Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Sabat sa 10 ka Pamangkot sang mga Pamatan-on

 PAMANGKOT 4

Ano ang Himuon Ko Kon Makasala Ako?

Ano ang Himuon Ko Kon Makasala Ako?

NGAA IMPORTANTE INI?

Kay kon ginabaton mo ang imo mga sala mangin mas responsable ka kag masaligan.

ANO ANG HIMUON MO?

Pamensari ini nga sitwasyon: Samtang nagahampang si Tim upod sa iya mga amigo, naigo niya sang bola ang kristal sang salakyan sang ila kaingod kag nabuka ini.

Kon ikaw si Tim, ano ang himuon mo?

PAMENSARA ANAY!

MAY TATLO IKAW KA PILILIAN:

  1. Malagyo.

  2. Basulon ang iban.

  3. Isugid sa kaingod ang natabo, kag magsiling nga bayaran mo ang naguba.

Mahimo pilion mo ang A. Pero maayo gid nga akuon mo ang imo mga sala—nakabuka ka man sang bintana ukon nakahimo sang iban pa nga sala.

 TATLO KA RASON KON NGAA AKUON MO ANG IMO SALA

  1. Amo ini ang husto nga himuon.

    Ang Biblia nagasiling: “Luyag namon magkabuhi sing bunayag sa tanan nga butang.”—Hebreo 13:18.

  2. Masami nga ginapatawad ang mga nagaaku sang ila mga sala.

    Ang Biblia nagasiling: “Ang tawo nga nagatago sang iya mga sala indi magmadinalag-on, apang ang nagatu-ad sang iya mga sala kag nagatalikod sa sini kaluy-an.” —Hulubaton 28:13.

  3. Labaw sa tanan, nagapahamuot ini sa Dios.

    Ang Biblia nagasiling: “Ginakangil-aran ni Jehova ang mga malimbungon, apang nagapakig-abyan Sia sing suod sa mga matarong.”—Hulubaton 3:32.

Si Karina nga 20 anyos, gintiketan bangod sa overspeeding kag gintago niya ini sa iya amay. Pero indi niya ini matago asta san-o. “Mga isa ka tuig ang nagligad,” hambal ni Karina, “nakita ni Papa ang tiket. Nagdaku pa gid ang problema!”

Ano ang leksion? Si Karina naghambal: “Kon taguon mo ang imo mga sala magalala lang ang sitwasyon. Manabat ka man gihapon sa ulihi!”

ANO ANG MATUN-AN MO SA IMO MGA SALA?

Ang Biblia nagasiling: “Kita tanan makasala sing madamong beses.” (Santiago 3:2, footnote) Base sa halimbawa, ang pagbaton gilayon sang imo mga sala nagapakita nga mapainubuson ka kag hamtong.

Dayon, magtuon sa imo mga sala. Ang babayi nga si Vera naghambal: “Kon makasala ako, ginakabig ko ini bilang eksperiensia nga makatuon ako para mangin mas maayo nga tawo, kag kon ano ang himuon ko kon matabo ini liwat.” Tan-awon naton kon paano mo ini himuon.

Ginhulam mo ang bisikleta sang imo amay kag naguba mo ini. Ano ang himuon mo?

  • Indi manugid kag magpensar nga indi lang tani ini makita sang imo amay.

  • Isugid sa imo amay ang matuod nga natabo.

  • Isugid sa imo amay ang natabo pero basulon mo ang iban.

Wala ka kapasar sa eksam kay wala ka nagtuon. Ano ang himuon mo?

  • Irason ang eksam.

  • Batunon ang imo kakulangan.

  • Irason nga kontra ka sang imo manunudlo.

Kon ginapamensar mo pirme ang imo mga sala sang una, daw pareho lang nga nagadrayb ka nga nagatan-aw sa rearview mirror

 Pamensara ang ginsambit nga mga sitwasyon kag kuno abi ikaw (1) ang amay kag (2) ang manunudlo. Ano ang pensaron sang imo amay kag manunudlo kon akuon mo dayon ang imo mga sala? Ano ang pensaron nila kon tabunan mo ang imo mga sala?

Pamensara ang imo sala sang nagligad nga tuig kag sabti ang masunod nga mga pamangkot.

Ano ang imo sala? Ano dayon ang ginhimo mo?

  • Gintabunan ko ini.

  • Ginbasol ko ang iban.

  • Gin-aku ko ini dayon.

Kon wala mo gin-aku ang imo sala, ano ang ginbatyag mo?

  • Nalipay—nakaluwas ako!

  • Ginkonsiensia—tani ginsugid ko na lang ang matuod.

Ano kuntani ang mas maayo nga himuon?

Ano ang natun-an mo sa imo sala?

ANO SA BANTA MO?

Ngaa wala ginaaku sang iban ang ila mga sala?

Ano ang pensaron sang mga tawo sa imo kon pirme mo lang ginatabunan ang imo mga sala, pero ano ang ila pensaron kon ginaaku mo ang imo mga sala?—Lucas 16:10.