Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Iluga ang Ila Pagtuo

Introduksion

Introduksion

“Mangin mga manug-ilog sang mga nagapanubli sang mga saad paagi sa pagtuo kag pagpailob.”—HEBREO 6:12.

1, 2. Paano gintamod sang isa ka nagalakbay nga manugtatap ang matutom nga mga karakter sa Biblia, kag ngaa maayo sila nga mga abyan?

“NAGAHAMBAL sia parte sa mga karakter sang Biblia nga daw madugay na niya nga mga abyan.” Amo sini ang ginsiling sang isa ka Cristianong babayi pagkatapos makapamati sang pamulongpulong sang may edad na nga nagalakbay nga manugtatap. Husto gid ang iya ginsiling. Ang manugtatap tinuig na nga nagatuon kag nagatudlo sang Biblia, amo nga kon nagahambal sia parte sa isa sa mga karakter sa sini, daw ginasugid niya ang iya madugay na nga abyan.

2 Maayo gid kon mangin abyan naton ang madamo sining mga karakter sa Biblia. Matuod gid bala sila para sa imo? Handurawa kon ano ang batyagon mo kon makaupod kag maistorya mo sanday Noe, Abraham, Rut, Elias, kag Ester. Hunahunaa kon ano ang mahimo nga impluwensia nila sa imo kabuhi—ang hamili nila nga mga laygay kag pagpalig-on!—Basaha ang Hulubaton 13:20.

3. (a) Paano kita makabenepisyo sa pagtuon parte sa matutom nga mga lalaki kag babayi sa Biblia? (b) Ano nga mga pamangkot ang binagbinagon naton?

3 Siempre, sa tion sang “pagkabanhaw sang mga matarong,” posible gid ining tumalagsahon nga kaangtanan. (Binu. 24:15) Pero bisan subong makabenepisyo kita sa pagtuon parte sa matutom nga mga lalaki kag babayi sa Biblia. Paano? Si apostol Pablo nagtanyag sining praktikal nga sabat: “Mangin mga manug-ilog sang mga nagapanubli sang mga saad paagi sa pagtuo kag pagpailob.” (Heb. 6:12) Samtang ginatun-an naton ang parte sa mga matutom, binagbinagon naton ang pila ka pamangkot parte sa ginhambal ni Pablo: Ano ang pagtuo, kag ngaa kinahanglan naton ini? Paano naton mailog ang mga matutom sang una?

Pagtuo—Ano Ini kag Ngaa Kinahanglan Naton Ini

4. Ano ang pagtamod sang mga tawo parte sa pagtuo, kag ngaa sayop sila?

4 Ang pagtuo makagalanyat nga kinaiya nga ginpabaloran gid sang tanan nga tawo nga tun-an naton sa sini nga publikasyon. Madamo subong ang wala nagapabalor sa sini, kay nagahunahuna sila nga pagpati lang ini sa mga butang nga wala sing pamatuod ukon ebidensia. Pero nagsayop sila. Ang pagtuo indi basta pagpati lang dayon sa isa ka butang; indi lang ini isa ka balatyagon. Ang pagpati lang dayon sa isa ka butang makatalagam. Ang balatyagon mahimo magbag-obag-o, kag bisan gani ang pagpati indi bastante kon ang pagahambalan parte sa Dios, kay bisan “ang  mga demonyo nagapati man kag nagakurog.”—Sant. 2:19.

5, 6. (a) Sa anong duha ka sahi sang indi makita nga mga butang nasentro ang aton pagtuo? (b) Daw ano dapat kabakod ang aton pagtuo? Iilustrar.

5 Ang matuod nga pagtuo indi lang basta pagpati. Talupangda kon ano ang kahulugan sini sa Biblia. (Basaha ang Hebreo 11:1.) Si Pablo nagsiling nga ang pagtuo nasentro sa duha ka sahi sang butang nga indi naton makita. Ang isa parte sa mga katunayan nga “indi makita”—pareho kay Jehova nga Dios, sa iya Anak, ukon sa Ginharian nga nagagahom na subong sa langit. Ikaduha, ang pagtuo nasentro sa “mga butang nga ginalauman”—mga butang nga wala pa matabo. Indi naton makita subong ang bag-ong kalibutan nga pahanabuon sang Ginharian sang Dios sa indi madugay. Buot bala sina silingon nga ang aton pagtuo sa sining mga katunayan kag mga butang nga aton ginalauman wala sing basihan?

