Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Mangin Suod kay Jehova

 KAPITULO 6

Gahom sa Paglaglag—“Si Jehova Isa ka Isganan nga Mangangaway”

Gahom sa Paglaglag—“Si Jehova Isa ka Isganan nga Mangangaway”

1-3. (a) Ano nga katalagman ang naatubang sang mga Israelinhon sa mga kamot sang mga Egiptohanon? (b) Paano nakig-away si Jehova para sa iya katawhan?

NAKIBON ang mga Israelinhon—sa tunga sang indi mataklad nga mga pil-as sang bukid kag indi matabok nga dagat. Nagalagas ang mga hangaway sang Egipto, isa ka mapintas kag sunudsunuran nga mga kasuldadusan, nga determinado sa paglaglag sa ila. * Apang, ginpalig-on ni Moises ang katawhan sang Dios nga indi madulaan sing paglaum. “Si Jehova magapakig-away para sa inyo,” pasalig niya sa ila.—Exodo 14:14.

2 Walay sapayan sini, mahimo gid nga nagtuaw si Moises kay Jehova, kag ang Dios nagsabat: “Ngaa padayon ka nga nagatuaw sa akon? . . . Bayawa ang imo sungkod kag untaya ang imo kamot sa ibabaw sang dagat kag pihaka ini.” (Exodo 14:15, 16) Handurawa lamang ang masunod nga mga natabo. Gilayon nga ginsugo ni Jehova ang isa ka anghel, kag ang haligi nga panganod nagkulap sa likuran sang Israel, ayhan nagahumlad kaangay sang pader kag nagabalabag sa pagsalakay sang mga Egiptohanon. (Exodo 14:19, 20; Salmo 105:39) Gin-untay ni Moises ang iya kamot. Bangod sang mabaskog nga hangin, napihak ang dagat. Nagpunong ang tubig kag nagtindog kaangay sang mga pader, sa amo nabuksan ang isa ka banas nga hustuhan ang kasangkaron agod makaagi ang bug-os nga pungsod!—Exodo 14:21; 15:8.

3 Bangod sini nga pagpasundayag sang gahom, dapat kuntani ginmanduan ni Paraon ang iya mga kasuldadusan nga mag-isol. Sa baylo, nagmando ang bugalon nga si Paraon nga magsalakay. (Exodo 14:23) Gilayon nga nagsugbo ang mga Egiptohanon sa dagat sa paglagas, apang wala madugay nagkinagula sila bangod  nagkalahukas ang mga ruweda sang ila mga kangga. Sang makatabok na ang mga Israelinhon, ginsugo ni Jehova si Moises: “Untaya ang imo kamot sa ibabaw sang dagat, agod nga ang mga tubig mag-uli sa ibabaw sang mga Egiptohanon, sa ila mga kangga sa inaway kag sa ila mga manugkabayo.” Ang tubig nga mga pader nag-uli, sa amo natabunan si Paraon kag ang iya mga hangaway!—Exodo 14:24-28; Salmo 136:15.

Sa Dagat nga Mapula, ginpamatud-an ni Jehova ang iya kaugalingon nga “isa ka isganan nga mangangaway”

4. (a) Ano ang ginpamatud-an ni Jehova sa Dagat nga Mapula? (b) Ano mahimo ang reaksion sang iban sa sini nga paglaragway kay Jehova?

4 Ang kaluwasan sang pungsod sang Israel sa Dagat nga Mapula isa ka importante gid nga hitabo sa maragtas sang mga pagpakig-angot sang Dios sa katawhan. Ginpamatud-an didto ni Jehova ang iya kaugalingon subong “isa ka isganan nga mangangaway.” (Exodo 15:3) Apang, ano ang imo reaksion sa sini nga paglaragway kay Jehova? Matuod, ang inaway nagdala sing daku nga kasakit kag pag-antos sa katawhan. Mahimo ayhan nga ang paggamit sang Dios sing malaglagon nga gahom nagapugong sa imo sa baylo nga nagabuyok sa imo sa pagpalapit sa iya?

