Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Iluga ang Ila Pagtuo

 KAPITULO DISISEIS

Maalamon Sia, Maisog, kag Masinakripisyuhon

Maalamon Sia, Maisog, kag Masinakripisyuhon

1-3. (a) Ilaragway ang pagpalapit ni Ester sa trono sang iya bana. (b) Ano ang reaksion sang hari sa pagkadto ni Ester?

NAGAPALAPIT si Ester sa trono, kag masako ang pagkubakuba sang iya dughan. Handurawa nga gulpi naglinong ang palasyo sang Persia sa Susan, kag mabatian ni Ester ang iya mga tikang kag ang kalas sang iya bayo. Indi sia dapat magpatublag sa kadakuon sang harianon nga korte, sa matahom nga mga haligi, kag sa mga desinyo sang kisame nga human sa sedro sang Lebanon. Ginsentro ni Ester ang iya atension sa tawo nga nagapungko sa trono kay sa iya nasandig ang iya kabuhi.

2 Samtang nagapadulong si Ester, ginatulok sia sang hari kag gin-untay sini ang iya bulawan nga setro. Ining simple nga ginhimo sang hari nagluwas sang kabuhi ni Ester. Ginapakita sini nga ginpatawad sia sa iya nalapas—ang pagkadto sa hari nga wala ginpatawag. Sang ara na si Ester sa trono, gin-uyatan niya ang punta sang setro.—Est. 5:1, 2.

Mapainubuson nga ginpasalamatan ni Ester ang kaluoy sang hari

3 Masiling nga si Hari Asuero manggaranon gid kag gamhanan. Suno sa mga iskolar, ang bayo sang mga hari sang Persia sang una katumbas sang ginatos ka milyon ka dolyar. Pero nakita ni Ester sa mga mata sang iya bana nga palangga sia sini. Nagsiling ang hari: “Ano bala ang buut mo, Hara Ester? Ano bala ang imo pangabay? Ihatag ini sa imo, bisan sa katunga sang ginharian.”—Est. 5:3.

4. Ano nga mga kabudlayan ang maatubang ni Ester?

4 Napakita na ni Ester ang pagtuo kag kaisog sang nagpalapit sia sa hari para maluwas ang iya katawhan sa plano nga pagpapas sa ila. Daw nagmadinalag-on na sia, pero may mga kabudlayan pa sia nga maatubang. Dapat makumbinsi ni Ester ining bugalon nga hari nga ang ginasaligan sini nga manuglaygay malaut nga tawo, nga nagdaya sa hari para papason ang katawhan ni Ester. Paano niya ini himuon, kag ano ang matun-an naton sa iya pagtuo?

 Nahibaluan Niya ang ‘Tion sa Paghambal’

5, 6. (a) Paano gin-aplikar ni Ester ang prinsipio sa Manugwali 3:1, 7? (b) Paano si Ester nagpakita sing kaalam sang nakighambal sia sa iya bana?

5 Isugid bala ni Ester sa hari ang problema sa atubangan sang tanan nga nagatrabaho sa korte? Kon himuon niya ini, mahimo mahuy-an ang hari ukon mahatagan sing tion si Haman nga ipanghiwala ang panumbungon ni Ester. Ano ang ginhimo ni Ester? Ginatos ka tuig antes sini, ang maalam nga hari nga si Solomon nagsulat: “May tagsa ka tion ang tanan nga buluhaton, . . . may tion sa paghipos kag may tion man sa paghambal.” (Man. 3:1, 7, Ang Pulong sang Dios) Mahimo gintudluan si Ester sang iya ginakilala nga amay, ang matutom nga si Mardoqueo, sini nga mga prinsipio. Gani nahibaluan gid ni Ester ang ‘tion sa paghambal.’

6 Si Ester nagsiling: “Kon maayo sa hari, ang hari kag si Haman magkadto sa sini nga adlaw sa sinalosalo nga naaman ko sa iya.” (Est. 5:4) Nagpasugot ang hari kag ginpatawag niya si Haman.  Indi bala nga maalamon gid si Ester? Ginrespeto niya ang iya bana kag nangita sia sing mas maayo nga tion para masugid ang iya problema.—Basaha ang Hulubaton 10:19.

7, 8. Ano ang kahimtangan sa una nga sinalusalo ni Ester, pero ngaa wala sia dayon nanugid sa hari?