6 Indi! Ginpaathag ni Pablo nga ang matuod nga pagtuo may basihan. Sang ginsiling niya nga ang pagtuo “masaligan nga pagpaabot,” gingamit niya ang ekspresyon nga mahimo man i-translate nga “titulo.” Ibutang ta nga may mahatag sa imo sang balay. Mahimo ihatag niya sa imo ang titulo kag magsiling, “Ari ang imo bag-o nga balay.” Siempre, indi niya buot silingon nga mapuyo ka sa sina nga papel; buot niya silingon nga inang legal nga dokumento mabakod nga pamatuod nga ikaw na ang tag-iya sang balay kay ang pagpanag-iya sang dokumento pareho lang sa pagpanag-iya sang balay. Sing kaanggid, ang pamatuod sang aton pagtuo maathag gid, tuman kabakod, nga daw amo na ini mismo ang aton pagtuo.

7. Ano ang nalakip sa matuod nga pagtuo?

7 Gani ang matuod nga pagtuo nagalakip sang malig-on nga pagsalig kag mabakod nga kombiksion nga nasentro gid lang kay Jehova nga Dios. Ginapahulag kita sini nga tamdon si Jehova subong aton mahigugmaon nga Amay kag saligan nga matuman ang tanan niya nga saad. Pero indi lang amo sini ang matuod nga pagtuo. Pareho sang buhi nga butang, dapat ini saguron agod maglambo. Dapat ipakita ini sa buhat, kay kon indi, mapatay ini.—Sant. 2:26.

8. Ngaa importante gid ang pagtuo?

8 Ngaa importante gid ang pagtuo? Naghatag si Pablo sing makapakumbinsi nga sabat. (Basaha ang Hebreo 11:6.) Indi kita makapalapit kay Jehova ukon makapahamuot sa iya kon wala kita sing pagtuo. Gani importante ang pagtuo agod matuman naton ang pinakamataas, pinakadungganon nga katuyuan para sa intelihente nga tinuga: ang mangin suod kag mahimaya ang aton langitnon nga Amay, si Jehova.

9. Paano ginpakita ni Jehova nga nahibaluan niya nga kinahanglan gid naton ang pagtuo?

9 Nahibaluan ni Jehova nga kinahanglan gid naton ang pagtuo, gani naghatag sia sa aton sang mga halimbawa agod tudluan kita nga magpalambo kag magpakita sang pagtuo.  Ginapakamaayo niya ang Cristianong kongregasyon sang mga halimbawa sang matutom nga mga nagapanguna. Ang iya Pulong nagasiling: “Iluga ang ila pagtuo.” (Heb. 13:7) Kag indi lang amo ina. Nagsulat si Pablo parte sa “tuman kadaku nga panganod sang mga saksi,” matutom nga mga lalaki kag babayi sang una nga nagpahamtang sing maayo nga halimbawa sang pagtuo. (Heb. 12:1) May madamo pa nga matutom nga wala nasambit ni Pablo sa Hebreo kapitulo 11. Madamo sing matuod nga sugilanon sa Biblia parte sa mga lalaki kag babayi, bata kag tigulang, nga may lainlain nga kahimtangan sa kabuhi nga nangin matutom, kag madamo kita sing matun-an sa ila sa sining tion nga wala sing pagtuo.

Paano Naton Mailog ang Pagtuo sang Iban?

10. Paano mahimo makabulig sa aton ang personal nga pagtuon nga mailog ang matutom nga mga lalaki kag babayi sa Biblia?

10 Indi mo mailog ang isa kon indi mo sia anay pag-obserbahan sing maayo. Samtang ginabasa mo ini nga publikasyon, matalupangdan mo nga kadamo gid sang pagpanalawsaw nga ginhimo para makilala mo ining matutom nga mga lalaki kag babayi. Ngaa indi ka man magpanalawsaw? Sa imo personal nga pagtuon, tun-i pa gid ang Biblia nga nagagamit sing mga bulig sa pagpanalawsaw nga matigayon mo. Samtang ginapamalandungan mo ang imo ginatun-an, handurawa ang kahimtangan kag palibot sang mga sugilanon sa Biblia. Tilawi nga handurawa nga daw ara ka mismo kag makita mo ang mga talan-awon, mabatian ang mga tunog, kag mapanimahuan ang mga humot. Labaw sa tanan, tinguhai nga batyagon ang ginabatyag sang mga karakter. Kon himuon mo ini, makilala mo pa gid sila kag mangin matuod sila sa imo nga daw madugay mo na nga mga abyan.

11, 12. (a) Paano ka mahimo mangin suod pa gid kanday Abram kag Sarai? (b) Paano ka mahimo makabenepisyo sa halimbawa nanday Ana, Elias, ukon Samuel?

