Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 26

“Ginpatawad Na ang Imo mga Sala”

“Ginpatawad Na ang Imo mga Sala”

MATEO 9:1-8 MARCOS 2:1-12 LUCAS 5:17-26

  • GINPATAWAD NI JESUS ANG MGA SALA SANG PARALISADO KAG GIN-AYO SIA

Nabatian na sang halos tanan nga tawo ang parte kay Jesus. Madamo ang naglakbay halin pa sa malayo para mamati sa panudlo niya kag makakita sang iya mga milagro. Pero pagligad sang pila ka adlaw, nagbalik sia sa Capernaum, ang sentro sang iya hilikuton. Madasig lang naglapnag ang balita sa sini nga siudad malapit sa Dagat sang Galilea nga nagbalik sia. Gani madamo ang nagkadto sa balay nga iya ginadayunan. Ang pila mga Fariseo kag mga manunudlo sang Kasuguan nga naghalin pa sa bilog nga Galilea kag Judea, lakip na sa Jerusalem.

“Madamo ang nagtipon didto, amo nga bisan sa puertahan nagaginutok sila. Ginwali niya ang pulong sang Dios sa ila.” (Marcos 2:2) Handa na karon ang tanan para sa talalupangdon nga hitabo. Mabuligan kita sini nga maapresyar nga may gahom si Jesus nga dulaon ang pag-antos sang mga tawo kag ipasag-uli ang maayong panglawas sa tanan nga luyag niya.

Samtang nagatudlo si Jesus sa gutok nga kuarto, apat ka lalaki ang nagdala sang paralisado nga ara sa teheras. Luyag nila nga ayuhon ni Jesus ang ila abyan. Pero bangod sang kadam-an, “indi sila makapalapit kay Jesus.” (Marcos 2:4) Makapasubo gid ini. Gani nagsaka sila sa tapan nga atop kag ginguhaban ini. Ginpapanaug nila dayon ang teheras nga ginahigdaan sang paralisado.

Naakig bala si Jesus kay gin-isturbo sia? Wala gid! Nagdayaw gid sia sa ila pagtuo kag nagsiling sia sa paralisado: “Ginpatawad na ang imo mga sala.” (Mateo 9:2) Pero makapatawad gid bala si Jesus? Ginduhaduhaan ini sang mga escriba kag mga Fariseo: “Ngaa nahambal niya ina? Nagapasipala sia. Sin-o ang makapatawad sang mga sala luwas lamang sa Dios?”—Marcos 2:7.

Bangod nahibaluan ni Jesus ang ila ginahunahuna, nagsiling sia sa ila: “Ngaa nagahunahuna kamo sing subong sina sa inyo tagipusuon? Ano bala ang mas mahapos, ang magsiling sa paralitiko, ‘Ginapatawad na ang imo mga sala,’ ukon ang magsiling, ‘Bangon ka kag dalha ang imo teheras kag maglakat’?” (Marcos 2:8, 9) Huo, base sa halad ni Jesus sa ulihi, mapatawad niya ang mga sala sang tawo.

Ginpakita dayon ni Jesus sa kadam-an lakip sa mga nagapakalain sa iya nga may awtoridad sia sa pagpatawad sang mga sala sa duta. Nagliso sia sa paralisado kag ginsugo sia: “Bangon ka, dalha ang imo teheras, kag magpauli.” Naglakat dayon ini nga tawo kag gindala niya ang iya teheras sa atubangan nila tanan. Nagdayaw ang mga tawo! Ginhimaya nila ang Dios, nga nagasiling: “Wala pa gid kita makakita sing subong sini”!—Marcos 2:11, 12.

Talalupangdon nga gin-angot ni Jesus ang sala sa balatian kag ang pagpatawad sang mga sala sa maayong panglawas. Ginatudlo sang Biblia nga ang aton una nga ginikanan, si Adan, nakasala kag tanan kita nakapanubli sang epekto sang sala, nga amo ang balatian kag kamatayon. Pero sa paggahom sang Ginharian sang Dios, patawaron ni Jesus ang mga sala sang tanan nga nagahigugma kag nagaalagad sa Dios. Dayon wala na sing balatian asta san-o.—Roma 5:12, 18, 19.

Magtuon sing Dugang Pa

Mapatawad Bala ang Aton mga Sala?

Ginapatawad bala sang Dios bisan ang mabug-at nga mga sala? Kon gusto naton nga kahamut-an sang Dios, ano ang dapat naton himuon?