Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Paano Mangin Malipayon ang Imo Pamilya?

 SEKSION 3

Paano Solbaron ang mga Problema?

Paano Solbaron ang mga Problema?

“Maghigugmaanay kamo sing tudok, bangod ang gugma nagatabon sang madamo nga sala.”1 Pedro 4:8

Sugod sang inyo pag-updanay sang imo tiayon, madamo nga problema ang inyo maatubang. Mahimo bangod ini sang inyo magkatuhay nga panghunahuna, balatyagon, kag pagtamod sa kabuhi. Ukon mahimo nga ang mga problema indi halin sa inyo nga duha kag wala ini ginapaabot.

Daw gusto mo nga likawan ang realidad, pero ginalaygayan kita sang Biblia nga atubangon ang aton mga problema. (Mateo 5:23, 24) Makita mo ang pinakamaayo nga mga solusyon paagi sa pag-­apli­kar sang mga prinsipio sa Biblia.

 1 ISTORYAHI ANG PROBLEMA

ANG GINASILING SANG BIBLIA: “May tion . . . sa paghambal.” (Manugwali 3:1, 7, APD) Pat-ura nga may tion kamo nga istoryahan ang problema. Ipahibalo sa iya kon ano gid ang imo ginabatyag kag ginahunahuna parte sa isa ka butang. “Maghambal [pirme] sang kamatuoran” sa imo tiayon. (Efeso 4:25) Bisan pa nagapanginit ka na, likawi nga mag-away kamo. Ang malulo nga sabat makabulig sa inyo nga ang inyo pag-istoryahanay indi magresulta sa inaway.Hulubaton 15:4; 26:20.

Bisan pa wala kamo nagaugyunay, mangin mainayuhon, kag indi pagkalimti nga magpakita sing gugma kag pagtahod. (Colosas 4:6) Tinguhai nga masolbar dayon ang problema, kag likawi nga indi kamo magbugnuhanay.Efeso 4:26.

ANO ANG MAHIMO MO?

  • Mag-iskedyul sang tion nga istoryahan ang problema

  • Kon nagahambal ang imo tiayon, likawi nga magsamulak kay may tion ka man sa paghambal

 2 PAMATII KAG HANGPA ANG IMO TIAYON

ANG GINASILING SANG BIBLIA: “Magpakita kamo sang mapinalanggaon nga balatyagon sa isa kag isa. Sa pagpadungog sa isa kag isa manguna kamo.” (Roma 12:10) Importante gid kon paano ka nagapamati. Tinguhai nga hangpon ang pagtamod sang imo tiayon kag magpakita sing simpatiya kag pagpaubos. (1 Pedro 3:8; Santiago 1:19) Indi lang magpakunokuno nga nagapamati ka. Kon posible, untati ang imo ginaobra kag magpokus sa iya, ukon pangabaya sia nga istoryahan lang ninyo ini karon. Kabiga sia nga kadampig mo sa baylo nga kontra mo, para indi ka maakig dayon sa iya.Manugwali 7:9.

ANO ANG MAHIMO MO?

  • Pamatii kag hangpa ang imo tiayon bisan pa wala ka nanamian sa imo nabatian

  • Pamatii ang mensahe, indi ang mga tinaga. Talupangda ang iya panghulag kag panghambal

3 HIMUA ANG INYO NADESISYUNAN

ANG GINASILING SANG BIBLIA: “Sa tanan nga pangabudlay may kapuslanan, apang ang hambal sang mga bibig nagapadolong lamang sa kaimolan.” (Hulubaton 14:23) Indi lang bastante nga mag-ugyunay kamo sa isa ka maayo nga solusyon. Dapat himuon ninyo kon ano ang inyo nadesisyunan. Mahimo nga kinahanglan ninyo ini pangabudlayan, pero para man ini sa inyo kaayuhan. (Hulubaton 10:4) Kon magbuligay kamo, “may maayo [kamo] nga balus” sa inyo pagpangabudlay.Manugwali 4:9.

ANO ANG MAHIMO MO?

  • Magdesisyon kon ano ang inyo himuon para masolbar ang inyo problema

  • Pagligad sang tion, hibalua kon nahimo na ninyo ini

Magtuon sing Dugang Pa

MAGMATA!

Paano Mangin Maayo nga Manugpamati?

Ang pagpamati indi lamang isa ka teknik, kundi pagpakita sang gugma. Hibalua kon paano mangin mas maayo nga manugpamati.

MAGMATA!

Paano Malikawan ang Masakit nga Paghambalanay?

Ano ang puede ninyo himuon kon ginaguba na sang masakit nga paghambalanay ang inyo pag-asawahay?

MAGMATA!

Paano Malikawan ang Indi Pagbugnuhanay?

Ngaa ang duha ka tawo nga nanumpa nga maghigugmaanay wala na nagabugnuhanay, kag ano ila mahimo para malikawan ini?