ka tulumuron nga gusto mo lab-uton sa sini nga tuig.

4 ANO ANG AKON MGA PAGPATI?

Kon wala ka sing ginapatihan, indi ka makadesisyon sing maayo. Pareho sang tambalihan nga nagasunod sa kolor sang iya palibot, kon magsunodsunod ka man sa imo mga kaedad, wala ka sang kaugalingon nga identidad.

Kon malig-on ang imo identidad, daw pareho ka sa nakapanggamot na nga kahoy nga indi matumba sang mabaskog nga mga bagyo

Pero, kon ang imo ginahimo suno sa imo pagpati, mahuptan mo ang imo identidad, bisan ano pa ang himuon sang iban.

HALIMBAWA SA BIBLIA: Sang tin-edyer pa ang propeta nga si Daniel, “nagdesisyon” sia nga sundon ang kasuguan sang Dios bisan pa malayo sia sa iya pamilya. (Daniel 1:8) Gani, nangin matuod sia sa iya kaugalingon. Nagkabuhi si Daniel suno sa iya mga ginapatihan.

USISAA ANG IMO KAUGALINGON: Ano ang imo mga ginapatihan? Halimbawa: Nagapati ka bala nga may Dios? Kon huo, ngaa? Ngaa kumbinsido ka sa sini?

Nagapati ka bala nga para sa imo kaayuhan ang mga talaksan sang Dios? Kon huo, ngaa?

Gusto mo bala mangin pareho sang dahon nga ginapalidpalid sang dapya sang hangin, ukon sang malig-on nga kahoy nga nagatindog bisan pa sang mabaskog nga mga bagyo? Pabakura ang imo identidad, para mangin pareho ka sang kahoy. Makabulig ini sa imo nga masabat ang pamangkot nga, Sin-o gid bala ako?