Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Maayong Balita Halin sa Dios!

 LEKSION 7

Ano ang Ginharian sang Dios?

Ano ang Ginharian sang Dios?

1. Ano ang Ginharian sang Dios?

Ngaa si Jesusang nagakabagay nga Hari?—MARCOS 1:40-42.

Ang Ginharian sang Dios isa ka gobierno sa langit. Buslan sini ang tanan nga gobierno kag ipatuman sini ang kabubut-on sang Dios sa langit kag sa duta. Ang balita parte sa Ginharian sang Dios maayo gid nga balita. Sa indi madugay, ihatag sang Ginharian sang Dios ang maayo nga gobierno nga ginahandum sang mga tawo. Paagi sini, mahiusa ang tanan nga tawo sa duta.Basaha ang Daniel 2:44; Mateo 6:9, 10; 24:14.

Dapat may hari ang isa ka ginharian. Gintangdo ni Jehova ang iya Anak, si Jesucristo, nga mangin Hari sang Iya Ginharian.Basaha ang Bugna 11:15.

2. Ngaa si Jesus ang nagakabagay nga Hari?

Nagakabagay gid nga Hari ang Anak sang Dios kay maluluy-on sia kag nagapanindugan kon ano ang husto. (Juan 1:14) Masarangan gid niya buligan ang mga tawo bangod gamhan niya ang duta halin sa langit. Sang nabanhaw sia, nagkayab sia sa langit kag naghulat nga nagapungko sa tuo ni Jehova. (Hebreo 10:12, 13) Sang ulihi, ginhatagan sia sang Dios sing awtoridad nga magsugod sa paggahom.Basaha ang Daniel 7:13, 14.

3. Sin-o ang kaupod ni Jesus nga magagahom?

Ang isa ka grupo nga gintawag “mga balaan,” magagahom upod kay Jesus sa langit. (Daniel 7:27) Ang una nga mga balaan nga ginpili amo ang matutom nga mga apostoles ni Jesus. Asta subong padayon nga nagapili si Jehova sing matutom nga mga lalaki kag babayi nga malakip sa sining mga balaan. Pareho kay Jesus, ginabanhaw sila nga may espirituwal nga lawas.Basaha ang Juan 14:1-3; 1 Corinto 15:42-44.

 Pila ka tawo ang makadto sa langit? Gintawag sila ni Jesus nga “diutay nga panong.” (Lucas 12:32) May kadamuon sila nga 144,000. Magagahom sila sa duta upod kay Jesus.Basaha ang Bugna 14:1.

4. Ano ang natabo sang nagsugod sa paggahom si Jesus?

Ang Ginharian sang Dios nagsugod sa paggahom sang 1914. * Ang una nga ginhimo ni Jesus bilang Hari amo ang pagtagbong kay Satanas kag sa iya mga demonyo sa duta. Naakig gid si Satanas kag gingamo niya ang bilog nga duta. (Bugna 12:7-10, 12) Halin sadto, naglala pa gid ang kahimtangan sang mga tawo. Ang mga inaway, gutom, balatian, kag linog, bahin tanan sang “tanda” nga malapit na dumalahan sang Ginharian ang duta.Basaha ang Lucas 21:7, 10, 11, 31.

5. Ano ang ginahimo sang Ginharian sang Dios?

Paagi sa pagbantala sa bug-os nga duta, ginahiusa na sang Ginharian sang Dios ang dakung kadam-an sang mga tawo halin sa tanan nga pungsod. Minilyon ka mahagop nga tawo ang mangin sakop ni Jesus. Proteksionan sila sang Ginharian sang Dios kon laglagon sini ang malaut nga sistema sang mga butang sa duta karon. Gani ang tanan nga gusto nga makatigayon sang pagpakamaayo sang Ginharian sang Dios dapat magtuon nga mangin matinumanon nga sakop ni Jesus.Basaha ang Bugna 7:9, 14, 16, 17.

Sa sulod sang 1,000 ka tuig, himuon sang Ginharian ang orihinal nga katuyuan sang Dios para sa mga tawo. Ang bug-os nga duta mangin paraiso. Sa katapusan, itugyan ni Jesus ang Ginharian sa iya Amay. (1 Corinto 15:24-26) May kilala ka bala nga gusto mo sugiran parte sa Ginharian sang Dios?Basaha ang Salmo 37:10, 11, 29.

 

^ par. 6 Para sa mga detalye kon paano gintagna sang Biblia ang tuig 1914, basaha ang pahina 247-249 sang libro nga Ano Gid ang Ginatudlo sang Biblia?

Magtuon sing Dugang Pa

Nagakabuhi Bala Kita sa “Katapusan nga mga Adlaw”?

Binagbinaga kon paano ang ginahimo kag batasan sang mga tawo sa palibot naton nangin ebidensia nga nagakabuhi kita subong sa “katapusan nga mga adlaw” nga gintagna sang Biblia.

Paano Ginaorganisar sang mga Saksi ni Jehova ang Ila Hilikuton nga Pagbantala?

Ginasunod namon ang sulundan nga ginbilin ni Jesus sang ari sia sa duta. Ano ang pila sang iya paagi sa pagbantala?