7 Nagpreparar sing maayo si Ester, kag ginsigurado niya nga ang tanan magustuhan sang iya bana. Naghanda sia sing maayo nga alak para mangin makalilipay ang okasyon. (Sal. 104:15) Nalipay gid si Asuero, kag ginpamangkot niya liwat si Ester kon ano ang iya pangayuon. Ini na bala ang tion sa paghambal?

8 Para kay Ester, indi pa. Gin-agda niya liwat ang hari kag si Haman sa isa pa ka sinalusalo pagkasunod nga adlaw. (Est. 5:7, 8) Ngaa ginpabuasan pa niya? Dumduma nga nagmando ang hari nga pamatyon ang tanan nga katawhan ni Ester. Gani dapat pat-uron ni Ester nga masugid ang problema sa husto nga tion. Naghulat sia sang isa pa ka kahigayunan nga mapakita sa iya bana nga ginarespeto gid niya ini.

9. Daw ano ka bilidhon ang pagpailob, kag paano naton mailog ang halimbawa sa sini ni Ester?

 9 Ang pagpailob isa ka bilidhon nga kinaiya nga talagsa na lang makita. Bisan gusto na gid ni Ester nga manugid, nagpailob sia kag naghulat sang husto nga tion. Madamo kita sing matun-an sa iya, kay mahimo nakakita kita sang mga sala nga dapat tadlungon. Kon kinahanglan ipadangat sa may awtoridad ang problema, maayo nga ilugon naton si Ester kag magpailob. Ang Biblia nagasiling: “Paagi sa pagpailob mahaylo ang kumander, kag ang dila nga malulo makabali sang tul-an.” (Hulu. 25:15, New World Translation of the Holy Scriptures, NW) Kon maghulat kita sa husto nga tion kag maghambal sing malulo, pareho kay Ester, ang daw tul-an katig-a nga pagpamatok mahimo maghumok. Ginpakamaayo bala si Ester sang iya Dios nga si Jehova bangod sang iya pagpailob kag kaalam?

 Ang Pagpailob Nagadala sing Hustisya

10, 11. Ngaa nagbag-o ang ginbatyag ni Haman pagkatapos sang una nga sinalusalo, kag ano ang ginsiling sa iya sang iya asawa kag mga abyan nga himuon?

10 Ang pagpailob ni Ester may maayo nga mga resulta. Pagkatapos sang una nga sinalusalo, “malipayon kag masadya sa tagiposoon” si Haman kay nahamuot sa iya ang hari kag rayna. Pag-agi niya sa gawang sang palasyo, nakita niya ang Judiyo nga si Mardoqueo nga wala gihapon nagyaub sa iya. Subong sang nabinagbinag naton sa nagligad nga kapitulo, wala ini ginhimo ni Mardoqueo indi bangod wala sia nagarespeto, kundi bangod sa iya konsiensia kag sa iya kaangtanan kay Jehova nga Dios. Pero, “napuno [si Haman] sing kasingkal.”—Est. 5:9.

11 Sang ginsugid ini ni Haman sa iya asawa kag mga abyan, ginsilingan nila sia nga magpahimo sang bitayan nga mga 22 metros kataas, kag maglisensia sa hari nga ibitay diri si Mardoqueo. Nagustuhan ni Haman ang ila ideya kag nagpahimo sia dayon sing bitayan.—Est. 5:12-14.

12. Ngaa ginpabasa sang hari ang libro sang maragtas sang ginharian, kag ano ang iya natukiban?

12 Pero sadto nga gab-i, “indi makatolog ang hari,” siling sang Biblia, gani ginpakuha niya ang libro sang maragtas sang ginharian kag ginbasa ini sa iya. Nabasahan diri ang parte sa plano nga pagpatay kay Asuero. Ini nga hitabo nadumduman sang hari, kag ang mga manugpatay nadakpan kag ginpatay. Pero ano ang ginhimo kay Mardoqueo nga nagbuyagyag sang plano? Namangkot dayon ang hari kon bala napadyaan na si Mardoqueo. Ang sabat? Wala pa.—Basaha ang Ester 6:1-3.

13, 14. (a) Paano nagsuli ang kahimtangan para kay Haman? (b) Ano ang ginsiling kay Haman sang iya asawa kag mga abyan?

