Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Paano Mangin Malipayon ang Imo Pamilya?

 SEKSION 2

Magmatutom sa Isa kag Isa

Magmatutom sa Isa kag Isa

“Ang gintingob sang Dios indi pagbulagon sang tawo.”Marcos 10:9

Ginapatuman sa aton ni Jehova nga mangin mainunungon kag matutom. (Salmo 31:23) Importante gid ini ilabi na sa inyo pag-asawahay bangod kon wala sing katutom, wala man sing pagsalig. Kag ang pagsalig importante para mapalambo ang gugma.

Subong, madamo ang indi matutom sa ila tiayon. Gani agod maamligan ang inyo pag-asawahay, dapat mangin determinado ka nga himuon ang duha ka butang.

 1 UNAHA ANG IMO TIAYON

ANG GINASILING SANG BIBLIA: “[Pat-ura] ninyo ang mas importante nga mga butang.” (Filipos 1:10) Ang inyo pag-asawahay amo ang isa sa pinakaimportante nga butang sa inyo kabuhi. Gani dapat gid ini unahon.

Gusto ni Jehova nga unahon mo ang imo tiayon kag “magkabuhi [kamo] sing malipayon.” (Manugwali 9:9) Maathag nga indi niya gusto nga pabay-an mo ang imo tiayon, kundi, mangita kamo sing paagi nga magmalipayon kamo. (1 Corinto 10:24) Ipabatyag sa iya nga kinahanglan mo sia kag ginaapresyar.

ANO ANG MAHIMO MO?

  • Pat-ura nga mag-updanay kamo pirme sang imo tiayon kag hatagi sia sang imo bug-os nga atension

  • Pamensara pirme nga duha na kamo

 2 BANTAYI ANG IMO TAGIPUSUON

ANG GINASILING SANG BIBLIA: “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.” (Mateo 5:28) Kon ang isa padayon nga nagapamensar sang imoral nga mga butang, daw pareho lang nga indi sia matutom sa iya tiayon.

Nagsiling si Jehova nga dapat mo ‘bantayan ang imo tagiposoon.’ (Hulubaton 4:23; Jeremias 17:9) Para mahimo ini, dapat bantayan mo ang imo mga mata. (Mateo 5:29, 30) Iluga ang halimbawa sang patriarka nga si Job, nga nakigkatipan sa iya mga mata nga indi magtulok nga may kaibog sa isa ka babayi. (Job 31:1) Mangin determinado nga indi gid magtan-aw sing pornograpiya. Kag mamat-od nga indi gid magpakita sing romantiko nga balatyagon sa indi mo tiayon.

ANO ANG MAHIMO MO?

  • Ipakita sa iban nga matutom ka sa imo tiayon

  • Talupangda ang iya balatyagon, kag untati dayon ang pagpakigsuod sa isa kon nasaw-ahan ang imo tiayon

Magtuon sing Dugang Pa

Respetuha ang Imo Tiayon

Paano makakomunikar sing matinahuron ang bana ukon asawa?

Paano Mo Matuman ang Imo Panumpa

Ang panumpa bala daw isa ka gapos nga nagagapos sa imo sa pag-asawahay ukon isa ka angkla nga nagapalig-on sang inyo pag-asawahay?