Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 18

Magadugang si Jesus Samtang Magabuhin si Juan

Magadugang si Jesus Samtang Magabuhin si Juan

MATEO 4:12 MARCOS 6:17-20 LUCAS 3:19, 20 JUAN 3:22–4:3

  • NAGPANGBAWTISMO ANG MGA DISIPULO NI JESUS

  • NAPRISO SI JUAN NGA MANUGBAWTISMO

Pagkatapos masaulog ang Paskua sang tigpamulak sang 30 C.E., nagbiya si Jesus kag ang iya mga disipulo sa Jerusalem. Pero wala sila nagpauli dayon sa Galilea. Nagkadto sila sa Judea diin madamo sila sing ginbawtismuhan. Mga isa na ka tuig nga amo man sini ang ginahimo ni Juan nga Manugbawtismo, kag kaupod niya gihapon ang pila niya ka disipulo, mahimo sa nalupyakan sang Suba Jordan.

Wala sing ginbawtismuhan si Jesus, kundi ang mga disipulo lang niya sa idalom sang iya panuytoy. Sa sini nga tion sang pagministeryo ni Jesus, pareho sila ni Juan nga nagapanudlo sa mga Judiyo nga nagahinulsol sang ila mga sala batok sa katipan sang Kasuguan sang Dios.—Binuhatan 19:4.

Pero nahisa ang mga disipulo ni Juan, kag nagreklamo sila parte kay Jesus: “Ang tawo [nga si Jesus] nga nagkadto sa imo . . . nagapangbawtismo na kag ang tanan nga tawo nagakadto sa iya.” (Juan 3:26) Pero wala nahisa si Juan. Nalipay sia nga nagmadinalag-on si Jesus kag gusto niya nga malipay man ang iya mga disipulo. Ginpahanumdom niya sila: “Kamo mismo nakabati nga nagsiling ako, ‘Indi ako ang Cristo, kundi ginpadala ako sing una sa iya.’” Gin-ilustrar niya ini nga punto sa paagi nga mahangpan nila tanan: “Ang nobya para sa nobyo. Apang nalipay gid ang abyan sang nobyo nga nagatindog malapit sa iya kon mabatian niya ang iya tingog. Gani daku gid ang akon kalipay.”—Juan 3:28, 29.

Nalipay gid si Juan mga pila ka bulan ang nagligad, kaangay sang abyan sang nobyo, sang ginpakilala niya kay Jesus ang iya mga disipulo. Ang pila sa ila nagsunod kay Jesus kag sa ulihi haplasan sang balaan nga espiritu. Gusto man ni Juan nga magsunod kay Jesus ang iya mga disipulo. Ang matuod, katuyuan ni Juan nga ihanda ang dalan para sa ministeryo sang Cristo. Si Juan nagpaathag: “Padayon sia nga magadugang, apang ako padayon nga magabuhin.”—Juan 3:30.

Ang isa pa ka Juan, nga nangin sumulunod ni Jesus, nagsulat sang ulihi parte sa ginhalinan ni Jesus kag sa iya importante nga papel sa kaluwasan sang katawhan: “Ang isa nga naghalin sa ibabaw labaw sa tanan. . . . Ginahigugma sang Amay ang Anak kag gintugyan sa iya ang tanan nga butang. Ang isa nga nagatuo sa Anak makatigayon sang kabuhi nga wala sing katapusan; ang isa nga wala nagatuman sa Anak indi makatigayon sang kabuhi, kundi ang kasingkal sang Dios magapabilin sa iya.” (Juan 3:31, 35, 36) Importante gid ini nga kamatuoran nga dapat mahibaluan sang katawhan!

Wala madugay sang ginhambal ni Juan nga Manugbawtismo nga magabuhin ang iya papel kag hilikuton, gindakop sia ni Hari Herodes. Ginpangasawa ni Herodes si Herodias nga asawa sang iya utod nga si Felipe. Sang ginbuyagyag ni Juan ang iya pagpanghilahi, ginpapriso sia ni Herodes. Sang nabatian ni Jesus nga gindakop si Juan, nagbiya sia kag ang iya mga disipulo sa Judea kag ‘nagkadto sa Galilea.’—Mateo 4:12; Marcos 1:14.