Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 79

Kon Ngaa Pagalaglagon

Kon Ngaa Pagalaglagon

LUCAS 13:1-21

  • NAGTUDLO SI JESUS SANG LEKSION HALIN SA DUHA KA TRAHEDYA

  • GIN-AYO ANG BABAYI NGA BALDADO SA ADLAW NGA INUGPAHUWAY

Gingamit ni Jesus ang madamo nga paagi para palig-unon ang mga tawo nga hunahunaon ang ila kaangtanan sa Dios. May isa ka higayon nga nag-utwas pagkatapos nga nakighambal sia sa mga tawo sa gua sang balay sang isa ka Fariseo.

Ang pila sa ila nagsambit sang makapasubo nga hitabo. Ginsambit nila ang parte “sa mga taga-Galilea nga ginpapatay ni [Romanong Gobernador Poncio] Pilato samtang nagahalad sa templo.” (Lucas 13:1) Ano ang ila buot silingon?

Mahimo nga ining mga taga-Galilea napatay sang nagprotesta ang linibo ka Judiyo sa paggamit ni Pilato sang kuarta halin sa bahandian sang templo para tukuron ang daku nga kanal sang tubig pakadto sa Jerusalem. Mahimo natigayon ni Pilato ang kuarta kay nagpasugot ang mga nagadumala sang templo. Ang nagasugid sini nga trahedya mahimo nagabatyag nga natabo ini nga kalamidad sa mga taga-Galilea kay may nahimo sila nga malaut. Wala mag-ugyon si Jesus.

Namangkot sia: “Nagahunahuna bala kamo nga ini nga mga taga-Galilea mas makasasala sangsa iban nga mga taga-Galilea bangod natabo ini sa ila?” Ang iya sabat indi. Pero gingamit niya ang natabo para paandaman ang mga Judiyo: “Kon indi kamo maghinulsol, kamo tanan mapatay man.” (Lucas 13:2, 3) Ginpatuhuyan ni Jesus ang isa pa ka trahedya nga mahimo bag-o lang natabo kag may labot sa pagtukod sining daku nga kanal sang tubig. Namangkot sia:

“Nagahunahuna man bala kamo nga ang 18 nga napatay sang narumpagan sila sang torre sa Siloam mas makasasala sangsa iban nga nagaistar sa Jerusalem?” (Lucas 13:4) Mahimo magbatyag ang kadam-an nga napatay ining mga tawo bangod malain sila. Pero wala mag-ugyon liwat si Jesus. Nahibaluan niya nga “ang tion kag ang wala ginapaabot nga hitabo” nagakahanabo kag mahimo amo man ini ang gintunaan sini nga trahedya. (Manugwali 9:11) Pero dapat makatuon sing leksion ang mga tawo sa sini nga hitabo. “Kon indi kamo maghinulsol, kamo tanan mapatay man pareho sa ila,” siling ni Jesus. (Lucas 13:5) Pero ngaa ginapadaku niya ini nga leksion subong?

Bangod may labot ini sa kon diin na sia sa iya ministeryo, kag gin-ilustrar niya ini sa sining paagi: “May isa ka tawo nga may kahoy nga higuera nga natanom sa iya ulubasan. Ginkadtuan niya ini agod tan-awon kon may bunga ini apang wala sia sing nakita. Gani nagsiling sia sa manug-atipan sang ulubasan, ‘Tatlo ka tuig na nga nagakadto ako agod tan-awon kon may bunga ini nga higuera, apang wala ako sing nakita. Pudla ini! Ngaa magpabilin ini sa duta kon wala man lang ini nagapamunga?’ Nagsabat sia, ‘Agalon, pabay-i lang ini anay sa isa pa ka tuig kay kutkutan ko ang palibot sini kag abonohan. Kon magpamunga ini, maayo; apang kon indi, pudla ini.’”—Lucas 13:6-9.

Sa masobra tatlo ka tuig, gintinguhaan ni Jesus nga palambuon ang pagtuo sang mga Judiyo. Pero pila lang ang nangin mga disipulo nga masiling nga bunga sang iya mga panikasog. Subong, sa ikap-at nga tuig sang iya ministeryo, gindugangan pa gid niya ang iya mga panikasog. Daw pareho lang nga ginkutkutan niya kag gin-abonohan ang puno sang Judiyo nga higuera paagi sa pagbantala kag pagpanudlo sa Judea kag Perea. Ano ang resulta? Pila lang ka Judiyo ang nagtuo. Sa kabilugan, ang pungsod wala maghinulsol kag nagapadulong ini sa kalaglagan.

Nangin maathag liwat ang indi pagtuo sang kalabanan pagkatapos gid lang sang Adlaw nga Inugpahuway. Nagapanudlo si Jesus sa sinagoga. Nakita niya ang isa ka babayi nga ginpamasakit sang demonyo kag nagasiuktot sa sulod sang 18 ka tuig. Maluluy-on sia nga ginsilingan ni Jesus: “Babayi, hilway ka na sa imo balatian.” (Lucas 13:12) Gintungtong ni Jesus ang iya mga kamot sa iya, kag gilayon nga nakatindog sia sing tadlong kag naghimaya sa Dios.

Naakig gid ang nagadumala nga opisyal sang sinagoga kag nagsiling: “May anom ka adlaw sa pagtrabaho; gani magkadto kamo sa sina nga mga adlaw agod ayuhon kamo, kag indi sa Adlaw nga Inugpahuway.” (Lucas 13:14) Wala ginapanghiwala sang opisyal nga may gahom si Jesus sa pagpang-ayo; sa baylo, ginpakamalaut niya ang mga tawo kay nagkadto sila para ayuhon sa Adlaw nga Inugpahuway! Nagsabat si Jesus: “Mga salimpapaw, indi bala nga sa Adlaw nga Inugpahuway ginahubaran ninyo ang inyo baka ukon ang inyo asno kag ginaguyod agod paimnon? Indi bala ining babayi nga anak ni Abraham nga gingapos ni Satanas sa sulod sang 18 ka tuig, dapat hubaran sa Adlaw nga Inugpahuway?”—Lucas 13:15, 16.

Nahuy-an ang mga nagapamatok sa iya, pero nagkasadya gid ang mga tawo tungod sa makatilingala nga mga butang nga ginhimo ni Jesus nga nakita nila. Ginsulit dayon ni Jesus diri sa Judea ang duha ka matagnaon nga mga ilustrasyon parte sa Ginharian nga ginsambit niya sang nagligad sa sakayan sa Dagat sang Galilea.—Mateo 13:31-33; Lucas 13:18-21.