Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magbalik kay Jehova

 BAHIN KUATRO

Sala—“Tinlui Ako sa Akon Sala”

Sala—“Tinlui Ako sa Akon Sala”

“Nagtin-ad ang pangabuhi sang akon pamilya tungod sa akon bag-o nga trabaho, apang nagdul-ong man ini sa akon sa kwestionable nga mga hilikuton. Nagsugod ako sa pagselebrar sang mga kapiestahan, nag-entra sa mga kahiwatan sang pulitika, kag nagtambong pa gani ako sa simbahan. Di-aktibo ako nga Saksi ni Jehova sa sulod sang 40 ka tuig. Samtang nagadugay, nagadugang man ang akon pagbatyag nga indi na gid ako mapatawad ni Jehova. Pamatyag ko indi ko mapatawad ang akon kaugalingon. Isa pa, nakahibalo ako sang kamatuoran antes ko ginhimo ini.”—Martha.

ANG sala mabug-at gid nga palas-anon. “Ang akon mga sala tagalumapaw,” sulat ni Hari David. “Kaangay sang mabug-at nga palas-anon, indi ko ini masarangan.” (Salmo 38:4) Ang pila ka Cristiano nadaug sang tuman nga kasubo, kag kumbinsido nga indi na gid sila mapatawad ni Jehova. (2 Corinto 2:7) Husto bala nga paghinakop ina? Bisan nakahimo ka sang mabug-at nga mga sala, tuman na bala sa imo kalayo kay Jehova nga indi ka na gid niya mapatawad? Indi, indi gid!

‘Tadlungon Naton ang Inyo Kaangtanan sa Akon’

Wala ginapabay-an ni Jehova ang mahinulsulon nga mga nakasala. Sa katunayan, ginabuligan niya sila! Sa parabola sang buhaha nga anak, ginpaanggid ni Jesus si Jehova sa isa ka mahigugmaon nga amay nga ang anak nagbiya sa iya kag nagpatuyang sa pagkabuhi. Sang ulihi, nagdesisyon ang anak nga magbalik sa ila balay. “Samtang malayo pa sia, nakita sia sang iya amay. Naluoy gid ang iya amay sa iya, gani nagdalagan sia kag ginhakos ang iya anak kag mapinalanggaon nga ginhalukan.” (Lucas 15:11-20) Luyag mo bala nga magpalapit kay Jehova apang nagabatyag ka nga “malayo pa sia” sa imo? Kaangay sang amay sa ilustrasyon ni Jesus, napahulag si Jehova sang iya mapinalanggaon nga kaluoy sa imo. Nalangkag sia nga abiabihon ka sa imo pagbalik.

Pero ano abi kon nagabatyag ka nga ang imo mga sala tuman kabug-at ukon kadamo para patawaron ni Jehova? Palihug binagbinaga ang pangagda ni Jehova nga narekord sa Isaias 1:18: “‘Kari kamo, maghambalanay kita kag buligan ko kamo nga tadlungon ang inyo kaangtanan sa akon,’ siling ni Jehova. ‘Bisan pa ang inyo mga sala mapula, papution ini kaangay sang niebe.’” Huo, mapatawad ni Jehova ang mga sala nga kaangay sang indi mapanas nga pula nga lugom sa puti nga bayo.

Indi luyag ni Jehova nga padayon ka nga paantuson sang natublag nga konsiensia. Kon amo, paano mo maeksperiensiahan ang kaumpawan nga resulta sang pagpatawad sang Dios kag sang matinlo nga konsiensia? Binagbinaga ang duha ka tikang nga ginhimo ni Hari David. Una, nagsiling sia: “Itu-ad ko ang akon mga paglapas kay Jehova.” (Salmo 32:5) Dumduma nga gin-agda ka na ni Jehova nga magpalapit sa iya sa pangamuyo kag buligan ka nga ‘tadlungon ang imo kaangtanan sa iya.’ Batuna ina nga pangagda. Itu-ad ang imo mga sala kay Jehova, kag ibubo ang imo balatyagon sa iya. Base sa iya personal nga eksperiensia, may pagsalig nga nagpangamuyo si David: “Tinlui ako sa akon sala. . . . Ang nagakalisod kag mahinulsulon nga tagipusuon, O Dios ko, indi mo pagsikwayon.”—Salmo 51:2, 17.

