Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Maayong Balita Halin sa Dios!

 LEKSION 5

Ano ang Katuyuan sang Dios Para sa Duta?

Ano ang Katuyuan sang Dios Para sa Duta?

1. Ngaa gintuga sang Dios ang duta?

Gintuga ni Jehova ang duta para sa mga tawo. Aton ini puluy-an. Wala gintuga ang una nga mag-asawa, si Adan kag si Eva, para mag-istar sa langit—gintuga sang Dios ang mga anghel para mag-istar didto. (Job 38:4, 7) Sa baylo, ginbutang sang Dios ang una nga tawo sa matahom nga paraiso nga ginatawag hardin sang Eden. (Genesis 2:15-17) Ginhatagan ni Jehova si Adan kag ang iya mangin kaliwat sing kahigayunan nga mabuhi sing wala katapusan sa duta.Basaha ang Salmo 37:29; 115:16.

Sang primero, ang hardin sang Eden lang ang paraiso. Pun-on sang una nga mag-asawa ang duta sang ila kaliwat. Sa ulihi, dumalahan nila ang bug-os nga duta kag himuon ini nga paraiso. (Genesis 1:28) Indi gid maguba ang duta. Magapabilin ini nga puluy-an sang mga tawo.Basaha ang Salmo 104:5.

2. Ano ang rason ngaa indi paraiso ang duta subong?

Ginlalis nanday Adan kag Eva ang Dios, gani ginpahalin sila ni Jehova sa hardin. Nadula ang paraiso, kag wala sing tawo nga nakapasag-uli sini. Ang Biblia nagsiling: “Ang duta gintugyan sa malauton.”—Job 9:24.Basaha ang Genesis 3:23, 24.

Indi na bala pagdayunon ni Jehova ang iya orihinal nga katuyuan para sa katawhan? Dayunon niya ini! Labing gamhanan sia. Indi gid sia mapaslawan. (Isaias 45:18) Tumanon niya ang iya orihinal nga katuyuan para sa katawhan.Basaha ang Salmo 37:11, 34.

3. Paano ipasag-uli ang Paraiso?

Ipasag-uli ang Paraiso sa duta sa tion nga maggahom si Jesus, ang ginpili sang Dios nga Hari. Sa inaway nga ginatawag Armageddon, pangunahan ni Jesus ang mga anghel sang Dios sa paglaglag sa tanan nga nagarebelde sa Dios. Dayon bilangguon  ni Jesus si Satanas sa sulod sang 1,000 ka tuig. Ang katawhan sang Dios maluwas sa kalaglagan bangod buligan sila kag amligan ni Jesus. Magakabuhi sila sa Paraiso sa duta sing wala katapusan.Basaha ang Bugna 20:1-3; 21:3, 4.

4. San-o madula ang pag-antos?

San-o dulaon sang Dios ang kalautan sa duta? Naghatag si Jesus sing “tanda” nga magapakita nga malapit na ang katapusan. Ang kahimtangan sang kalibutan karon nagahalit sa mga tawo kag nagapakita ini nga nagakabuhi na kita sa “hingapusan sang sistema sang mga butang.”Basaha ang Mateo 24:3, 7-14, 21, 22.

Sa sulod sang 1,000 ka tuig nga paggahom ni Jesus sa langit, dulaon niya ang tanan nga pag-antos sa duta. (Isaias 9:6, 7; 11:9) Indi lamang sia isa ka Hari kundi isa man ka Mataas nga Saserdote nga magadula sa mga sala sang mga nagahigugma sa Dios. Gani paagi kay Jesus, dulaon sang Dios ang balatian, pagtigulang, kag kamatayon.Basaha ang Isaias 25:8; 33:24.

5. Sin-o ang magaistar sa palaabuton nga Paraiso?

Sa Kingdom Hall, makilala mo ang mga nagahigugma sa Dios kag gusto makatuon kon paano sia mapahamut-an

Ang mga nagatuman sa Dios amo ang magaistar sa Paraiso. (1 Juan 2:17) Ginsugo ni Jesus ang iya mga sumulunod nga pangitaon ang mahagop nga mga tawo kag tudluan sila kon paano mangin kalahamut-an sa Dios. Sa karon, ginahanda ni Jehova ang minilyon ka tawo agod magkabuhi sa palaabuton nga Paraiso sa duta. (Sofonias 2:3) Sa Kingdom Hall sang mga Saksi ni Jehova, matun-an sang mga tawo nga mangin mas maayo nga bana kag amay, kag mangin mas maayo nga asawa kag iloy. Ang mga kabataan kag mga ginikanan ululupod nga nagasimba kag nagatuon kon paano makabenepisyo sa maayong balita.Basaha ang Miqueas 4:1-4.

 

Magtuon sing Dugang Pa

Ano ang Katuyuan sang Dios Para sa Duta?

Matuman bala ang katuyuan sang Dios nga mangin paraiso ang duta? Kon huo, san-o?