Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 50

Handa sa Pagbantala Bisan Hingabuton

Handa sa Pagbantala Bisan Hingabuton

MATEO 10:16–11:1 MARCOS 6:12, 13 LUCAS 9:6

  • SI JESUS NAGHANAS KAG NAGPADALA SA MGA APOSTOLES

Ginhatagan ni Jesus sing ekselente nga instruksion ang iya mga apostoles kon paano magbantala samtang paris sila nga nagalakat. Pero indi lang amo sini ang iya ginhimo. Ginpaandaman niya sila parte sa mga manugpamatok: “Ginapadala ko kamo subong sang mga karnero sa tunga sang mga lobo . . . Mag-andam kamo sa mga tawo; kay dalhon nila kamo sa mga hukmanan, kag bunalon nila kamo sa ila mga sinagoga. Kag dalhon kamo sa atubangan sang mga gobernador kag mga hari tungod sa akon.”—Mateo 10:16-18.

Huo, mahimo maeksperiensiahan sang mga sumulunod ni Jesus ang grabe nga paghingabot, pero ginpasalig niya sila: “Kon dalhon nila kamo, indi kamo magkabalaka kon ano ang inyo ihambal kag kon paano ninyo ini ihambal, kay sa sina nga tion ang inyo ihambal ihatag sa inyo; kay indi lamang kamo ang nagahambal, kundi nagahambal kamo paagi sa bulig sang gahom sang inyo langitnon nga Amay.” Nagpadayon sia: “Ang utod mangin kabangdanan sang kamatayon sang iya utod, kag ang amay sang iya anak, kag ang mga anak magapamatok sa mga ginikanan kag mangin kabangdanan sang ila kamatayon. Kag dumtan kamo sang tanan nga tawo bangod sa akon ngalan, apang ang nagbatas tubtob sa katapusan maluwas.”—Mateo 10:19-22.

Bangod importante gid ang pagbantala, ginpadaku ni Jesus nga dapat mangin maalamon ang iya mga sumulunod para makapadayon sila sa sini nga hilikuton. Nagsiling sia: “Kon hingabuton nila kamo sa isa ka siudad, magpalagyo kamo pakadto sa iban nga siudad; kay sa pagkamatuod nagasiling ako sa inyo, sa wala pa ninyo malibot ang mga siudad sang Israel, ang Anak sang tawo magaabot.”—Mateo 10:23.

Maayo gid nga instruksion, paandam, kag pagpalig-on ang ginhatag ni Jesus sa iya 12 ka apostoles! Pero makapasalamat ka nga ining mga pinamulong para man sa tanan nga magabantala pagkatapos sang kamatayon kag pagkabanhaw ni Jesus. Ginpakita ini sa iya pagsiling nga ang iya mga disipulo ‘pagadumtan sang tanan nga tawo,’ indi lamang sa ginbantalaan sang mga apostoles. Dugang pa, indi naton mabasa nga gindala sila sa atubangan sang mga gobernador kag hari sa ila malip-ot nga pagbantala sa Galilea ukon ginpapatay sila sang mga miembro sang ila pamilya.

Maathag nga ginahunahuna ni Jesus ang palaabuton sang ginsiling niya ining mga butang sa mga apostoles. Binagbinaga ang iya ginsiling nga indi makalibot ang iya mga disipulo sa pagbantala tubtob “ang Anak sang tawo magaabot.” Ginapakita ni Jesus nga ang iya mga disipulo indi makatapos sa pagbantala parte sa Ginharian sang Dios antes ang ginhimaya nga si Hari Jesucristo magaabot subong hukom nga gintangdo sang Dios.

Samtang nagabantala, indi dapat makibot ang mga apostoles nga pamatukan sila, kay si Jesus nagsiling: “Ang disipulo indi labaw sa iya manunudlo, kag ang ulipon indi labaw sa iya agalon.” Maathag ang iya buot silingon. Ginpintasan sia kag ginhingabot kay nagbantala sia sang Ginharian sang Dios, gani amo man sila. Pero ginpalig-on sila ni Jesus: “Indi kamo mahadlok sa mga makapatay sang lawas apang indi makapatay sang kalag; kundi mahadlok kamo sa makalaglag sang kalag kag lawas sa Gehenna.”—Mateo 10:24, 28.

Nagpakita sing maayo nga halimbawa si Jesus. Maisog niya nga gin-antos ang kamatayon sa baylo nga ikompromiso ang iya katutom sa isa nga pinakagamhanan, si Jehova. Ang Labing Gamhanan nga Dios lamang ang makalaglag sang “kalag” sang isa (ang iya paglaum nga mabuhi sa ulihi) ukon ang makabanhaw sa iya para makatigayon sing dayon nga kabuhi. Makapalig-on gid ini sa mga apostoles!

Gin-ilustrar ni Jesus ang mahigugmaon nga pag-atipan sang Dios sa iya mga sumulunod: “Indi bala ang duha ka maya ginabaligya sa isa ka sensilyo nga diutay sing balor? Apang, wala sing isa sa ila nga mahulog sa duta nga indi mahibaluan sang inyo Amay. . . . Gani, indi kamo magkahadlok, mas importante pa kamo sangsa madamo nga maya.”—Mateo 10:29, 31.

Ang mensahe nga ginabantala sang mga disipulo ni Jesus magatunga sang mga panimalay, ang pila ka miembro sang pamilya magabaton sini kag ang iban indi. “Indi kamo maghunahuna nga nagkari ako sa pagdala sing paghidait sa duta,” paathag ni Jesus. Huo, dapat mangin maisog ang isa ka miembro sang pamilya nga batunon ang kamatuoran sang Biblia. “Ang nagahigugma sa iya amay ukon sa iya iloy labaw sa akon indi takus sa akon,” siling ni Jesus, “kag ang nagahigugma sa iya anak nga lalaki ukon sa iya anak nga babayi labaw sa akon indi takus sa akon.”—Mateo 10:34, 37.

Pero ang pila magabaton sa iya mga disipulo. Nagsiling sia: “Ang nagahatag sa isa sining mga kubos sing isa lamang ka kopa sang mabugnaw nga tubig nga mainom bangod disipulo ko sia, sa pagkamatuod nagasiling ako sa inyo, mabaton gid niya ang iya padya.”—Mateo 10:42.

Bangod bastante sa mga instruksion, paandam, kag pagpalig-on ni Jesus, naglakat ang mga apostoles “sa mga baryo, nga nagabantala sing maayong balita kag nagapang-ayo bisan diin.”—Lucas 9:6.

Magtuon sing Dugang Pa

ANG BIBLIA—ANO ANG MENSAHE SINI?

Maisugon nga Nagbantala ang mga Apostoles

Ano ang natabo sa tion sang Kapiestahan sang Pentecostes? Ano ang reaksion sang mga manugpamatok sa pagbantala sang mga disipulo ni Jesus?

PARA SA PAGTUON SANG BIBLIA

Magbatas nga May Kalipay!

Hibalua kon ano ang nakabulig kanday Pablo kag Silas nga mangin malipayon bisan pa ginahingabot.