Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 84

Mangin Disipulo—Daw Ano ka Serioso?

Mangin Disipulo—Daw Ano ka Serioso?

LUCAS 14:25-35

  • ANG NADALAHIG PARA MANGIN DISIPULO

Nagtudlo si Jesus sang importante nga mga leksion samtang nagakaon sa balay sang isa ka lider sang mga Fariseo. Samtang nagapakadto si Jesus sa Jerusalem, nag-upod sa iya ang daku nga kadam-an. Ngaa? Interesado gid bala sila nga mangin matuod niya nga mga sumulunod, bisan ano man ang ginapatuman sa ila?

Samtang nagalakbay sila, may ginsiling si Jesus nga mahimo makibot ang pila: “Kon ang bisan sin-o luyag nga mangin disipulo ko dapat dumtan niya ang iya amay, iloy, asawa, mga anak, mga utod nga lalaki, mga utod nga babayi, kag bisan sa iya kaugalingon nga kabuhi. Kon indi, indi sia mangin disipulo ko.” (Lucas 14:26, footnote) Ano ang iya buot silingon?

Wala nagasiling si Jesus nga dapat dumtan sang tanan niya nga mangin sumulunod ang ila mga paryente. Sa baylo, dapat nila sila dumtan sa paagi nga ang ila pagpalangga sa ila indi labaw kay Jesus, indi pareho sa tawo sa iya ilustrasyon sa panihapon nga namalibad sa importante nga imbitasyon kay bag-o lang sia makasal. (Lucas 14:20) Ginsambit nga “ginadumtan” sang katigulangan sang mga Judiyo nga si Jacob si Lea kag ginhigugma si Raquel, buot silingon nga mas palangga niya si Raquel sangsa utod sini nga si Lea.—Genesis 29:31; footnote.

Talupangda nga nagsiling si Jesus nga ang isa ka disipulo dapat magdumot “bisan sa iya kaugalingon nga kabuhi,” ukon kalag. Buot silingon nga ang matuod nga disipulo dapat maghigugma kay Jesus sing labaw pa sangsa iya kabuhi, nga handa pa gani nga madula ang iya kabuhi kon kinahanglan. Maathag nga isa ka serioso nga responsibilidad nga mangin disipulo sang Cristo. Indi ini dapat pagpasapayanan, nga wala ginahunahuna sing maayo.

Ang mangin disipulo mahimo maglakip sang kabudlayan kag paghingabot, kay si Jesus nagsiling: “Ang bisan sin-o nga wala nagapas-an sang iya usok sang pag-antos kag wala nagasunod sa akon indi mangin akon disipulo.” (Lucas 14:27) Huo, ang matuod nga disipulo ni Jesus dapat handa nga pakahuy-an pareho sang natabo kay Jesus. Nagsiling pa gani sia nga mapatay sia sa kamot sang iya mga kaaway.

Gani dapat analisahon sing maayo sang kadam-an nga kaupod ni Jesus sa paglakbay kon ano ang buot silingon nga mangin disipulo sang Cristo. Ginpadaku ini ni Jesus paagi sa isa ka ilustrasyon. “Halimbawa,” siling niya, “sin-o sa inyo nga luyag magtukod sang torre ang wala anay nagapungko kag nagasuma sang gasto agod mahibaluan kon bala may bastante sia nga inugpahuman sa sini? Kay kon indi, basi sadsaran lang ang mapasad niya apang indi niya mapatapos ini.” (Lucas 14:28, 29) Gani antes mangin mga disipulo ni Jesus, dapat nga mamat-od sing malig-on ang mga nagalakbay kaupod niya pakadto sa Jerusalem nga abagahon sing bug-os ang responsibilidad. Ginpadaku niya ini paagi sa isa pa ka ilustrasyon:

“Sin-o nga hari ang makig-away sa isa pa ka hari nga indi anay magpungko kag makigsapol sa iban kon bala masarangan niya atubangon upod sa iya 10,000 ka soldado ang kaaway niya nga hari nga may 20,000 ka soldado? Kon indi niya masarangan, magapadala sia sang mga embahador kag makighidait samtang malayo pa ang kaaway.” Para ipaathag ang iya buot silingon, nagsiling sia: “Sa amo man, wala sing bisan sin-o sa inyo nga indi magbiya sang tanan niya nga pagkabutang ang mangin akon disipulo.”—Lucas 14:31-33.

Siempre, ginsiling ini ni Jesus indi lamang sa kadam-an nga nagasunod sa iya sa dalan. Dapat handa nga himuon sang tanan nga nakatuon sa Cristo kon ano ang iya ginsiling. Nagakahulugan ini nga dapat mangin handa sila nga isakripisyo ang tanan nila nga ginapanag-iyahan, bisan ang ila kabuhi, agod mangin mga disipulo niya. Butang ini nga dapat hunahunaon kag ipangamuyo.

Ginpadaku subong ni Jesus ang isa ka butang nga ginsambit niya sa iya Sermon sa Bukid sang nagsiling sia nga ang iya mga disipulo amo “ang asin sang duta.” (Mateo 5:13) Mahimo nga ang iya buot silingon amo nga kaangay sang literal nga asin nga isa ka preserbatibo, ang iya mga disipulo may makapreserbar nga epekto sa mga tawo, nga nagaamlig sa ila sa kahigkuan sa espirituwal kag moral. Bangod malapit na matapos ang iya ministeryo, sia nagsiling: “Sa pagkamatuod, ang asin maayo. Apang kon ang asin indi na maparat, paano ini mapaparat liwat?” (Lucas 14:34) Nahibaluan sang iya mga tagpalamati nga ang pila ka asin sadto indi puro, nga may lakot nga duta amo nga indi na ini mapuslan.

Gani ginapakita ni Jesus nga bisan ang madugay na niya nga mga disipulo indi dapat magtugot nga magluya ang ila determinasyon. Kay kon matabo ini, mangin wala sila sing pulos, kaangay sang asin nga wala na sing kaparat. Mahimo nga kadlawan sila sang kalibutan. Labaw pa sa sini, indi na sila takus sa atubangan sang Dios, nga nagapakahuya pa gani sa iya ngalan. Ginpadaku ni Jesus nga dapat gid ina likawan, sang magsiling sia: “Ang makabati magpamati sing maayo.”—Lucas 14:35.

Magtuon sing Dugang Pa

MAAYONG BALITA HALIN SA DIOS!

Paano Mo Mahibaluan ang Matuod nga Pagsimba?

Isa lamang bala ang matuod nga relihion? Binagbinaga ang lima ka palatandaan nga nagapakilala sang matuod nga pagsimba.