Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Biblia—Ano ang Mensahe Sini?

 SEKSION 17

Gintudlo ni Jesus ang Ginharian sang Dios

Gintudlo ni Jesus ang Ginharian sang Dios

Madamo nga butang ang gintudlo ni Jesus sa iya mga disipulo, pero isa lang ang iya tema—ang Ginharian sang Dios

ANO ang misyon ni Jesus sa duta? Sia mismo nagsiling: “Dapat ko ibantala ang maayong balita sang ginharian sang Dios, kay tungod sini ginpadala ako.” (Lucas 4:43) Binagbinaga ang apat ka butang nga gintudlo ni Jesus parte sa Ginharian nga amo ang tema sang iya pagbantala.

1. Si Jesus ang gintangdo nga Hari. Direkta nga ginsiling ni Jesus nga sia amo ang gintagna nga Mesias. (Juan 4:25, 26) Ginpamatud-an man niya nga sia amo ang Hari nga nakita ni propeta Daniel sa palanan-awon. Ginsilingan ni Jesus ang iya mga apostoles nga sa palaabuton magalingkod sia sa “mahimayaon nga trono” kag sila man magalingkod sa mga trono. (Mateo 19:28) Gintawag niya ining grupo sang mga manuggahom nga iya “diutay nga panong,” kag nagsiling man sia nga may “iban nga mga karnero” nga indi bahin sa sini nga grupo.—Lucas 12:32; Juan 10:16.

2. Ipatuman sang Ginharian sang Dios ang matuod nga hustisya. Ginsiling ni Jesus nga pagadulaon sang Ginharian ang grabe nga inhustisya paagi sa pagpakabalaan sa ngalan ni Jehova nga Dios kag sa pagtinlo sini sa tanan nga pagpasipala nga ginhimo ni Satanas sugod pa sa pagrebelde sa Eden. (Mateo 6:9, 10) Ginpakita man ni Jesus nga wala sia sing pinasulabi paagi sa pagtudlo sa mga lalaki kag mga babayi, manggaranon man ukon imol. Bisan pa nga ang panguna niya nga misyon amo ang pagtudlo sa mga Israelinhon, ginbuligan man niya ang mga Samaritano kag mga Gentil ukon ang mga indi Judiyo. Indi pareho sa mga lider sang relihion sadto, wala sia sing pinilian ukon paboritismo.

3. Indi bahin sang kalibutan ang Ginharian sang Dios. Nagkabuhi si Jesus sa tion nga may kagamo sa pulitika. Ang ila pungsod ginagamhan sang iban nga pungsod. Pero, sang gintinguhaan sang mga tawo nga paentrahon sia sa pulitika, nalagyo sia. (Juan 6:14, 15) Ginsilingan niya ang isa ka pulitiko: “Ang akon ginharian indi bahin sini nga kalibutan.” (Juan 18:36) Ginsilingan man niya ang iya mga sumulunod: “Kamo indi bahin sang kalibutan.” (Juan 15:19) Wala niya sila gintugutan sa paggamit sing hinganiban sa inaway, bisan sa pagpangapin sa iya.—Mateo 26:51, 52.

“Naglibot sia sa . . . mga minuro, nga nagabantala kag nagapahayag sang maayong balita sang ginharian sang Dios.”—Lucas 8:1

4. Nahisuno sa gugma ang paggahom ni Cristo. Nagsaad si Jesus nga paumpawan niya ang mga tawo, kag pamag-anon ang ila mga lulan. (Mateo 11:28-30) Gintuman niya ini. Ginhatagan niya sila sing mahigugmaon kag praktikal nga laygay sa pag-atubang sang sobra nga kabalaka, pagpauswag sang mga kaangtanan, pagsikway sa gugma sa materyal, kag pagtigayon sing kalipay. (Mateo, kapitulo 5-7) Bangod mahigugmaon sia, mahapos sia palapitan. Nagapalapit sa iya ang tanan nga sahi sang tawo, bisan pa ang pinakakubos, kay nahibaluan nila nga tahuron sila kag pakig-angutan sing mainayuhon. Maayo gid nga Manuggahom si Jesus!

May isa pa ka paagi nga natudlo ni Jesus sing epektibo ang Ginharian sang Dios. Naghimo sia sing madamo nga milagro. Ngaa? Hibaluon naton.

—Base sa tulun-an sang Mateo, Marcos, Lucas, kag Juan.

 

 

Magtuon sing Dugang Pa

Ginharian sang Dios—Ngaa Importante Ini kay Jesus?

Wala lang natabuan nga pirme ginasugid ni Jesus ang parte sa Ginharian sangsa iban nga topiko.

Ginharian sang Dios—Ngaa Importante Ini sa Imo?

Ang matuod, ang sabat nagadepende sa imo.

Ano ang Ginharian sang Dios?

Madamo ang nakahibalo sang Pangamuyo sang Ginuo. Ano ang buot silingon sang, “Magkari ang imo Ginharian”?