Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 97

Ilustrasyon Parte sa mga Mamumugon sa Ulubasan

Ilustrasyon Parte sa mga Mamumugon sa Ulubasan

MATEO 20:1-16

  • ANG “NAULIHI” NGA MGA MAMUMUGON SA ULUBASAN MANGIN “UNA”

Bag-o lang ginsilingan ni Jesus ang iya mga tagpalamati sa Perea nga “madamo nga nauna nga mangin ulihi kag ulihi nga mauna.” (Mateo 19:30) Ginpadaku niya ini paagi sa isa ka ilustrasyon parte sa mga mamumugon sa ulubasan:

“Ang Ginharian sang langit kaangay sang isa ka tag-iya sang ulubasan, nga naglakat sing aga pa sa pagpangita sing mga mamumugon. Sang sia kag ang mga mamumugon nagsugtanay nga bayaran niya sila sing isa ka denario ang adlaw, ginpadala niya sila sa iya ulubasan. Sang naglakat sia sang mga ikatlo nga oras, may nakita sia nga mga tawo nga nagatindog lang sa tiendahan bangod wala sila sing obra; kag ginsilingan niya sila, ‘Magkadto man kamo sa ulubasan, kay suelduhan ko kamo sing husto.’ Gani nagkadto sila. Naglakat sia liwat sang mga ikan-om nga oras kag ikasiam nga oras, kag amo man ang ginhimo niya. Pag-abot sang mga ika-11 nga oras, naglakat sia kag may nakita naman sia nga mga tawo nga nagatindog lang, kag ginsilingan niya sila, ‘Ngaa nagatindog lang kamo diri sa bug-os nga adlaw nga wala sing ginaobra?’ Nagsabat sila, ‘Ti, kay wala man sing nagpaobra sa amon.’ Nagsiling sia, ‘Magkadto man kamo sa ulubasan.’”—Mateo 20:1-7.

Mahimo nga ginahunahuna sang mga tagpalamati ni Jesus si Jehova nga Dios sang nabatian nila ang pagsambit sang “Ginharian sang langit” kag “tag-iya sang ulubasan.” Ginapakita sang Kasulatan nga si Jehova amo ang tag-iya sang ulubasan, nga nagarepresentar sa pungsod sang Israel. (Salmo 80:8, 9; Isaias 5:3, 4) Ang mga yara sa Kasuguan nga katipan mapaanggid sa mga mamumugon sa ulubasan. Pero wala ginailustrar ni Jesus ang nagligad. Ginalaragway niya ang kahimtangan sa iya tion.

Ang mga lider sang relihion, pareho sang mga Fariseo nga bag-o lang nagtilaw sa iya parte sa diborsio, ang nagapangabudlay kuntani sa pag-alagad sa Dios. Kaangay sila sang bug-os tion nga mga mamumugon nga nagapaabot sang bilog nga sueldo, isa ka denario sa isa ka adlaw nga obra.

Ginakabig sang mga saserdote kag sang iban sa sini nga grupo nga mas manubo ang pag-alagad sang ordinaryo nga mga Judiyo sa Dios, pareho sa indi permanente nga mga mamumugon sa ulubasan sang Dios. Sa ilustrasyon ni Jesus, ini nga mga tawo ginpaobra “sang mga ikatlo nga oras” (alas nuebe sang aga) ukon sang ulihi na—sa ikan-om, ikasiam, kag sa ika-11 nga oras (alas singko sang hapon).

Ang mga nagasunod kay Jesus ginakabig nga ‘mga tawo nga ginapakamalaut sang Dios.’ (Juan 7:49) Halos sa bug-os nila nga kabuhi, nangin mga mangingisda sila ukon mga mamumugon. Nian sang tigragas sang 29 C.E., “ang tag-iya sang ulubasan” nagpadala kay Jesus para tawgon ining kubos nga mga tawo nga magpangabudlay sa Dios subong mga disipulo sang Cristo. Sila ang “ulihi” nga ginsambit ni Jesus, ang mga mamumugon sa ulubasan nga nagsugod sa pag-obra sang ika-11 nga oras.

Sang gintapos ni Jesus ang iya ilustrasyon, ginlaragway niya kon ano ang natabo sang matapos ang trabaho: “Sang sirom na, nagsiling ang tag-iya sang ulubasan sa iya tulugyanan, ‘Tawga ang mga mamumugon kag suelduhi sila. Magsugod ka sa pinakaulihi tubtob sa pinakauna.’ Sang nag-abot ang mga tawo nga nagsugod sa pag-obra sang ika-11 nga oras, nagbaton ang tagsa sa ila sing isa ka denario. Gani, sang nag-abot ang mga nauna, naghunahuna sila nga magabaton sila sing kapin pa, apang ang tagsa sa ila nagbaton man sing isa ka denario. Pagbaton nila sini, nagreklamo sila sa tag-iya sang ulubasan. Nagsiling sila: ‘Ining mga naulihi nag-obra sing isa ka oras lang; apang ginsuelduhan mo sila pareho sa amon nga nag-obra sa bug-os nga adlaw sa nagatagiti nga init!’ Apang nagsabat sia, ‘Abyan, wala ko ikaw gindayaan. Indi bala nagsugtanay kita sa isa ka denario? Kuhaa ang imo sueldo kag maglakat. Luyag ko suelduhan ining naulihi sing pareho sa imo. Wala bala ako sing kinamatarong sa paghimo sang luyag ko sa akon kuarta? Nahisa ka bala bangod maayo ako sa ila?’ Sa sini nga paagi, ang mga naulihi mangin una kag ang mga nauna maulihi.”—Mateo 20:8-16.

Mahimo nagapalibog ang mga disipulo parte sa katapusan nga bahin sang ilustrasyon ni Jesus. Paano ang mga lider sang relihion sang mga Judiyo, nga nagakabig sang ila kaugalingon nga “nauna,” “maulihi”? Paano mangin “una” ang mga disipulo ni Jesus?

Ang mga disipulo ni Jesus, nga ginatamod sang mga Fariseo kag sang iban nga “naulihi,” amo ang “una” nga makabaton sang bilog nga sueldo. Sa kamatayon ni Jesus, ang dutan-on nga Jerusalem sikwayon, kag magapili ang Dios sang isa ka bag-o nga pungsod, ang “Israel sang Dios.” (Galacia 6:16; Mateo 23:38) Ginpatuhuyan sila ni Juan nga Manugbawtismo sang naghambal sia parte sa nagapakari nga pagbawtismo sa balaan nga espiritu. Ang mga “naulihi” amo ang una nga makabaton sina nga bawtismo kag hatagan sing pribilehiyo nga mangin mga saksi ni Jesus “tubtob sa pinakamalayo nga bahin sang duta.” (Binuhatan 1:5, 8; Mateo 3:11) Kon mahangpan sang mga disipulo ang daku nga pagbag-o nga ginatudlo ni Jesus, mahimo nila mahangpan nga pamatukan gid sila sang mga lider sang relihion, nga “maulihi.”