Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Biblia—Ano ang Mensahe Sini?

 SEKSION 5

Ginpakamaayo sang Dios si Abraham kag ang Iya Pamilya

Ginpakamaayo sang Dios si Abraham kag ang Iya Pamilya

Nagdamo ang kaliwatan ni Abraham. Ginproteksionan sang Dios si Jose sa Egipto

NAHIBALUAN ni Jehova nga ang iya pinalangga nga anak magaantos kag sa ulihi mapatay. Ginpakita ini sang tagna sa Genesis 3:15. Masugid bala sang Dios sa mga tawo kon ano ang epekto sining kamatayon sa iya? May kasaysayan sa Biblia nga magasugid sa aton parte sa sini. Ginsugo sang Dios si Abraham nga ihalad ang iya pinalangga nga anak nga si Isaac.

Daku ang pagtuo ni Abraham. Dumduma, nagsaad ang Dios sa iya nga ang gintagna nga Manluluwas, ukon ang Binhi, magahalin sa kaliwatan ni Isaac. Nagasalig sia nga banhawon sang Dios si Isaac, gani matinumanon nga ginhanda ni Abraham ang paghalad sa iya anak. Pero ginpunggan sia sang anghel sang Dios. Gindayaw sang Dios si Abraham sa iya kahanda sa paghalad sang iya pinalangga nga anak, gani ginsulit niya ang Iya saad sa sining matutom nga tawo.

Sang ulihi, may duha ka bata si Isaac, sanday Esau kag Jacob. Indi kaangay ni Esau, gin-apresyar ni Jacob ang sagrado nga mga butang kag ginpadyaan sia. Gin-islan sang Dios ang ngalan ni Jacob sing Israel, kag ang 12 ka bata ni Israel amo ang nangin amay sang 12 ka tribo sang Israel. Pero, paano nangin daku nga pungsod ini nga pamilya?

Nagsugod ang hitabo sang ang kalabanan sa mga bata ni Israel nahisa sa ila manghod nga si Jose. Ginbaligya nila si Jose subong ulipon kag gindala sia sa Egipto. Pero, ginpakamaayo sang Dios ining matutom kag maisog nga pamatan-on. Bisan pa sa mabudlay nga mga inagihan ni Jose, ginpili sia sang ulihi ni Paraon, ang gumalahom sa Egipto, kag ginhatagan sia sing mataas nga awtoridad. Suno gid ini sa tion kay ginpadala ni Jacob ang iya pila ka anak sa Egipto agod magbakal sing pagkaon bangod sa tiggulutom, kag si Jose amo ang nagadumala sa tanan nga pagkaon! Pagkatapos sang makatalandog nila nga pagkitaay sang iya mahinulsulon nga mga utod, ginpatawad sila ni Jose kag ginhimos niya nga magsaylo ang bug-os nga pamilya sa Egipto. Ginpaistar sila sa matambok nga duta agod magdamo sila kag mag-umwad. Nahangpan ni Jose nga amo ini ang katuyuan sang Dios agod nga matuman ang Iya mga saad.

Napatay si Jacob sa Egipto, nga napalibutan sang iya nagadaku nga pamilya. Sang nagatagumatayon sia, gintagna niya nga ang ginsaad nga Binhi, ukon Manluluwas, mangin gamhanan nga Manuggahom nga matawo sa kaliwatan ni Juda. Antes mapatay si Jose, gintagna niya nga maabot ang tion nga paguaon sang Dios ang pamilya ni Jacob sa Egipto.

—Base sa Genesis kapitulo 20 asta 50; Hebreo 11:17-22.