Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 83

Imbitasyon Para Magkaon—Sin-o ang Ginaagda sang Dios?

Imbitasyon Para Magkaon—Sin-o ang Ginaagda sang Dios?

LUCAS 14:7-24

  • LEKSION PARTE SA PAGPAUBOS

  • NAGPAMALIBAD ANG GIN-AGDA NGA MGA BISITA

Pagkatapos gin-ayo ang tawo nga nagapalanghubawhubaw, yara gihapon si Jesus sa balay sang Fariseo. Naobserbahan ni Jesus nga ang iban nga bisita nagapili sang pulungkuan sa kalan-an para sa mga dungganon, kag gingamit niya ini nga kahigayunan nga magtudlo sang leksion parte sa pagpaubos.

“Kon may mag-agda sa imo sa punsion sa kasal,” siling ni Jesus, “indi ka magpungko sa pulungkuan nga para sa dungganon nga mga bisita. Basi may gin-agda sia nga mas dungganon pa sa imo. Dayon ang nag-agda sa inyo magapalapit kag magasiling sa imo, ‘Ihatag ina nga pulungkuan sa sini nga tawo.’ Gani mahuy-an ka kag magasaylo sa pulungkuan para sa pinakakubos nga mga bisita.”—Lucas 14:8, 9.

Nagsiling dayon si Jesus: “Kon gin-agda ka, magpungko ka sa pulungkuan para sa mga pinakakubos, agod kon mag-abot ang nag-agda sa imo, magasiling sia sa imo, ‘Abyan, magsaylo ka sa pulungkuan para sa mga dungganon.’ Gani mapadunggan ka sa atubangan sang tanan nga bisita.” Indi lamang ini pagpakita sing maayo nga batasan. Si Jesus nagpaathag: “Kay ang tanan nga nagapakataas sang iya kaugalingon paubson, kag ang nagapaubos sang iya kaugalingon pakataason.” (Lucas 14:10, 11) Huo, ginapalig-on niya ang iya mga tagpalamati nga palambuon ang pagkamapainubuson.

Nagsambit si Jesus sang isa pa ka leksion para sa Fariseo nga nag-agda sa iya—kon paano magpakaon nga ginakahamut-an sang Dios. “Kon maghanda ka sang panyaga ukon panihapon, indi pag-agdaha ang imo mga abyan ukon ang imo mga utod ukon ang imo mga paryente ukon ang imo mga kasilingan nga manggaranon. Basi agdahon ka man nila, kag mabaton mo ang imo balos. Apang kon maghanda ka sang sinalusalo, agdaha ang imol, ang baldado, ang piang, ang bulag; kag mangin malipayon ka, bangod wala sila sing ibalos sa imo.”—Lucas 14:12-14.

Natural lamang nga agdahon ang mga abyan, paryente, ukon mga kasilingan sa pagkaon, kag wala nagasiling si Jesus nga sayop ini. Pero ginpadaku niya nga ang pagpakaon sa mga kubos, pareho sang imol, piang, ukon bulag, magaresulta sa bugana nga pagpakamaayo. Si Jesus nagpaathag sa nag-agda sa iya: “Mabaton mo ang imo balos sa pagkabanhaw sang mga matarong.” Nag-ugyon ang isa man ka bisita: “Malipayon ang magakaon sa Ginharian sang Dios.” (Lucas 14:15) Nahangpan niya nga pribilehiyo gid ini. Pero, indi tanan ang may amo sina nga apresasyon, subong sang padayon nga gin-ilustrar ni Jesus:

“May isa ka tawo nga naghanda sang engrande nga panihapon, kag madamo ang iya gin-agda. . . . Ginsugo niya ang iya ulipon nga tawgon na ang mga gin-agda, ‘Kari kamo, kay handa na ang panihapon.’ Apang tanan sila nagpamalibad. Ang nahauna nagsiling sa iya, ‘Nakataba ako sang uma kag kinahanglan nga kadtuan ko ini kag tan-awon; gani pasensiaha lang anay ako.’ Ang isa pa nagsiling, ‘Nakabakal ako sang lima ka paris nga baka kag malakat ako agod tan-awon ini; gani pasensiaha lang anay ako.’ Ang isa pa gid nagsiling, ‘Bag-o lang ako makasal kag bangod sini, indi ako makakadto.’”—Lucas 14:16-20.

Indi ini makatarunganon nga mga balibad! Kinaandan na nga ginausisa anay sang isa ang uma ukon sapat antes ini baklon, gani indi na hilingagawon nga tan-awon ini pagkatapos bakal. Ang ikatlo nga tawo wala nagahanda sa pagpakasal. Kasado na sia, gani indi ini dapat magpugong sa iya sa pagbaton sang importante nga imbitasyon. Sa pagkabati sini nga mga balibad, naakig ang agalon kag ginsilingan ang iya ulipon:

“Magkadto ka sa mayor nga mga dalan kag sa mga alagyan sang siudad, kag dalha diri ang imol kag baldado kag bulag kag piang.” Sang natuman na ini sang ulipon, may lugar pa. Gani ang agalon nagsiling sa ulipon: “Magkadto ka sa mga dalan kag sa mga alagyan, kag pilita sila sa pagkari agod mapuno ang akon balay. Kay nagasiling ako sa inyo, wala gid sing bisan isa sa mga tawo nga gin-agda ko ang makatilaw sang akon ginhanda nga panihapon.”—Lucas 14:21-24.

Ang ginsugid ni Jesus bag-o lang nagailustrar sing maayo kon paano si Jehova nga Dios nagsugo kay Jesucristo nga mag-agda sang mga indibiduwal para mangin bahin sang Ginharian sang langit. Ang mga Judiyo, ilabi na ang mga lider sang relihion, amo ang una nga gin-agda. Kalabanan sa ila nagsikway sang imbitasyon sa bug-os nga ministeryo ni Jesus. Pero indi lang sila ang imbitahon. Maathag nga ginapahangop ni Jesus nga may ikaduha nga imbitasyon sa palaabuton para sa mga kubos sa pungsod sang mga Judiyo kag sa mga proselita. Pagkatapos sini, may ikatlo pa kag katapusan nga imbitasyon para sa mga tawo nga ginatamod sang mga Judiyo nga indi takus sa panulok sang Dios.—Binuhatan 10:28-48.

Huo, ang ginsiling ni Jesus nagsakdag sa ginhambal sang isa ka kaupod man nga bisita: “Malipayon ang magakaon sa Ginharian sang Dios.”

Magtuon sing Dugang Pa

Ano ang Ginharian sang Dios?

Sin-o ang Hari sang Ginharian sang Dios, kag ano ang ginahimo sang Ginharian?