Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Biblia—Ano ang Mensahe Sini?

 SEKSION 25

Laygay Parte sa Pagtuo, Paggawi, kag Gugma

Laygay Parte sa Pagtuo, Paggawi, kag Gugma

Nagsulat sanday Santiago, Pedro, Juan, kag Judas agod palig-unon ang mga masigkatumuluo

SANDAY Santiago kag Judas mga utod ni Jesus sa iloy. Sanday Pedro kag Juan naman nalakip sa 12 ka apostoles. Ining apat ka lalaki naghimo sing pito ka sulat, nga bahin karon sang Cristianong Griegong Kasulatan. Ang tagsa sini nga sulat ginhingalan sa manunulat. Ang katuyuan sang mga laygay sa sini nga mga sulat amo ang pagbulig sa mga Cristiano nga mahuptan ang ila katutom kay Jehova kag sa Iya Ginharian.

Ipakita ang pagtuo. Indi bastante ang pagsiling nga may pagtuo. Ang matuod nga pagtuo dapat may buhat. “Sa pagkamatuod,” sulat ni Santiago, “ang pagtuo nga wala sing mga buhat patay.” (Santiago 2:26) Ang pagtuo sa tion sang pagtilaw nagapatubas sang pagbatas. Agod magmadinalag-on, kinahanglan sang isa ka Cristiano nga mangabay sing kaalam sa Dios. Kumbinsido sia nga ihatag ini sang Dios. Ang isa nga nagabatas kahamut-an sang Dios. (Santiago 1:2-6, 12) Kon magpabilin nga matutom sa iya pagtuo ang isa ka sumilimba, sabton sia ni Jehova nga Dios. “Magpalapit kamo sa Dios,” siling ni Santiago, “kag magapalapit sia sa inyo.”—Santiago 4:8.

Dapat mabakod ang pagtuo sang isa ka Cristiano agod mapamatukan niya ang mga pagsulay kag malain nga mga impluwensia. Ang malain nga paggawi sa palibot amo ang nagpahulag kay Judas nga palig-unon ang iya mga masigkatumuluo nga “makig-away sing lakas para sa pagtuo.”—Judas 3.

Ipadayon ang matinlo nga paggawi. Ginapaabot ni Jehova nga mangin balaan ang iya mga sumilimba, buot silingon dapat mangin matinlo sila sa tanan nga butang. Nagsulat si Pedro: “Mangin balaan man kamo sa tanan ninyo nga paggawi, bangod nasulat na: ‘Dapat kamo mangin balaan, bangod ako [si Jehova] balaan.’” (1 Pedro 1:15, 16) May maayong halimbawa nga dapat ilugon ang mga Cristiano. “Si Cristo mismo nag-antos tungod sa inyo,” siling ni Pedro, “nga nagabilin sa inyo sang huwaran agod sundon ninyo sing maayo ang iya mga tikang.” (1 Pedro 2:21) Bisan pa mag-antos ang mga Cristiano bangod sang ila pagsunod sa mga talaksan sang Dios, natigayon nila ang “maayo nga konsiensia.” (1 Pedro 3:16, 17) Ginpalig-on ni Pedro ang mga Cristiano nga maggawi sing balaan kag ipakita ang mga buhat sang diosnon nga debosyon samtang nagahulat sa adlaw sang paghukom kag bag-ong kalibutan nga ginsaad sang Dios nga sa sini “magapuyo ang pagkamatarong.”—2 Pedro 3:11-13.

“Magpalapit kamo sa Dios, kag magapalapit sia sa inyo.”—Santiago 4:8

Ipakita ang gugma. “Ang Dios gugma,” sulat ni Juan. Ginpatalupangod sang apostol nga ginpakita sang Dios ang iya daku nga gugma paagi sa pagpadala kay Jesus subong “halad para sa aton mga sala.” Ano dapat ang reaksion sang mga Cristiano? Nagpaathag si Juan: “Mga hinigugma, kon ang Dios naghigugma sa aton sa sini nga paagi, nian kita mismo obligado nga maghigugmaanay.” (1 Juan 4:8-11) Ang isa ka paagi agod mapakita ini nga gugma amo ang pagkamaabiabihon sa aton mga masigkatumuluo.—3 Juan 5-8.

Pero, paano mapakita sang mga sumilimba ni Jehova ang ila gugma sa iya? Nagsabat si Juan: “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.” (1 Juan 5:3; 2 Juan 6) Gani ginapasalig ang mga nagatuman sa Dios nga padayon niya sila nga higugmaon kag makatigayon sila sing “kabuhi nga walay katapusan.”—Judas 21.

Base sa Santiago; 1 Pedro; 2 Pedro; 1 Juan; 2 Juan; 3 Juan; Judas.