Ikaduha, nakabaton sang bulig si David halin sa gintangdo nga tiglawas sang Dios, si manalagna Natan. (2 Samuel 12:13) Subong, nag-aman si Jehova  sang mga gulang sa kongregasyon nga nahanas sa pagbulig sa mahinulsulon nga mga nakasala agod mapasag-uli ang ila pagpakig-abyan kay Jehova. Kon magpalapit ka sa mga gulang, gamiton nila ang Kasulatan kag magapangamuyo sing tinagipusuon agod maumpawan ang imo tagipusuon, mabuhinan ukon makuha ang imo negatibo nga balatyagon, kag magabulig sa imo nga mag-ayo sa espirituwal.—Santiago 5:14-16.

Luyag ni Jehova nga mabatyagan mo ang kaumpawan nga mahatag sang matinlo nga konsiensia

“Malipayon ang Isa nga ang Iya Paglapas Ginpatawad”

Akuon ta, mahimo nga nagabatyag ka nga ang pagtu-ad sang imo mga sala kay Jehova nga Dios kag ang pagpalapit sa mga gulang isa sa pinakamabudlay nga butang nga himuon mo. Maathag nga amo man ang ginabatyag ni David. Wala niya gilayon gintu-ad ang iya mga sala. (Salmo 32:3) Apang sang ulihi naapresyar niya ang mga benepisyo sang pagtu-ad sang iya mga sala kag pagtadlong sang iya dalanon.

Ang daku nga benepisyo kay David amo nga nanumbalik ang iya kalipay. Nagsulat sia: “Malipayon ang isa nga ang iya paglapas ginpatawad, nga ang iya sala ginpatawad.” (Salmo 32:1, footnote) Nangamuyo man sia: “O Jehova, pahambala ako, agod ipahayag ko ang imo kadayawan.” (Salmo 51:15) Bangod naumpawan si David sa iya sala kag mapinasalamaton sa pagpatawad sang Dios, napahulag sia nga isugid sa iban ang parte kay Jehova.

Luyag ni Jehova nga mabatyagan mo ang kaumpawan nga mahatag sang matinlo nga konsiensia. Kag luyag niya nga sugiran mo ang iban parte sa iya kag sa iya mga katuyuan, indi bangod sang natublag nga konsiensia, kundi sang pagkasinsero kag tudok nga kalipay. (Salmo 65:1-4) Dumduma ang iya pangagda nga “magbag-o agod mapatawad ang inyo mga sala, agod mag-abot ang mga tion sang kaumpawan halin kay Jehova.”—Binuhatan 3:19.

Amo sina ang natabo kay Martha. Nagsaysay sia: “Padayon ako nga ginapadalhan sang akon anak nga lalaki sang Lalantawan kag Magmata! nga mga magasin. Amat-amat ko nga nakilala liwat si Jehova. Ang pinakamabudlay nga bahin sang pagpanumbalik amo ang pagpangayo sang kapatawaran sa tanan nga sala nga nahimo ko. Apang sang ulihi, nagpalapit ako sa Dios sa pangamuyo kag nangayo sa iya sang patawad. Mabudlay patihan nga nagligad ang 40 ka tuig antes ako nakabalik kay Jehova. Buhi ako nga pamatuod nga bisan pa tuman na kadugay, ang isa mahimo hatagan sang isa pa ka kahigayunan nga mag-alagad sa Dios kag makapanumbalik sa iya gugma.”