13 Naakig ang hari, gani namangkot sia kon bala may opisyal sang palasyo nga makabulig sa iya sa pagtadlong sini. Natabuan nga ara didto si Haman, nga mahimo temprano pa nag-abot para mangayo sing pahanugot sa pagpatay kay Mardoqueo. Pero wala pa sia makahambal, ginpamangkot sia sang hari kon paano padunggan ang tawo nga nahamut-an sang hari. Abi ni Haman sia ang ginatumod sang hari. Gani naghatag sia sing suhestyon: Suksukan ang tawo sang bayo sang hari, pasakyon sa kabayo sini, kag iparada sang mataas nga opisyal sa bilog nga Susan. Dayon ang opisyal magadayaw sa iya nga mabatian sang tanan. Handurawa ang reaksion ni Haman sang nahibaluan niya nga ang tawo nga padunggan amo si Mardoqueo! Kag sin-o ang ginsugo sang hari nga magadayaw kay Mardoqueo? Si Haman!—Est. 6:4-10.

14 Napilitan si Haman nga tumanon ang sugo nga nagpaakig  pa gid sa iya kay Mardoqueo. Dayon nagdalidali sia pauli nga nahuy-an. Ginsilingan sia sang iya asawa kag mga abyan nga ang natabo sa iya isa ka malain nga patimaan nga mapierde sia kay Mardoqueo nga isa ka Judiyo.—Est. 6:12, 13.

15. (a) Ano ang maayo nga resulta sang pagpailob ni Ester? (b) Ngaa maalamon nga ‘maghulat’ kita?

15 Bangod mapailubon nga naghulat si Ester sang isa pa ka adlaw para isugid sa hari ang iya pangabay, nahatagan sing tion si Haman nga maghimo sing plano nga nagresulta sa iya kahuy-anan. Kag mahimo nga si Jehova nga Dios ang sa likod kon ngaa wala matulugan ang hari. (Hulu. 21:1) Gani, nagsiling ang Biblia nga dapat kita ‘maghulat’! (Basaha ang Miqueas 7:7.) Kon maghulat kita sa Dios, makita naton nga mas maayo ang iya mga solusyon sa aton mga problema.

Naghambal Sia nga May Kaisog

16, 17. (a) San-o na ang ‘tion sa paghambal’ ni Ester? (b) Ano ang kinalain ni Ester kay Vasti, ang una nga asawa sang hari?

16 Wala na ginpahulat ni Ester ang hari. Sa iya ikaduha nga sinalusalo, isugid na niya ang tanan. Paano? Ginhatagan sia sang hari sing kahigayunan; ginpamangkot sia liwat kon ano ang iya pangabay. (Est. 7:2) Ini na ang ‘tion sa paghambal’ ni Ester.

17 Mahimo nga nangamuyo sing mahipos si Ester sa iya Dios antes niya ini ginsiling: “Kon nakapahamuut ako sa imo itololok, O hari, kag kon nahamut-an ini sang hari, ihatag sa akon ang akon kabuhi sa akon pakilooy, kag ang akon katawohan sa akon pangabay.” (Est. 7:3) Talupangda nga ginpasalig niya ang hari nga ginarespeto niya ang paghukom nga nahamut-an sini. Lain gid si Ester  kay Vasti, ang una nga asawa sang hari, nga hungod nga nagpakahuya sa iya bana! (Est. 1:10-12) Wala man ginpakalain ni Ester ang hari sa pagsalig sini kay Haman. Sa baylo, nakitluoy sia nga proteksionan ang iya kabuhi.

18. Paano ginsugid ni Ester ang problema sa hari?

18 Sigurado nga interesado ang hari sa sini nga pangabay. Kay man, sin-o ang gusto magpatay sa iya rayna? Si Ester nagpadayon: “Ginbaligya kami, ako kag ang akon katawohan, nga laglagon, patyon, kag walaon. Kon nabaligya kami nga ulipon nga mga lalaki kag ulipon nga mga babayi, naghipus ako kuntani; kay ang amon kapipit-an indi mapaanggid sa kasamaran sang hari.” (Est. 7:4) Prangka nga ginbuyagyag ni Ester ang problema, pero nagsiling sia nga mahipos lang sia kuntani kon ulipunon lang sila. Pero bangod pagpapas ang himuon sa ila, daku ang epekto sini sa hari kag indi puede nga maghipos lang sia.