Mga Pagpakig-away sang Dios Kontra sa mga Pagpakig-away sang Tawo

5, 6. (a) Ngaa nagakaigo nga ginatawag ang Dios nga “Jehova sang mga kasuldadusan”? (b) Paano nagakatuhay ang pagpakig-away sang Dios sa pagpakig-away sang tawo?

5 Sing halos tatlo ka gatos ka beses sa Hebreong Kasulatan kag makaduha sa Cristianong Griegong Kasulatan, ginhatagan ang Dios sing titulo nga “Jehova sang mga kasuldadusan.” (1 Samuel 1:11) Subong Soberanong Manuggahom, nagamando si Jehova sa isa ka daku nga hangaway sang mga anghel. (Josue 5:13-15; 1 Hari 22:19) Makapulunaw ang ikasarang sa paglaglag sini nga mga hangaway. (Isaias 37:36) Indi makalilipay hunahunaon ang kalaglagan sang mga tawo. Apang, dapat naton dumdumon nga ang mga pagpakig-away sang Dios indi kaangay sa walay namunamu nga mga pagpakig-away sang tawo. Mahimo nga hatagan sang militar kag politikal nga mga lider ang ila pagpakig-away  sing dungganon nga mga motibo. Apang ang pagpakig-away sang tawo pirme nagadalahig sing kadalok kag kakagod.

6 Sa kabaliskaran, si Jehova wala ginapukaw sang indi makatarunganon nga emosyon. Ang Deuteronomio 32:4 nagasiling: “Ang Igang, himpit ang iya binuhatan, kay ang tanan niya nga dalanon katarungan. Isa ka Dios sang katutom, nga sa iya wala sing inhustisya; matarong kag matadlong sia.” Ginapakamalaut sang Pulong sang Dios ang wala ginapunggan nga kasingkal, kapintas, kag kasingki. (Genesis 49:7; Salmo 11:5) Gani wala gid nagapanghikot si Jehova nga wala sing kabangdanan. Talagsa lang niya ginagamit ang iya gahom sa paglaglag kag subong katapusan lamang nga solusyon. Subong ini sang ginsiling niya paagi kay manalagna Ezequiel: “ ‘May kahamuot bala ako sa kamatayon sang malauton,’ siling sang Soberanong Ginuong Jehova, ‘kag indi sa pagtalikod niya gikan sa iya mga dalanon agod padayon sia nga magkabuhi?’ ”—Ezequiel 18:23.

7, 8. (a) Ano ang sayop nga ginhinakop ni Job tuhoy sa iya mga pag-antos? (b) Paano gintadlong ni Elihu ang panghunahuna ni Job sa sining bahin? (c) Ano nga leksion ang matun-an naton gikan sa naeksperiensiahan ni Job?

7 Ngaa, nian, nagagamit si Jehova sing malaglagon nga gahom? Antes ini sabton, mahimo naton dumdumon ang matarong nga tawo nga si Job. Nanghangkat si Satanas kon bala si Job—ang matuod, ang bisan sin-o nga tawo—magahupot gihapon sang iya integridad sa idalom sang pagtilaw. Ginsabat ni Jehova ini nga panghangkat paagi sa pagtugot kay Satanas nga tilawan ang integridad ni Job. Subong resulta, nagmasakit si Job, nadula ang iya manggad kag ang iya mga anak. (Job 1:1–2:8) Bangod wala sia sing hinalung-ong sa mga hulusayon nga nadalahig, sayop nga naghinakop si Job nga ang iya pag-antos isa ka di-makatarunganon nga silot sang Dios. Ginpamangkot niya ang Dios kon ngaa ginhimo Niya sia nga “iliguon,” isa ka “kaaway.”—Job 7:20; 13:24.

8 Ginbuyagyag sang pamatan-on nga si Elihu ang sayop nga pangatarungan ni Job, sa pagsiling: “Nagsiling ka, ‘Ang akon pagkamatarong labi pa sa iya sang Dios.’ ” (Job 35:2) Huo, indi maalamon nga maghunahuna kita nga labaw pa sa Dios ang nahibaluan naton ukon nga sia indi makatarunganon. “Malayo sa matuod nga Dios nga maghimo sia sing pagkamalaut, kag maghikot  sing di-makatarunganon ang Labing Gamhanan,” siling ni Elihu. Sang ulihi, nagsiling sia: “Kon tuhoy sa Labing Gamhanan, indi naton sia matungkad; mataas sia sa gahom, kag ang katarungan kag ang bugana nga pagkamatarong indi niya pakadiutayon.” (Job 34:10; 36:22, 23; 37:23) Mapat-od naton nga kon magpakig-away ang Dios, may maayo sia nga rason sa paghimo sini. Ginatandaan ini nga punto, hibaluon naton ang pila sang mga rason kon ngaa ang Dios sang paghidait nagatungod kon kaisa sang papel sang isa ka mangangaway.—1 Corinto 14:33.

