Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Biblia—Ano ang Mensahe Sini?

 SEKSION 15

Ang Tagna sang Gintapok nga Propeta

Ang Tagna sang Gintapok nga Propeta

Si Daniel nagtagna parte sa Ginharian sang Dios kag sa pagkari sang Mesias. Nalaglag ang Babilonia

SI Daniel, nga isa ka matutom gid nga pamatan-on, gindala nga bihag sa Babilonia antes ginlaglag ang Jerusalem. Sia kag ang pila ka Judiyo nga bihag halin sa napierde nga ginharian sang Juda, ginhatagan sing kahilwayan sang mga nagbihag sa ila. Ginpakamaayo gid sang Dios si Daniel sa iya pag-istar sa Babilonia. Nakaluwas gani sia sa kamatayon sa lungib sang mga leon kag nakabaton sing mga palanan-awon parte sa palaabuton. Ang labing importante niya nga mga tagna nasentro sa Mesias kag sa Iya paggahom.

Nahibaluan ni Daniel kon san-o maabot ang Mesias. Ginsugid kay Daniel kon san-o mapaabot sang katawhan sang Dios ang pag-abot sang “Mesias nga Lider”—69 ka semana sang mga tuig sugod sa paggua sang sugo nga patindugon liwat ang mga pader sang Jerusalem. Ang isa ka semana may pito ka adlaw, samtang ang isa ka semana sang mga tuig may pito ka tuig. Madugay na nga nagkabuhi si Daniel sang ginpagua ini nga sugo sang 455 B.C.E. Sugod sa sini nga tuig, ang 69 ka “semana” nga nagalawig sing 483 ka tuig natapos sang 29 C.E. Sa masunod nga bahin sini nga brosyur, matun-an naton kon ano ang natabo sa sina nga tuig. Gintagna man ni Daniel nga ang Mesias “utdon,” ukon patyon, para mangin katumbasan sang kasal-anan.—Daniel 9:24-26.

Mangin Hari sa langit ang Mesias. Sa isa ka palanan-awon, nakita ni Daniel sa langit ang Mesias nga ginpatuhuyan nga “kaangay sa anak sang tawo,” nga nagapalapit sa trono ni Jehova. Ginhatag ni Jehova sa iya ang “pagbulut-an kag himaya kag ginharian.” Ini nga Ginharian wala sing katapusan. May makawiwili pa nga natun-an si Daniel parte sa Ginharian sang Mesias. May kaupod ini nga Hari sa paggahom sa iya Ginharian. Gintawag sila nga “mga balaan sang Labing Mataas.”—Daniel 7:13, 14, 27.

Laglagon sang Ginharian ang gobierno sa kalibutan. Ginhatagan sang Dios sing ikasarang si Daniel agod ipaathag ang isa ka damgo nga nagpalibog kay Nabocodonosor, ang hari sang Babilonia. Nakita sang hari sa iya damgo ang isa ka daku nga larawan nga may ulo nga bulawan, may dughan kag mga butkon nga pilak, may tiyan kag mga paa nga saway, may batiis nga salsalon kag mga tiil nga may bahin nga salsalon kag may bahin nga daga. May bato nga natiphag gikan sa bukid kag nag-igo sa mga tiil sang larawan kag nagdugmok sa sini. Ginpaathag ni Daniel nga ang mga bahin sang larawan nagarepresentar sa paagisod nga kagamhanan sa kalibutan, nga nagsugod sa Babilonia nga amo ang ulo nga bulawan. Nakita ni Daniel nga sa katapusan nga kagamhanan sa sining malaut nga kalibutan, magahulag ang Ginharian sang Dios. Pagadugmukon sini ang tanan nga gobierno sang kalibutan. Nian magagahom ini sing dayon.—Daniel, kapitulo 2.

Tigulang na si Daniel sang nasaksihan niya ang pagkalutos sang Babilonia. Ginlutos ni Hari Ciro ang siudad subong sang gintagna sang mga propeta. Wala magdugay pagkatapos sini, nahilway ang mga Judiyo sa ila pagkabihag. Suno gid ini sa tion kay natabo ini pagkatapos sang 70 ka tuig nga wala sing pumuluyo sa ila duta nga natawhan. Sa panuytoy sang matutom nga mga gobernador, mga saserdote, kag mga propeta, natukod sang ulihi ang Jerusalem kag ang templo ni Jehova. Pero, ano ang natabo pagligad sang 483 ka tuig?

Base sa tulun-an sang Daniel.

 

 

Magtuon sing Dugang Pa

San-o Nagsugod sa Paggahom ang Ginharian sang Dios? (Bahin 1)

Kon nahibaluan mo ang sabat, mapaathag mo bala ini sa iban halin sa Biblia?