Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 90

“Ang Pagkabanhaw kag ang Kabuhi”

“Ang Pagkabanhaw kag ang Kabuhi”

JUAN 11:17-37

  • NAG-ABOT SI JESUS SANG PATAY NA SI LAZARO

  • “ANG PAGKABANHAW KAG ANG KABUHI”

Halin sa Perea, nag-abot si Jesus sa dulunan sang Betania, isa ka baryo nga mga tatlo ka kilometro sa sidlangan sang Jerusalem. Nagapangasubo ang mga utod ni Lazaro nga sanday Maria kag Marta sa pagkapatay sini bag-o lang. Madamo ang nagkadto para lugpayan sila.

May nagsugid kay Marta nga manug-abot si Jesus, kag dalidali sia nga nagsugata sa iya. Ginsilingan ni Marta si Jesus sang mahimo ginahunahuna nila sang iya utod sa sulod sang apat ka adlaw: “Ginuo, kon diri ka lang, wala kuntani mapatay ang akon utod.” Pero indi buot silingon nga wala sia sing paglaum. “Nagapati . . . ako nga bisan ano ang pangayuon mo sa Dios ihatag niya ini sa imo,” siling ni Marta. (Juan 11:21, 22) Nagapati sia nga mabuligan gihapon ni Jesus ang iya utod.

Nagsiling si Jesus sa iya: “Ang imo utod mabanhaw.” Naghunahuna si Marta nga ang ginapatuhuyan ni Jesus amo ang pagkabanhaw sa palaabuton sa duta, ang paglaum ni Abraham kag sang iban pa. Kag ginpabutyag niya nga nagapati sia nga matabo gid ini: “Nakahibalo ako nga mabanhaw sia sa tion sang pagkabanhaw sa katapusan nga adlaw.”—Juan 11:23, 24.

Pero may mahatag bala nga paumpaw si Jesus sa sini nga tion? Ginpahanumdom niya si Marta nga ginhatagan sia sang Dios sing gahom batok sa kamatayon, kay sia nagsiling: “Ang isa nga nagatuo sa akon bisan pa mapatay, mabuhi liwat; kag ang tanan nga nagakabuhi kag nagatuo sa akon indi na gid mapatay.”—Juan 11:25, 26.

Indi buot silingon ni Jesus nga ang iya mga disipulo nga buhi sa sina nga tion indi na gid mapatay. Bisan sia gani mapatay, subong sang ginsiling niya sa iya mga apostoles. (Mateo 16:21; 17:22, 23) Ginpadaku ni Jesus nga ang pagtuo sa iya makadul-ong sa kabuhi nga dayon. Para sa madamo, ini nga kabuhi matigayon paagi sa pagkabanhaw. Pero ang mga matutom nga buhi sa katapusan sining sistema indi na gid mapatay. Bisan ano man ang kahimtangan, ang tanan nga nagatuo sa iya indi makatigayon sang permanente nga kamatayon.

Pero si Jesus bala, nga bag-o lang nagsiling nga “Ako ang pagkabanhaw kag ang kabuhi,” makabulig kay Lazaro nga pila na ka adlaw nga napatay? Ginpamangkot ni Jesus si Marta: “Nagapati ka bala sini?” Sia nagsabat: “Huo, Ginuo, nagapati ako nga ikaw ang Cristo, ang Anak sang Dios, ang isa nga magakari sa kalibutan.” Nagatuo si Marta nga may mahimo si Jesus sina mismo nga adlaw, gani dalidali sia nga nagpauli kag ginhutikan ang iya utod: “Yari diri ang Manunudlo kag ginapatawag ka.” (Juan 11:25-28) Naglakat dayon si Maria, kag nagsunod sa iya ang iban kay abi nila makadto sia sa lulubngan ni Lazaro.

Sa baylo, nagkadto si Maria kay Jesus, nagluhod sa iya tiilan nga nagahibi, kag ginsulit ang ginsiling sang iya utod: “Ginuo, kon diri ka lang, wala kuntani mapatay ang akon utod.” Sang makita ni Jesus nga nagahibi si Maria kag ang kadam-an, natandog gid ang iya tagipusuon kag natublag, kag nagtulo pa gani ang iya luha. Natandog ang mga nakakita sa iya. Pero ang pila namangkot: ‘Kon naayo ni Jesus ang tawo nga bulag halin sa pagkatawo, indi niya ayhan mapunggan ang kamatayon ni Lazaro?’—Juan 11:32, 37.