Kon Ngaa ang Dios sang Paghidait Nagakapilitan sa Pagpakig-away

9. Ngaa nagapakig-away ang Dios sang paghidait?

9 Sa tapos gindayaw ang Dios subong “isa ka isganan nga mangangaway,” si Moises nagsiling: “Sin-o sa mga dios ang kaangay mo, O Jehova? Sin-o ang kaangay mo, nga mahimayaon sa pagkabalaan?” (Exodo 15:11) Kaanggid man sini ang ginsulat ni manalagna Habacuc: “Tuman ka putli ang imo mga mata agod makita ang malain; kag ang pagtan-aw sa kagamo indi mo masarangan.” (Habacuc 1:13) Bisan pa si Jehova isa ka Dios sang gugma, Dios man sia sang pagkabalaan, pagkamatarong, kag katarungan. Kon kaisa, ini nga mga kinaiya nagatiklod sa iya nga gamiton ang iya maglaglagon nga gahom. (Isaias 59:15-19; Lucas 18:7) Gani wala ginamusingan sang Dios ang iya pagkabalaan kon nagapakig-away sia. Sa baylo, nagapakig-away sia bangod balaan sia.—Exodo 39:30.

10. (a) San-o kag paano una nga nag-utwas ang kinahanglanon nga makig-away ang Dios? (b) Paano lamang mahusay ang kaawayon nga gintagna sa Genesis 3:15, kag ano ang mga benepisyo sa matarong nga katawhan?

10 Binagbinaga ang kahimtangan nga nag-utwas sa tapos magrebelde sa Dios ang unang mag-asawa, sanday Adan kag Eva. (Genesis 3:1-6) Kon ginpabay-an niya ang ila pagkadimatarong, mahimo nga ginpahuyang ni Jehova ang iya posisyon subong Bug-os Uniberso nga Soberano. Bilang isa ka matarong nga Dios, obligado sia nga pamatbatan sila sing kamatayon. (Roma 6:23) Sa una nga tagna sa Biblia, gintagna niya ang kaawayon nga magaluntad sa ulot sang iya mga alagad kag sang mga sumulunod sang “man-ug,” si Satanas. (Bugna 12:9; Genesis 3:15) Sa ulihi,  ini nga kaawayon mahusay paagi sa pagdugmok kay Satanas. (Roma 16:20) Apang ining paghukom magaresulta sa daku nga mga pagpakamaayo para sa matarong nga katawhan, kay madula sa duta ang impluwensia ni Satanas kag mabuksan ang dalan padulong sa isa ka bug-os kalibutan nga paraiso. (Mateo 19:28) Samtang wala pa ini, ang mga nagadampig kay Satanas mangin isa ka padayon nga peligro sa pisikal kag espirituwal nga kaayuhan sang katawhan sang Dios. Kon kaisa, dapat magpasilabot si Jehova.

Naghikot ang Dios Agod Dulaon ang Kalautan

11. Ngaa ginbatyag sang Dios nga obligado sia nga pahanabuon ang isa ka bug-os kalibutan nga anaw?

11 Ang Anaw sang adlaw ni Noe isa ka halimbawa sini nga pagpasilabot. Ang Genesis 6:11, 12 nagasiling: “Ang duta naguba sa itululok sang matuod nga Dios kag ang duta napun-an sing kasingki. Gani nakita sang Dios ang duta kag, yari karon! guba ini, bangod ginguba sang tanan nga unod ang ila dalanon sa duta.” Tugutan bala sang Dios ang mga malauton nga dulaon ang nabilin nga moralidad sa duta? Indi. Obligado si Jehova nga pahanabuon ang isa ka bug-os kalibutan nga anaw agod dulaon sa duta ang mga mahuyugon sa kasingki kag imoralidad.

