Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Paano Mangin Malipayon ang Imo Pamilya?

 SEKSION 9

Simbaha si Jehova Subong Pamilya

Simbaha si Jehova Subong Pamilya

“Simbaha ninyo ang Isa nga naghimo sang langit kag sang duta.”Bugna 14:7

Subong sang natun-an mo sa sini nga brosyur, ang Biblia may mga prinsipio nga makabulig sa imo kag sa imo pamilya. Gusto ni Jehova nga mangin malipayon ka. Nagpromisa sia nga kon unahon mo ang pagsimba sa iya, “ini tanan iban pa nga butang idugang sa inyo.” (Mateo 6:33) Gusto gid niya nga mangin abyan mo sia. Tinguhai nga mangin suod nga abyan sang Dios. Amo ini ang pinakadaku mo nga pribilehiyo.Mateo 22:37, 38.

 1 PALIG-UNA ANG IMO KAANGTANAN KAY JEHOVA

ANG GINASILING SANG BIBLIA: “‘Ako mangin inyo amay, kag kamo mangin akon mga anak nga lalaki kag mga anak nga babayi,’ siling ni Jehova.” (2 Corinto 6:18) Gusto sang Dios nga mangin suod ka nga abyan niya. Ang isa ka paagi para mahimo mo ini amo ang pangamuyo. Ginaagda ka ni Jehova nga ‘indi mag-untat sa pagpangamuyo.’ (1 Tesalonica 5:17) Handa sia nga pamatian ang imo mga ginahunahuna kag ginakabalak-an. (Filipos 4:6) Kon nagapangamuyo ka upod sa imo pamilya, makita nila nga matuod gid ang Dios sa imo.

Luwas sa pagpakig-istorya sa Dios, dapat ka man mamati sa iya. Mahimo mo ini paagi sa pagtuon sang iya Pulong kag base sa Biblia nga mga publikasyon. (Salmo 1:1, 2) Pamalandungi ang imo natun-an. (Salmo 77:11, 12) Agod makapamati ka pa gid sa Dios, dapat regular ka man nga magtambong sa Cristiano nga mga pagtilipon.Salmo 122:1-4.

Ang pagpakig-istorya sa iban parte kay Jehova importante man agod maglig-on ang imo kaangtanan sa iya. Kon pirme mo ini ginahimo, magasuod ka pa gid sa iya.Mateo 28:19, 20.

ANO ANG MAHIMO MO?

  • Magpain sing tion kada adlaw nga magbasa sang Biblia kag mangamuyo

  • Subong pamilya, unaha ang espirituwal nga mga hilikuton sangsa paglingawlingaw

2 MAGKASADYA SA INYO PANGPAMILYA NGA PAGSIMBA

ANG GINASILING SANG BIBLIA: “Magpalapit kamo sa Dios, kag magapalapit sia sa inyo.” (Santiago 4:8) Dapat may iskedyul kamo sang regular nga programa sang pangpamilya nga pagsimba kag himua gid ini. (Genesis 18:19) Pero indi lang ini ang inyo himuon. Dapat bahin sang inyo matag-adlaw nga pagkabuhi ang Dios. Palig-una ang kaangtanan sang imo pamilya sa Dios paagi sa pag-istorya parte sa iya kon “nagalingkod ka sa imo balay, kag sa nagalakat ka sa dalanon, kag sa nagahigda ka, kag sa nagabangon ka.” (Deuteronomio 6:6, 7) Iluga si Josue, nga nagsiling: “Nahanungud sa akon kag sa akon panimalay, magaalagad kami sa GINOO.”Josue 24:15.

ANO ANG MAHIMO MO?

  • Padayon nga hanasa ang tagsa ka miembro sang imo pamilya depende sa ila mga kinahanglanon