Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Sabat sa 10 ka Pamangkot sang mga Pamatan-on

 PAMANGKOT 10

Paano ang Biblia Makabulig sa Akon?

Paano ang Biblia Makabulig sa Akon?

NGAA IMPORTANTE INI?

Bangod ang Biblia nagasiling: “Ang pagsulat sa bug-os nga Kasulatan gintuytuyan sang Dios.” (2 Timoteo 3:16) Kon matuod ini, ang Biblia makahatag sa imo sing giya nga kinahanglan mo.

ANO ANG HIMUON MO?

Pamensari ini nga sitwasyon: Si David nagadrayb sa lugar nga indi sia pamilyar. Ang mga karatula kag palatandaan nagapakita nga lain ang iya nakadtuan. Narealisar niya nga nagtalang sia. Mahimo nga nagsala sia sa iya ginlikuan.

Kon ikaw si David, ano ang himuon mo?

PAMENSARA ANAY!

May puede ka himuon:

  1. Mamangkot.

  2. Tan-awon ang mapa, ukon gamiton ang GPS.

  3. Sige lang drayb, kay basi matultulan mo man ang imo kaladtuan.

Siempre, ang C indi gid maayo.

Ang B mas maayo sangsa A. Kay man, madaladala mo ang mapa kag ang GPS samtang nagabiyahe ka. Makabulig ini sa paggiya sa imo.

Sing kaanggid, ang Biblia makabulig man sa imo!

Ining pinakamabakal nga libro

  • makagiya sa imo kon may mga problema ka

  • makabulig sa imo nga makilala ang imo kaugalingon kag mangin mas maayo nga tawo

  • makatudlo sa imo kon paano matigayon ang pinakamaayo nga kabuhi

 SABAT SA IMPORTANTE NGA MGA PAMANGKOT SA KABUHI

Halin sang gamay pa kita, pirme kita nagapamangkot.

  • Ngaa blue ang kolor sang langit?

  • Ngaa nagaigpat-igpat ang mga bituon?

Sa ulihi, nagapamangkot na kita parte sa nagakatabo sa aton palibot.

Ano abi kon ang mga sabat sa sini nga mga pamangkot ara lang sa Biblia?

Madamo ang nagasiling nga ang unod sang Biblia himuhimo lang nga mga istorya, nga daan na ini kaayo, ukon mabudlay gid ini intiendihon. Pero ang Biblia gid bala ang problema, ukon ang nabatian lang sang mga tawo parte sa Biblia? Indi ayhan sala nga impormasyon ang ila nabatian?

Halimbawa, abi sang mga tawo ginatudlo sang Biblia nga ang Dios ang nagakontrol sang kalibutan. Kon amo sina, ngaa kagamo sang kalibutan? Puno ini sang kasakit kag pag-antos, balatian kag kamatayon, kaimulon kag kalamidad. Mahimo bala ini sang isa ka mahigugmaon nga Dios?

Gusto mo bala mahibaluan ang sabat? Ayhan makibot ka sa ginasiling sang Biblia kon sin-o ang nagakontrol sang kalibutan!

Mahimo nakita mo nga ang mga laygay sa sini nga brosyur nabase sa Biblia. Kumbinsido gid ang mga Saksi ni Jehova nga ang Biblia masaligan nga giya. Bangod “ang pagsulat sa [sini] gintuytuyan sang Dios kag mapuslanon sa pagpanudlo, sa pagsabdong, sa pagtadlong.” (2 Timoteo 3:16, 17) Maayo gid nga usisaon mo ining dumaan, pero moderno nga libro!