Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Biblia—Ano ang Mensahe Sini?

 SEKSION 22

Maisugon nga Nagbantala ang mga Apostoles

Maisugon nga Nagbantala ang mga Apostoles

Madasig nga nag-uswag ang Cristianong kongregasyon bisan pa ginahingabot

NAPULO ka adlaw pagligad sang pagkayab ni Jesus, mga 120 ka disipulo ang nagtipon sa isa ka balay sa Jerusalem sa tion sang Kapiestahan sang mga Judiyo nga Pentecostes sang 33 C.E. Hinali lang nga may kagahod subong sang nagahagunos nga hangin sa sulod sang balay. Dayon, milagruso nga nagpamulong ang mga disipulo sing lainlain nga lenguahe nga wala nila anay nahibaluan. Ano ang kahulugan sining tumalagsahon nga mga hitabo? Ginhatagan sang Dios ang mga disipulo sing balaan nga espiritu.

Madamo sing mga bisita sa gua nga naghalin sa madamo nga kadutaan para sa kapiestahan. Natingala sila sang nabatian nila ang ila lenguahe nga ginapamulong sang mga disipulo ni Jesus. Agod ipaathag ini nga hitabo, ginpatuhuyan ni Pedro ang tagna ni propeta Joel nga “ipasagahay” sang Dios ang iya espiritu kag ang mga makabaton sini makahimo sing milagro. (Joel 2:28, 29) Ining mabakod nga ebidensia sang balaan nga espiritu nagapaathag nga natabo na ang isa ka importante nga pagbag-o: Ang kahamuot sang Dios sa Israel nagsaylo na sa bag-o natukod nga Cristianong kongregasyon. Kon gusto nila nga batunon sang Dios ang ila pag-alagad, dapat mangin sumulunod sila ni Cristo.

Sa sini man nga tion, nagbaskog ang pagpamatok, kag ginpriso sang mga manugpamatok ang mga disipulo. Pero sa sina nga gab-i, ginbuksan sang anghel ni Jehova ang puertahan sang prisuhan kag ginsilingan ang mga disipulo nga magpadayon sa pagbantala. Pagkaaga, nagpadayon sila sa pagbantala. Nagkadto sila sa templo kag gintudlo ang maayong balita parte kay Jesus. Naakig ang relihioso nga mga manugpamatok kag ginsugo sila nga mag-untat sa pagbantala. Wala sing kahadlok nga nagsabat ang mga apostoles: “Dapat namon tumanon ang Dios subong manuggahom sa baylo sang mga tawo.”—Binuhatan 5:28, 29.

Nagbaskog ang paghingabot. Gin-akusar sang pila ka Judiyo si disipulo Esteban sing pasipala kag ginbato sia asta mapatay. Nagatan-aw nga may kahamuot si Saulo sang Tarso. Nagkadto sia gilayon sa Damasco agod arestuhon ang bisan sin-o nga sumulunod ni Cristo. Samtang nagapakadto si Saulo sa Damasco, nagkirab ang kapawa gikan sa langit sa palibot niya kag may tingog nga nagasiling: “Saulo, Saulo, ngaa ginahingabot mo ako?” Nabulag bangod sa kapawa, namangkot si Saulo: “Sin-o ka, Ginuo?” Nagsabat ang tingog: “Ako si Jesus.”—Binuhatan 9:3-5.

Pagligad sang tatlo ka adlaw, ginpadala ni Jesus ang disipulo nga si Ananias agod ayuhon si Saulo. Nabawtismuhan si Saulo kag maisugon nga nagbantala parte kay Jesus. Nakilala sang ulihi si Saulo subong si apostol Pablo kag nangin mapisan nga miembro sang Cristianong kongregasyon.

Ginabantala sang mga disipulo ni Jesus ang maayong balita sang Ginharian sang Dios sa mga Judiyo kag mga Samaritano lamang. Nagpakita karon ang isa ka anghel kay Cornelio, isa ka Romanong opisyal sang soldado nga nagakahadlok sa Dios, kag nagsiling sa iya nga ipasugat si apostol Pedro. May nag-upod kay Pedro sa pagbantala kay Cornelio kag sa iya panimalay. Samtang nagahambal pa si Pedro, ginbubo ang balaan nga espiritu sa Gentil nga mga tumuluo, kag nagsugo ang apostol nga bawtismuhan sila sa ngalan ni Jesus. Ginhatagan karon sang kahigayunan ang mga tawo sang tanan nga pungsod nga makatigayon sing kabuhi nga wala sing katapusan. Handa na ang kongregasyon sa pagbantala sing maayong balita sa iban nga mga lugar.

—Base sa Binuhatan 1:1–11:21.