Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Sin-o ang Nagahimo sang Kabubut-on ni Jehova Subong?

 Leksion 28

Ano ang Makita sa Amon Web Site?

Ano ang Makita sa Amon Web Site?

Pransia

Poland

Rusya

Ginsilingan ni Jesucristo ang iya mga sumulunod: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.” (Mateo 5:16) Para mahimo ini, ginagamit namon ang moderno nga teknolohiya, lakip na ang Internet. Ang amon Web site nga jw.org amo ang opisyal nga kuluhaan sing impormasyon parte sa mga ginapatihan kag hilikuton sang mga Saksi ni Jehova. Ano ang makita mo diri?

Mga sabat sang Biblia sa kinaandan nga mga pamangkot. Mahimo mo mahibaluan ang sabat sang pila ka importante nga pamangkot sang mga tawo. Ang anom sa sini ginsabat sang tract nga Luyag Mo Bala Mahibaluan ang Kamatuoran? nga mabasa sa Internet sa sobra 400 ka lenguahe. Makita mo man ang New World Translation sa sobra 100 ka lenguahe kag ang pila ka bulig sa pagtuon sa Biblia, pati na ang libro nga Ano Gid ang Ginatudlo Sang Biblia? kag ang bag-o nga mga isyu sang Ang Lalantawan kag Magmata! Madamo sa sini nga publikasyon ang puede basahon, pamatian, ukon i-download sa mga format nga audio, PDF, ukon EPUB. Puede mo gani ini i-print kag ipabasa sa interesado nga tawo sa iya lenguahe. May ara man mga video sa madamo nga sign language. Ma-download man ang audio drama sang pagbasa sa Biblia, drama sa Biblia, kag matahom nga mga musika.

Matuod nga impormasyon parte sa mga Saksi ni Jehova. Makita man diri ang pinakabag-o nga balita kag mga video clip parte sa amon bug-os kalibutan nga hilikuton, mga hitabo nga nakaapektar sa mga Saksi ni Jehova, kag ang amon pagbulig sa mga biktima sang kalamidad. Makita mo man ang iskedyul sang nagahilapit nga mga kombension kag pila ka impormasyon parte sa amon mga sanga talatapan.

Paagi sini, ginapaiwag namon ang kapawa sang kamatuoran asta sa pinakamalayo nga bahin sang duta. Nagabenepisyo ang mga tawo sa tanan nga kontinente, lakip na sa Antarctica. Ginapangamuyo namon nga “ang pulong ni Jehova padayon nga maglapnag sing madasig” sa bug-os nga kalibutan, para sa kahimayaan sang Dios.—2 Tesalonica 3:1.

  • Paano ang jw.org nagabulig sa madamo nga tawo nga matun-an ang kamatuoran sa Biblia?

  • Ano ang gusto mo mahibaluan sa amon Web site?