Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Sin-o ang Nagahimo sang Kabubut-on ni Jehova Subong?

 Leksion 3

Paano ang Kamatuoran sa Biblia Nasapwan Liwat?

Paano ang Kamatuoran sa Biblia Nasapwan Liwat?

Mga Estudyante sang Biblia, katuigan 1870

Una nga gua sang Ang Lalantawan, 1879

Ang Lalantawan subong

Gintagna sang Biblia nga sa tapos mapatay si Jesus, magaluntad ang butig nga mga manunudlo sa tunga sang unang siglo nga mga Cristiano kag magapatiko sang kamatuoran sa Biblia. (Binuhatan 20:29, 30) Sang ulihi, amo gid sini ang natabo. Ginsamuan nila ang mga panudlo ni Jesus sang pagano nga mga panudlo, kag nagluntad ang di-matuod nga mga Cristiano. (2 Timoteo 4:3, 4) Paano namon napat-od subong nga husto ang amon paghangop sa kon ano gid ang ginatudlo sang Biblia?

Nag-abot ang tion nga ginpahayag ni Jehova ang kamatuoran. Gintagna niya nga ‘sa tion sang katapusan magadugang ang ihibalo.’ (Daniel 12:4) Sang 1870, natun-an sang isa ka gamay nga grupo nga nagapangita sang kamatuoran nga madamo nga doktrina sang simbahan ang wala nabase sa Biblia. Gani, gin-usisa nila ang orihinal nga mga panudlo sang Biblia, kag ginbuligan sila ni Jehova nga mahangpan ini.

Gintun-an sing maayo sang sinsero nga mga tawo ang Biblia. Ang maukod nga mga Estudyante sang Biblia, ang pagtawag sa amon sadto, naggamit sing pamaagi sang pagtuon nga ginagamit man namon subong. Gintun-an nila ang Biblia sing topiko por topiko. Kon may mabasahan sila nga mabudlay intiendihon, ginapangita nila sa iban nga bersikulo ang paathag sini. Kon ang ila paghangop nagasanto sa iban nga teksto sa Biblia, ginasulat nila ini. Paagi sa pagpaathag mismo sang Biblia, nasapwan nila liwat ang kamatuoran parte sa ngalan sang Dios, sa iya Ginharian, sa iya katuyuan para sa mga tawo kag sa duta, sa kahimtangan sang mga patay, kag sa paglaum nga pagkabanhaw. Bangod sini nahilway sila sa butig nga mga panudlo kag mga buhat.—Juan 8:31, 32.

Sang 1879, narealisar sang mga Estudyante sang Biblia nga dapat ipalapnag na ang kamatuoran. Gani sa sina nga tuig, ginsugdan nila ang paghimo sang magasin nga Ang Lalantawan Nagabantala sang Ginharian ni Jehova nga ginahimo namon gihapon subong. Karon, ginasugid namon ang kamatuoran sa Biblia sa 239 ka kadutaan kag sa mga 700 ka lenguahe. Nangin bugana na gid ang matuod nga ihibalo subong!

  • Sang mapatay si Jesus, ano ang natabo sa kamatuoran sa Biblia?

  • Paano ang kamatuoran sa Pulong sang Dios nasapwan liwat?