Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 33

Pagtuman sang Tagna ni Isaias

Pagtuman sang Tagna ni Isaias

MATEO 12:15-21 MARCOS 3:7-12

  • NAGDINAGUSO ANG KADAM-AN KAY JESUS

  • GINTUMAN NIYA ANG TAGNA NI ISAIAS

Sang mahibaluan ni Jesus nga nagaplano ang mga Fariseo kag ang partido sang mga Herodes nga patyon sia, nagkadto sia kag ang iya mga disipulo sa Dagat sang Galilea. Nagdinaguso sa iya ang kadam-an halin sa iban nga duog—halin sa Galilea, sa baybayon nga mga siudad sang Tiro kag Sidon, sa nasidlangan nga bahin sang Suba Jordan, sa Jerusalem, kag sa Idumea sa bagatnan. Madamo ang gin-ayo ni Jesus. Gani, ang mga may malala nga balatian nagpalapit sa iya. Wala na sila maghulat nga sia ang magtandog, kundi nalangkag sila nga tandugon sia.—Marcos 3:9, 10.

Tama kadamo ang tawo amo nga ginsilingan ni Jesus ang iya mga disipulo nga magkuha sing gamay nga sakayan para makapalayo sia diutay sa higad kag indi magdinaguso ang mga tawo sa iya. Matudluan man niya sila halin sa sakayan ukon makasaylo sia sa iban nga baybayon para buligan ang mas madamo pa.

Si disipulo Mateo nagsiling nga ang ginhimo ni Jesus katumanan sang “ginsiling paagi kay Isaias nga manalagna.” (Mateo 12:17) Ano nga tagna ang ginatuman ni Jesus?

“Tan-awa! Ang akon alagad nga akon ginpili, ang akon hinigugma, nga ginakahamut-an ko! Ibutang ko sa iya ang akon espiritu, kag ipahibalo niya sa mga pungsod ang katarungan. Indi sia makigbais ukon magsinggit, kag wala sing makabati sang iya tingog sa mayor nga mga dalan. Indi niya pagbalion ang tabun-ak nga nadugmok, kag indi niya pagpalungon ang pabilo nga nagapiraw, tubtob mapaluntad niya sing madinalag-on ang katarungan. Sa pagkamatuod, sa iya ngalan magalaum ang mga pungsod.”—Mateo 12:18-21; Isaias 42:1-4.

Si Jesus siempre ang hinigugma nga alagad nga ginakahamut-an sang Dios. Ginpakita niya kon ano ang matuod nga hustisya, nga ginpatiko sang sayop nga mga tradisyon sang relihion. Bangod sang indi makatarunganon nga pag-aplikar sang Kasuguan sang Dios, ang mga Fariseo indi magbulig sa nagabalatian sa Adlaw nga Inugpahuway! Bilang pagpakita sang katarungan sang Dios kag nga ang espiritu sang Dios yara sa iya, ginpaumpawan ni Jesus ang mga tawo nga ginabug-atan sang indi makatarunganon nga mga tradisyon. Amo kon ngaa luyag sia nga patyon sang mga lider sang relihion. Makapasubo gid!

Ano ang buot silingon nga “indi sia makigbais ukon magsinggit, kag wala sing makabati sang iya tingog sa mayor nga mga dalan”? Sang gin-ayo ni Jesus ang mga tawo, ginsugo niya sila—ukon ang mga demonyo—nga “indi sia pag-ipakilala.” (Marcos 3:12) Indi niya luyag nga makilala sia sang mga tawo paagi sa mga sugidsugid sa dalan ukon sa ginpatiko nga mga report nga ginapasapasa.

Ginpalab-ot man ni Jesus ang iya makapaumpaw nga mensahe sa mga tawo nga daw nadugmok, nabali, kag natumba nga tabun-ak. Kaangay sila sang nagapiraw nga pabilo, nga malapit na lang mapatay. Wala ginbali ni Jesus ang nadugmok nga tabun-ak ukon ginpatay ang nagapiraw nga pabilo. Sa baylo, mainayuhon niya kag mahigugmaon nga ginpabakod ang mga mapainubuson. Gani si Jesus gid ang malauman sang mga pungsod!