12. (a) Ano ang gintagna ni Jehova tuhoy sa “binhi” ni Abraham? (b) Ngaa dapat laglagon ang mga Amornon?

12 Amo man sa paghukom sang Dios sa mga Canaanhon. Ginpahayag ni Jehova nga gikan kay Abraham magaabot ang isa ka “binhi” nga paagi sa sini pakamaayuhon sang tanan nga pamilya sang duta ang ila kaugalingon. Nahisanto sa sini nga katuyuan, ginmando sang Dios nga ihatag sa kaliwat ni Abraham ang duta sang Canaan, isa ka duta nga ginapuy-an sang katawhan nga ginatawag mga Amornon. Paano mapakamatarong ang Dios sa pilit nga pagtabog sa sining katawhan gikan sa ila duta? Gintagna ni Jehova nga ang pagtabog indi mahanabo tubtob magligad anay ang mga 400 ka tuig—tubtob “mabug-os ang kasaypanan sang mga Amornon.” * (Genesis 12:1-3; 13:14, 15; 15:13, 16; 22:18) Sa sulod sini nga hut-ong sang tion, labi pa nga naglugdang  ang mga Amornon sa malaut nga moralidad. Ang Canaan nangin isa ka duta sang idolatriya, pagpaagay sing dugo, kag malaw-ay nga mga buhat sa sekso. (Exodo 23:24; 34:12, 13; Numeros 33:52) Ginpatay pa gani sang mga pumuluyo sang duta ang mga bata sa kalayo subong halad. Mahimo bala mapadayag sang isa ka balaan nga Dios ang iya katawhan sa sini nga kalautan? Indi! Sia nagsiling: “Ang duta mahigko, kag silutan ko ini bangod sang kasaypanan sini, kag isuka sang duta ang iya mga pumuluyo.” (Levitico 18:21-25) Apang, wala ginpatay ni Jehova ang katawhan sing patarasak. Ang mga Canaanhon nga may huyog sa pagkamatarong, kaangay ni Rahab kag ang mga Gabaonhon, ginluwas.—Josue 6:25; 9:3-27.

Nagapakig-away Tungod sa Iya Ngalan

13, 14. (a) Ngaa obligado si Jehova nga pakabalaanon ang iya ngalan? (b) Paano gintinluan ni Jehova ang iya ngalan gikan sa kahuy-anan?

13 Bangod balaan si Jehova, ang iya ngalan balaan. (Levitico 22:32) Gintudluan ni Jesus ang iya mga disipulo sa pagpangamuyo: “Pakabalaanon ang imo ngalan.” (Mateo 6:9) Ang pagrebelde sa Eden nagpasipala sa ngalan sang Dios, sa amo ginduhaduhaan ang dungog kag ang paagi sang paggahom sang Dios. Indi gid mahimo nga pabay-an lamang ni Jehova ini nga pasipala kag pagrebelde. Obligado sia nga tinluan ang iya ngalan gikan sa kahuy-anan.—Isaias 48:11.

14 Binagbinaga liwat ang mga Israelinhon. Tubtob mga ulipon sila sa Egipto, ang saad sang Dios kay Abraham nga paagi sa iya Binhi pakamaayuhon sang tanan nga pamilya sang duta ang ila kaugalingon daw walay pulos. Apang paagi sa pagluwas sa ila kag pagtukod sa ila subong isa ka pungsod, gintinluan ni Jehova ang iya ngalan gikan sa kahuy-anan. Sa amo si manalagna Daniel naghinumdom sa iya pangamuyo: “O Jehova nga amon Dios, ikaw nga nagpaguwa sang imo katawhan gikan sa duta sang Egipto paagi sa isa ka gamhanan nga kamot kag naghimo sing ngalan para sa imo kaugalingon.”—Daniel 9:15.

