Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Maayong Balita Halin sa Dios!

 LEKSION 12

Paano Ka Mangin Suod sa Dios?

Paano Ka Mangin Suod sa Dios?

1. Ginapamatian bala sang Dios ang tanan nga pangamuyo?

Ginaagda ni Jehova ang tanan nga sahi sang tawo nga magpalapit sa iya paagi sa pangamuyo. (Salmo 65:2) Pero indi tanan nga pangamuyo ginapamatian ukon ginabaton niya. Halimbawa, kon ginamaltratar sang bana ang iya asawa, masablagan ang iya pangamuyo. (1 Pedro 3:7) Sang padayon nga naghimo sing malain ang mga Israelinhon, wala ginpamatian sang Dios ang ila mga pangamuyo. Maathag nga ang pangamuyo isa gid ka pribilehiyo. Apang ginapamatian sang Dios ang pangamuyo bisan sang mga nakasala sing mabug-at kon maghinulsol sila.Basaha ang Isaias 1:15; 55:7.

2. Paano kita dapat mangamuyo?

Ang pangamuyo bahin sang aton pagsimba, gani mangamuyo lamang kita sa aton Manunuga, si Jehova. (Mateo 4:10; 6:9) Isa pa, bangod indi kita perpekto, dapat kita mangamuyo sa ngalan ni Jesus bangod napatay sia para sa aton mga sala. (Juan 14:6) Indi gusto ni Jehova nga sulitsuliton naton ang saulado ukon nasulat nga mga pangamuyo. Gusto niya nga mangamuyo kita sing tinagipusuon.Basaha ang Mateo 6:7; Filipos 4:6, 7.

Mabatian sang aton Manunuga bisan ang hipos nga mga pangamuyo. (1 Samuel 1:12, 13) Ginaagda niya kita nga mangamuyo sa tanan nga tion, magbugtaw man kita, magtulog, magkaon, kag kon may mga problema.Basaha ang Salmo 55:22; Mateo 15:36.

3. Ngaa may pagtilipon ang mga Cristiano?

Indi mahapos nga makigsuod sa Dios bangod napalibutan kita sang mga tawo nga wala sing pagtuo sa Dios kag nagayubit sa iya saad nga paghidait sa duta. (2 Timoteo 3:1, 4; 2 Pedro 3: 3, 13) Gani kinahanglan naton ang nagapalig-on nga pagpakig-upod sa mga masigkatumuluo, kag kinahanglan man nila kita.Basaha ang Hebreo 10:24, 25.

Mabuligan ka nga mangin suod sa Dios kon makig-upod ka sa mga tawo nga nagahigugma sa iya. Ang mga pagtilipon sang mga Saksi ni Jehova nagahatag sing kahigayunan nga mapalig-on ka sang pagtuo sang iban.Basaha ang Roma 1:11, 12.

4. Paano ka mangin suod sa Dios?

Mangin suod ka kay Jehova kon pamalandungan mo ang imo natun-an sa iya Pulong. Pamalandungi ang iya mga hinimuan, ang iya laygay, kag ang iya mga saad. Paagi sa pagpamalandong upod ang pangamuyo, mahangpan mo ang gugma kag kaalam sang Dios.Basaha ang Josue 1:8; Salmo 1:1-3.

Mangin suod ka lamang sa Dios kon magsalig ka kag magtuo sa iya. Pero ang pagtuo kaangay sang buhi nga mga butang nga kinahanglan atipanon. Dapat mo man pirme atipanon ang imo pagtuo paagi sa pagpamalandong sang imo mga pagpati.Basaha ang Mateo 4:4; Hebreo 11:1, 6.

5. Paano ka makabenepisyo sa pagpakigsuod sa Dios?

Ginaulikdan ni Jehova ang mga nagahigugma sa iya. Ginaproteksionan niya sila batok sa mga butang nga makahalit sa ila pagtuo kag paglaum nga kabuhi nga wala sing katapusan. (Salmo 91:1, 2, 7-10) Ginapaandaman niya kita batok sa mga paggawi nga makahalit sa aton panglawas kag makadula sang aton kalipay. Ginatudluan kita ni Jehova sang pinakamaayo nga paagi sang pagkabuhi.Basaha ang Salmo 73:27, 28; Santiago 4:4, 8.

 

Magtuon sing Dugang Pa

Ngaa Dapat Tun-an ang Biblia?

Minilyon karon sa bilog nga kalibutan ang nakakita sang sabat sa importante nga mga pamangkot sa kabuhi sa bulig sang Biblia. Gusto mo man bala?

Mangin Malapit sa Dios Paagi sa Pangamuyo

Nagapamati bala ang Dios kon mangamuyo ka? Para masabat ini, dapat nga maintiendihan mo ang ginatudlo sang Biblia parte sa pangamuyo.