19. Ano ang matun-an naton kay Ester parte sa pagkumbinsi?

19 Ginatudluan man kita sang halimbawa ni Ester kon paano magkumbinsi. Kon kinahanglan mo isugid ang serioso nga problema sa tawo nga may awtoridad ukon sa imo hinigugma, ang pagpailob, pagrespeto, kag katampad makabulig gid.—Hulu. 16:21, 23.

20, 21. (a) Paano ginbuyagyag ni Ester ang plano ni Haman, kag ano ang reaksion sang hari? (b) Ano ang ginhimo ni Haman sang nabuyagyag ang iya plano?

20 Si Asuero namangkot: “Sin-o bala sia, kag diin bala sia, nga nagapangahas sa iya tagiposoon sa paghimo sing subong?” Handurawa nga may ginatudlo si Ester samtang nagasiling sia: “Ang kasumpung kag ang kaaway! Ini nga malaut nga Haman!” Ano ang epekto sini? Hinadlukan gid si Haman. Handurawa nga  nagapalamula ang hari sang nahibaluan niya nga ang iya ginasaligan nga manuglaygay nagdaya sa iya nga pirmahan ang sugo nga magapatay sa iya pinalangga nga asawa! Nagkadto dayon ang hari sa hardin para magpakalma.—Est. 7:5-7.

Maisog nga ginbuyagyag ni Ester ang kalainan ni Haman

21 Naghapa si Haman sa tiilan sang rayna para makitluoy. Sang nagbalik ang hari kag nakita niya si Haman nga nagahapa sa higdaan nga ginahilayan ni Ester, akig niya nga gin-akusahan si Haman nga manglugos sa rayna sa balay mismo sang hari. Nagakahulugan ini sang kamatayon ni Haman. Ginkuha si Haman nga natabunan ang guya. Ang isa ka opisyal nagsiling sa hari nga may ginpatindog si Haman nga daku nga bitayan para kay Mardoqueo. Nagmando dayon si Asuero nga bitayon didto si Haman.—Est. 7:8-10.

22. Paano ang halimbawa ni Ester makatudlo sa aton nga indi madulaan sing paglaum, pagsalig, ukon pagtuo?

22 Bangod sa lapnag nga inhustisya subong, daw imposible na nga matigayon ang hustisya. Nabatyagan mo man bala ina? Si Ester wala nadulaan sing paglaum, pagsalig, ukon pagtuo. Sang nag-abot ang husto nga tion, maisog niya nga ginhambal kon ano ang husto, kag nagsalig nga buligan sia ni Jehova. Amo man sini ang aton himuon! Wala nagbag-o si Jehova halin sang panahon ni Ester. Ginadakop niya ang mga malaut paagi sa ila kaugalingon nga mga siod, pareho sa ginhimo niya kay Haman.—Basaha ang Salmo 7:11-16.

Gin-una Niya si Jehova kag ang Iya Katawhan

23. (a) Paano ginpadyaan sang hari sanday Mardoqueo kag Ester? (b) Paano natuman ang tagna ni Jacob parte kay Benjamin? (Tan-awa ang kahon nga “ Natuman nga Tagna.”)

23 Nakilala na gid man sang hari kon sin-o si Mardoqueo—indi lamang bilang manug-amlig niya kundi ang nagpadaku mismo kay Ester. Ginhatag ni Asuero kay Mardoqueo ang posisyon ni Haman bilang primer ministro. Ginhatag sang hari kay Ester ang balay ni Haman, lakip ang mga pagkabutang sini, kag ginpadumalahan ini kay Mardoqueo.—Est. 8:1, 2.

24, 25. (a) Ngaa wala nagpatawhay si Ester sa tapos mabuyagyag ang plano ni Haman? (b) Paano ginrisgo liwat ni Ester ang iya kabuhi?

 24 Subong nga luwas na sanday Ester kag Mardoqueo, mapatawhay na lang bala ang rayna? Amo ina ang iya himuon kon maiyaiyahon sia. Sina nga tion, ang sugo ni Haman nga pamatyon ang tanan nga Judiyo nakalab-ot na sa bilog nga emperyo. Naghimo si Haman sing pagabutgabot, ukon Pur—nga porma sang espiritismo—para mahibaluan kon san-o ipatuman ining mapintas nga pagsalakay. (Est. 9:24-26) Bisan binulan pa antes ini ipatuman, kadasig lang sang panahon. Mapunggan pa ayhan ini?

