Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 45

Pagdaug sa Madamo nga Demonyo

Pagdaug sa Madamo nga Demonyo

MATEO 8:28-34 MARCOS 5:1-20 LUCAS 8:26-39

  • GINPAKADTO ANG MGA DEMONYO SA MGA BABOY

Sang nakadungka ang mga disipulo sa baybayon pagkatapos sang ila makakululba nga inagihan sa dagat, kinulbaan pa gid sila. Duha ka mabangis gid nga tawo nga ginsudlan sang mga demonyo ang naghalin sa mga lulubngan kag nagsugata kay Jesus! Ang isa amo gid ang natalupangdan kay mahimo mas masingki sia kag madugay na nga ginakontrol sang mga demonyo.

Ining makaluluoy nga tawo nagalakat nga hublas. Adlaw kag gab-i, “nagasinggitan sia sa mga lulubngan kag sa kabukiran kag ginapilasan niya ang iya kaugalingon sang mga bato.” (Marcos 5:5) Puerte sia kasingki amo nga nahadlok ang mga tawo sa pag-agi sa sina nga dalan. Ginakadenahan sia sang iban, pero ginapamugras niya ang mga kadena kag ginapamugto ang iya mga gapos sa tiil. Wala gid sing makapugong sa iya.

Samtang nagapalapit ang tawo kay Jesus nagluhod sia, kag ang mga demonyo nga nagakontrol sa iya nagpasinggit sa iya: “Ngaa ginagamo mo ako, Jesus, nga Anak sang Labing Mataas nga Dios? Ginapasumpa ko ikaw sa Dios nga indi mo ako pagpaantuson.” Ginpakita ni Jesus nga may awtoridad sia sa mga demonyo kay nagsugo sia: “Demonyo, maggua ka sa sini nga tawo.”—Marcos 5:7, 8.

Ang matuod, madamo nga demonyo ang nagsulod sa tawo. Sang namangkot si Jesus, “Ano ang imo ngalan?” amo ini ang sabat: “Ako si Lehiyon, bangod madamo kami.” (Marcos 5:9) Ang isa ka Romano nga lehiyon may linibo ka soldado; gani madamo nga demonyo ang nagtingob sa sini nga tawo, kag nalipay sila sa iya pag-antos. Nagapakiluoy sila kay Jesus “nga indi sila pagtabugon pakadto sa kadadalman.” Mahimo narealisar nila kon ano ang matabo sa ila sa ulihi pati sa ila lider, si Satanas.—Lucas 8:31.

May panong sang 2,000 ka baboy nga nagapanginaon malapit sa ila, mga sapat ini nga indi matinlo suno sa Kasuguan kag indi dapat panag-iyahan sang mga Judiyo. Ang mga demonyo nagsiling: “Pakadtua kami sa mga baboy, agod makasulod kami sa ila.” (Marcos 5:12) Gintugutan sila ni Jesus, kag nagkadto sila sa mga baboy. Ang tanan nga 2,000 ka baboy nagdinaguso sa pil-as kag nahulog sa dagat, kag nagkalalumos.

Sang nakita ini sang mga manugbantay sang baboy, ginbalita nila ini sa siudad kag sa kaumhan. Ang mga tawo nagkadto agod tan-awon ang natabo. Pag-abot nila, nakita nila ang tawo nga ginsudlan anay sang mga demonyo nga nag-ayo na kag may husto nga panghunahuna. May bayo na sia kag nagapungko sa tiilan ni Jesus!

Ang mga tawo nga nakabati sini ukon nakakita sa tawo nahadlok, nga wala makahangop kon ano ang buot silingon sini sa ila. Ginpangabay nila si Jesus nga maghalin sa ila lugar. Sang nagsakay si Jesus sa sakayan, ang tawo nga ginsudlan anay sang mga demonyo nagpangabay nga mag-upod sa iya. Pero ginsilingan ni Jesus ang tawo: “Pauli ka sa imo mga paryente, kag sugiri sila sang tanan nga ginhimo ni Jehova sa imo kag sang kaluoy nga ginpakita niya sa imo.”—Marcos 5:19.

Masami nga ginasilingan ni Jesus ang iya ginpang-ayo nga indi manugid sa iban bangod indi niya luyag nga ang mga tawo makakilala sa iya bangod sang sobra nga sinugidsugid. Sa sini nga kahimtangan, ang tawo nga ginsudlan anay sang mga demonyo isa ka pamatuod sang gahom ni Jesus kag makapanaksi sa indi malab-utan ni Jesus. Ang iya panaksi mahimo magadula man sang negatibo nga report parte sa pagkalumos sang mga baboy. Gani ginsugid sang tawo ang ginhimo ni Jesus sa iya sa bug-os nga Decapolis.

Magtuon sing Dugang Pa

Matuod Bala ang mga Demonyo?

Ano ang mga demonyo? Diin sila naghalin?

Makontrol Bala sang Yawa ang mga Tawo?

Paano ginaimpluwensiahan sang Yawa ang mga tawo, kag paano mo malikawan ang iya mga siod?