11 Kon makilala mo sila, luyag mo sila ilugon. Halimbawa, handurawa nga nagapaabot ka sang bag-o nga asaynment. Paagi sa organisasyon ni Jehova, gin-agda ka nga pasangkaron ang imo ministeryo. Mahimo ginpangabay ka nga magsaylo sa lugar nga nagakinahanglan gid sing madamo nga manugbantala, ukon mahimo gin-agda ka nga tilawan ang pila ka porma sang pagpanaksi nga bag-o ukon mabudlay para sa imo. Samtang ginabinagbinag mo ang asaynment kag ginapangamuyo ang parte sini, indi bala makabulig sa imo ang pagpamalandong sa halimbawa ni Abram? Handa sila ni Sarai nga isikway ang kasulhayan sang Ur kag bangod sini ginpakamaayo gid sila. Samtang ginailog mo ang ila ginhimo, pat-od nga mabatyagan mo nga mas nakilala mo pa gid sila.

12 Sing kaanggid, ano abi kon ang isa nga  suod sa imo nagapakig-angot sa imo sing malain kag bangod sini nasandad ka—nga daw luyag mo na lang nga indi magtambong sa mga miting? Kon pamalandungan mo ang halimbawa ni Ana kag kon paano niya gin-atubang ang malain nga pagtratar sa iya ni Penina, makabulig ini sa imo nga maghimo sing husto nga desisyon—kag mahimo man nga mangin suod mo pa nga abyan si Ana. Subong man, kon nagabatyag ka nga wala sing pulos, mahimo mangin suod ka kay Elias samtang ginatun-an mo ang iya inagihan kag kon paano sia ginpalig-on ni Jehova. Kag ang mga pamatan-on nga ginaipit sang ila imoral nga mga klasmeyt mahimo mangin suod kay Samuel kon matun-an nila kon paano niya gin-atubang ang malain nga impluwensia sang mga anak ni Eli sa tabernakulo.

13. Ang pag-ilog bala sa pagtuo sang mga karakter sa Biblia nagapakita nga mas kubos ang pagtamod ni Jehova sa imo? Ipaathag.

13 Ginapakita bala sini nga kon ilugon mo ang pagtuo sang mga karakter sa Biblia mas kubos ang pagtamod ni Jehova sa imo? Indi gid! Dumduma, ginapalig-on kita sang Pulong ni Jehova nga ilugon ang matutom nga mga tawo. (1 Cor. 4:16; 11:1; 2 Tes. 3:7, 9) Dugang pa, ang mga tawo nga tun-an naton nangin manug-ilog man sang mga matutom nga mas nauna sa ila. Halimbawa, matalupangdan naton sa Kapitulo 17 sini nga libro nga ang ginhambal ni Maria gin-ilog niya sa mga ginsiling ni Ana, nga nagapakita nga ginkabig niya si Ana nga iya halimbawa. Ginapakita bala sini nga kubos ang pagtuo ni Maria? Indi! Sa baylo, nakabulig kay Maria ang halimbawa ni Ana nga magbakod ang iya pagtuo para makahimo sia sing pinasahi nga ngalan sa atubangan ni Jehova nga Dios.

14, 15. Ano ang makita sa sini nga publikasyon, kag paano naton ini gamiton sing maayo?

14 Ini nga libro gindesinyo para buligan ka nga magbakod ang imo pagtuo. Ang mga kapitulo diri naghalin sa mga artikulo nga “Iluga ang Ila Pagtuo” sa Ang Lalantawan nga naggua sang 2008 asta 2013. Pero may pila ka materyal nga gindugang. Ang kada kapitulo may mga pamangkot para makabulig sa aton nga mabinagbinag kag maaplikar ang materyal. Madamo sing bag-o nga de-kolor kag detalyado nga ilustrasyon nga ginhimo para lang sa sini nga libro, kag ginpatahom pa gid ang daan na nga mga ilustrasyon. May ginlakip man nga mapuslanon nga time line kag mga mapa. Ang libro nga Iluga ang Ila Pagtuo gindesinyo para tun-an sing personal, pangpamilya, kag sa kongregasyon. Madamo nga pamilya ang mahimo malipay bisan sa pagbasa lang sing matunog sang mga sugilanon sing magkaupod.

15 Kabay nga ini nga libro makabulig sa imo nga ilugon ang pagtuo sang matutom nga mga alagad ni Jehova sang una. Kag kabay nga makabulig ini sa imo nga magbakod sa pagtuo samtang nagasuod ka pa gid sa imo Amay sa langit, si Jehova!