25 Ginrisgo liwat ni Ester ang iya kabuhi, nagkadto sia sa hari nga wala ginpatawag. Naghibi sia para sa iya katawhan, kag nagpakitluoy sa iya bana nga bag-uhon ang mando. Pero ang mga layi nga ginpirmahan sang hari sang Persia indi na puede bag-uhon. (Dan. 6:12, 15) Gani ginhatagan sang hari sing awtoridad sanday Ester kag Mardoqueo nga maghimo sing bag-o nga sugo. Ginpagua ang ikaduha nga proklamasyon, nga nagahatag sing kinamatarong sa mga Judiyo nga depensahan ang ila kaugalingon. Ining maayong balita para sa mga Judiyo ginpahibalo sang mga manugkabayo sa bilog nga emperyo. Madamo ang nabuhian sing paglaum. (Est. 8:3-16) Mahanduraw naton ang mga Judiyo sa bilog nga emperyo nga nagahanda para sa inaway, nga indi nila mahimo  kon wala ining bag-o nga sugo. Magaupod ayhan si “Jehova sang mga kasuldadusan” sa iya katawhan?—1 Sam. 17:45NW.

Nagpagua sing proklamasyon sanday Ester kag Mardoqueo para sa mga Judiyo sa Emperyo sang Persia

26, 27. (a) Paano ginpadaug ni Jehova ang iya katawhan sa ila mga kaaway? (b) Ano nga tagna ang natuman sa pagpamatay sa mga anak ni Haman?

26 Sang nag-abot ang gintalana nga adlaw, handa na ang katawhan sang Dios. Madamo nga opisyal sang Persia ang nag-apin sa ila, kay lapnag na ang balita nga si Mardoqueo nga Judiyo ang bag-o nga primer ministro. Ginpadaug ni Jehova ang iya katawhan. Pat-od gid nga gin-amligan niya ang iya katawhan paagi sa pag-ubos sa ila mga kaaway. *Est. 9:1-6.

27 Delikado gid para kay Mardoqueo nga dumalahan ang balay ni Haman kon buhi pa ang napulo ka anak sining malaut nga tawo. Gani ginpamatay man sila. (Est. 9:7-10) Natuman ang tagna sang Dios sa Biblia nga mapapas ang mga Amaleknon nga mapintas nga kaaway sang iya katawhan. (Deut. 25:17-19) Ang mga anak ni Haman mahimo nalakip sa katapusan nga mga kaliwat sining ginpakamalaut nga pungsod.

28, 29. (a) Ngaa kabubut-on ni Jehova nga madalahig sa inaway si Ester kag ang iya katawhan? (b) Ngaa maayo gid nga halimbawa si Ester para sa aton subong?

28 Mahimo nga indi mahapos para sa pamatan-on nga si Ester nga abagahon ang mabug-at nga mga responsibilidad pareho sang sugo sang hari parte sa inaway kag pagpapas. Pero kabubut-on ni Jehova nga maproteksionan ang Israel sa kalaglagan; kay diri magahalin ang ginsaad nga Mesias, ang paglaum sang tanan nga tawo! (Gen. 22:18) Subong, nahibaluan sang mga alagad sang Dios nga sang nagkadto sa duta ang Mesias nga si Jesus, gindumilian na niya ang iya mga sumulunod nga mag-entra sa inaway.—Mat. 26:52.

29 Pero ang mga Cristiano nagapakig-away sa espirituwal. Gusto gid ni Satanas nga gub-on ang aton pagtuo kay Jehova nga Dios. (Basaha ang 2 Corinto 10:3, 4.) Maayo gid nga halimbawa si Ester! Kabay nga ilugon naton ang iya pagtuo paagi sa pagpakita sing kaalam, kaisog, pagpailob, kag pagsakripisyo para pangapinan ang katawhan sang Dios.

^ par. 26 Ginhatagan sang hari ang mga Judiyo sing isa pa ka adlaw para ubuson ang ila kaaway. (Est. 9:12-14) Ginaselebrar gihapon sang mga Judiyo ini nga kadalag-an kada tigpamulak sa kapiestahan nga ginatawag Purim, nga naghalin sa ngalan sang pagabutgabot nga ginhimo ni Haman para papason ang Israel.