15. Ngaa ginluwas ni Jehova ang mga Judiyo gikan sa pagkabihag sa Babilonia?

15 Sing makawiwili, nangamuyo si Daniel sa amo sini nga paagi sa tion nga kinahanglan sang mga Judiyo nga maghikot liwat si  Jehova tungod sa Iya ngalan. Mga bihag ang malalison nga mga Judiyo, sini nga tion sa Babilonia. Ang ila kapital nga siudad, ang Jerusalem, nagapabilin nga nahapay. Nahibaluan ni Daniel nga ang pagpasag-uli sa mga Judiyo sa ila dutang natawhan magapakadaku sa ngalan ni Jehova. Sa amo, nangamuyo si Daniel: “O Jehova, patawara. O Jehova, talupangda kag maghikot ka. Indi magpalantang, tungod sa imo kaugalingon, O Dios ko, kay ang imo siudad kag ang imo katawhan ginatawag sa imo ngalan.”Daniel 9:18, 19.

Nagapakig-away Para sa Iya Katawhan

16. Ipaathag kon ngaa ang interes ni Jehova sa pagpangapin sa iya ngalan wala nagakahulugan nga sia walay balatyagon kag makagod.

16 Nagakahulugan bala ang interes ni Jehova sa pagpangapin sa iya ngalan nga sia walay balatyagon kag makagod? Indi, kay paagi sa paghikot nahisanto sa iya pagkabalaan kag gugma sa katarungan, ginaamligan niya ang iya katawhan. Binagbinaga ang Genesis kapitulo 14. Mabasa naton diri ang tuhoy sa apat ka nagsalakay nga hari nga nagbihag sa hinablos ni Abraham nga si Lot, upod ang pamilya ni Lot. Sa bulig sang Dios, nalutos ni Abraham ang mas gamhanan nga mga puwersa! Mahimo nga ang kasaysayan sini nga kadalag-an amo ang una nga narekord sa “tulun-an sang Mga Inaway ni Jehova,” mahimo gid isa ka libro nga nagrekord man sang pila ka pagpakig-away nga wala marekord sa Biblia. (Numeros 21:14) Madamo pa nga kadalag-an ang magasunod.

17. Ano ang nagapakita nga nagpakig-away si Jehova para sa mga Israelinhon sa tapos sila makasulod sa duta sang Canaan? Maghatag sing mga halimbawa.

17 Sang manugsulod na ang mga Israelinhon sa duta sang Canaan, ginpasalig sila ni Moises: “Si Jehova nga inyo Dios amo ang magauna sa inyo. Magapakig-away sia para sa inyo suno sa tanan nga ginhimo niya sa inyo sa Egipto.” (Deuteronomio 1:30; 20:1) Sugod sa salili ni Moises, nga si Josue, kag tubtob sa panahon sang mga Hukom kag sang paghari sang matutom nga mga hari sang Juda, nagpakig-away matuod si Jehova tungod sa iya katawhan, sa amo nakatigayon sila sing mga kadalag-an batok sa ila mga kaaway.—Josue 10:1-14; Hukom 4:12-17; 2 Samuel 5:17-21.

18. (a) Ngaa makapasalamat kita nga si Jehova wala magbag-o? (b) Ano ang mahanabo kon ang kaawayon nga ginalaragway sa Genesis 3:15 magadangat sa katapusan sini?

 18 Wala magbag-o si Jehova; ni nagbag-o man ang iya katuyuan nga himuon ini nga planeta nga isa ka malinong nga paraiso. (Genesis 1:27, 28) Ginadumtan gihapon sang Dios ang kalautan. Sa amo man nga tion, ginahigugma gid niya ang iya katawhan kag sa indi madugay magahikot sia para sa ila. (Salmo 11:7) Sa kamatuoran, ang kaawayon nga ginalaragway sa Genesis 3:15 ginapaabot nga magadangat sa isa ka talalupangdon kag masingki nga pagbag-o sang kahimtangan sa malapit nga palaabuton. Agod pakabalaanon ang iya ngalan kag amligan ang iya katawhan, si Jehova sa liwat mangin “isa ka isganan nga mangangaway”!—Zacarias 14:3; Bugna 16:14, 16.

19. (a) Iilustrar kon ngaa bangod ginagamit sang Dios ang iya gahom sa paglaglag mahimo kita mangin suod sa iya. (b) Ano dapat ang mangin epekto sa aton sang kahanda sang Dios sa pagpakig-away?

