Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Sabat sa 10 ka Pamangkot sang mga Pamatan-on

 PAMANGKOT 2

Dapat Gid Bala Ako Mabalaka sa Akon Hitsura?

Dapat Gid Bala Ako Mabalaka sa Akon Hitsura?

NGAA IMPORTANTE INI?

Kay may mga butang nga mas importante sangsa makita mo sa espiho.

ANO ANG HIMUON MO?

Pamensari ini nga sitwasyon: Kon magtan-aw si Julia sa espiho, panan-aw niya katambok sa iya. “Kinahanglan ko magpaniwang,” siling niya sa iya kaugalingon—bisan pa ginahambalan sia sang iya mga ginikanan kag mga abyan nga kaniwang sa iya.

Sining karon lang, gusto gid ni Julia nga buhinan ang iya bug-at “bisan mga duha lang ka kilo.” Gani plano niya nga magpagutom sing pila ka adlaw . . .

Kon ikaw si Julia, ano ang himuon mo?

PAMENSARA ANAY!

Ang imo bala pagtan-aw sa imo kaugalingon pareho sa makita mo sa guba nga espiho?

Indi malain kon mabalaka ka sa imo hitsura. Ang matuod, ginadayaw sang Biblia ang hitsura sang pila ka babayi kag lalaki, lakip sanday Sara, Raquel, Abigail, Jose, kag David. Ang Biblia nagasiling nga “katahom gid” kay Abisag.—1 Hari 1:4.

Pero madamo nga pamatan-on ang nabalaka gid sa ila hitsura. Puede ini magresulta sa daku nga problema. Pamensari ini:

  • Sa isa ka pagtuon, 58 porsiento sang mga babayi ang nagahambal nga sobra sa ila katambok, pero ang matuod, 17 porsiento lang.

  • Sa isa pa ka pagtuon, 45 porsiento sang mga babayi nga sobra kaniwang ang nagapensar nga sobra sila katambok!

  • Bangod gusto gid magpaniwang sang iban nga pamatan-on, nagbalatian sila sang anorexia—ang makamamatay nga balatian bangod sang hungod nga pagpagutom.

 Kon may sintoma ka sang anorexia ukon iban pa nga eating disorder, magpabulig. Isugid ini sa imo ginikanan ukon sa isa ka adulto nga ginasaligan mo. Ang Biblia nagasiling: “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.”—Hulubaton 17:17.

ANG PINAKAMAAYO NGA MAHIMO MO!

Ang nasulod nga pagkatawo amo ang basihan kon ang isa matahom ukon indi. Binagbinaga ang anak ni Hari David nga si Absalom. Ang Biblia nagasiling:

“Wala sing tawo nga pareho ka guapo kay Absalom . . . kag ginadayaw gid sia. Wala sia sing depekto.”—2 Samuel 14:25.

Pero ini nga pamatan-on bugalon, ambisyuso, kag traidor! Gani indi gid maayo ang paglaragway sang Biblia kay Absalom; ginpakilala sia bilang tawo nga madumot kag indi mainunungon.

Maalamon gid nga ginhatagan kita sang Biblia sini nga laygay:

“Isuksok ninyo ang bag-o nga personalidad.”—Colosas 3:10.

“Ang inyo pagpatahom indi dapat sa panggua lamang . . . , sa baylo dapat patahumon ninyo ang inyo tagipusuon.”—1 Pedro 3:3, 4.

Indi man malain nga gusto naton mangin maayo ang aton hitsura. Pero mas importante ang imo personalidad. Kay man, mas gusto sang mga tawo ang maayo nga mga batasan sangsa maskulado ukon seksi nga lawas! “Dali ka matalupangdan kon guapa ka,” hambal sang isa ka babayi nga si Phylicia, “pero ang madumduman gid sang mga tawo amo ang imo maayo nga mga batasan.”

USISAA ANG IMO HITSURA

Pirme ka bala nalaw-ayan sa imo hitsura?

Nagapamensar ka bala nga magparetoke ukon magdieta sing sobra para mangin maayo ang imo hitsura?

Kon may gusto ka bag-uhon sa imo hitsura, ano ini? (Pilia ang imo sabat.)

  • KATAASON

  • KABUG-ATON

  • BUHOK

  • KORTE SANG LAWAS

  • GUYA

  • KOLOR SANG PANIT

Kon huo ang imo sabat sa una nga duha ka pamangkot kag tatlo ukon sobra pa ang imo ginpili sa ikatlo nga pamangkot, pamensari ini: Posible nga indi gid man negatibo ang pagtan-aw sang iban sa imo pareho sang pagtan-aw mo sa imo kaugalingon. Kadali lang nga mangin sobra ikaw ka negatibo kag magkabalaka sa imo hitsura.—1 Samuel 16:7.

Magtuon sing Dugang Pa

ANG GINASILING SANG IBAN

Ang Ginasiling sang mga Pamatan-on Parte sa Kapagros

Wala ka bala nagakaon sang masustansia nga pagkaon ukon nagaehersisyo? Sa sini nga video clip ginasugid sang iban nga pamatan-on ang ila ginahimo para padayon sila nga mangin mapagros.