19 Binagbinaga ang isa ka ilustrasyon: Pananglitan ginasaruso sang isa ka mapintas nga sapat ang pamilya sang isa ka tawo kag dayon nagbato ang tawo kag napatay niya ang mapintas nga sapat. Paabuton mo bala nga magapahilayo ang iya asawa kag ang iya mga anak bangod sini nga buhat? Sa baylo, paabuton mo nga matandog sila kay bangod sang iya gugma gintaya niya ang  iya kabuhi. Sa kaanggid nga paagi, indi kita dapat magpahilayo bangod ginagamit sang Dios ang iya gahom sa paglaglag. Ang iya kahanda sa pagpakig-away agod amligan kita dapat magpadaku pa sang aton gugma sa iya. Dapat man magtudok pa ang aton pagtahod sa iya walay latid nga gahom. Sa amo, makahatag kita sing “sagrado nga pag-alagad sa Dios nga may diosnon nga kahadlok kag kapunaw.”—Hebreo 12:28.

Mangin Suod sa “Isganan nga Mangangaway”

20. Kon makabasa kita sing mga kasaysayan sa Biblia tuhoy sa pagpakig-away sang Dios nga mahimo indi naton mahangpan sing bug-os, ano ang dapat mangin reaksion naton, kag ngaa?

20 Sa pagkamatuod, wala ginapaathag sang Biblia sa tagsa ka hitabo ang tanan nga detalye sang mga desisyon ni Jehova tuhoy sa iya pagpakig-away. Apang pirme naton mapat-od ini: Wala gid ginagamit ni Jehova ang iya gahom sa paglaglag sa isa ka di-makatarunganon, walay kabangdanan, ukon sa mapintas nga paagi. Sa masami, ang pagbinagbinag sa konteksto sang isa ka kasaysayan sa Biblia ukon sang dugang nga impormasyon makabulig sa aton agod mahangpan ang mga butang. (Hulubaton 18:13) Bisan pa wala kita sang tanan nga detalye, ang pagtuon lamang sing dugang pa tuhoy kay Jehova kag ang pagpamalandong sa iya hamili nga mga kinaiya makabulig sa aton agod madula ang bisan anong pagduhaduha nga mahimo mag-utwas. Kon himuon naton ini, marealisar naton nga may yara kita nagakaigo nga rason agod magsalig sa aton Dios, nga si Jehova.—Job 34:12.

21. Bisan pa sia “isa ka isganan nga mangangaway” kon kaisa, ano si Jehova sa iya tagipusuon?

21 Bisan pa si Jehova isa ka “isganan nga mangangaway” kon ginakinahanglan ini sang kahimtangan, wala ini nagakahulugan nga sia palaaway sa iya tagipusuon. Sa palanan-awon ni Ezequiel tuhoy sa langitnon nga kangga, ginalaragway si Jehova nga nakahanda sa pagpakig-away batok sa iya mga kaaway. Apang nakita ni Ezequiel nga napalibutan ang Dios sing isa ka balangaw—isa ka simbulo sang paghidait. (Genesis 9:13; Ezequiel 1:28; Bugna 4:3) Maathag nga si Jehova kalmado kag mahidaiton. “Ang Dios gugma,” sulat ni apostol Juan. (1 Juan 4:8) Ang tanan nga kinaiya ni Jehova balanse gid. Gani, isa gid ka pribilehiyo nga mangin suod kita sa sining gamhanan apang mahigugmaon nga Dios!

^ par. 1 Suno sa Judiyong istoryador nga si Josephus, ang mga Hebreo “ginlagas sang 600 ka kangga upod ang 50,000 ka manugkabayo kag 200,000 ka lupit sa hinganiban nga kasuldadusan.”—Jewish Antiquities, II, 324 [xv, 3].

^ par. 12 Mahimo gid nga ang termino diri nga “mga Amornon” nagalakip sang tanan nga katawhan sang Canaan.—Deuteronomio 1:6-8, 19-21, 27; Josue 24:15, 18.

Magtuon sing Dugang Pa

Adlaw sang Paghukom—Ano Ini?

Tun-i kon paano ang Adlaw sang Paghukom mangin pagpakamaayo sa tanan nga matutom nga tawo.