Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 55

Madamo ang Nakibot sa Ginsiling ni Jesus

Madamo ang Nakibot sa Ginsiling ni Jesus

JUAN 6:48-71

  • PAGKAON SANG IYA UNOD KAG PAG-INOM SANG IYA DUGO

  • MADAMO ANG NASANDAD KAG WALA NA MAGSUNOD SA IYA

Sa sinagoga sa Capernaum, nagtudlo si Jesus nga sia ang matuod nga tinapay halin sa langit. Maathag nga dugang ini sa iya ginsiling sa mga tawo nga nagbalik halin sa sidlangan nga bahin sang Dagat sang Galilea, nga nagkaon sa iya gin-aman nga mga tinapay kag isda didto.

Nagpadayon si Jesus nga nagasiling: “Ang inyo mga katigulangan nagkaon sang manna sa kamingawan apang nagkalamatay sila.” Sa pagpatuhay, sia nagpaathag: “Ako ang buhi nga tinapay nga nagpanaug halin sa langit. Ang bisan sin-o nga magkaon sini nga tinapay magakabuhi sing dayon; sa pagkamatuod, ang tinapay nga akon ihatag agod mabuhi ang kalibutan amo ang akon unod.”—Juan 6:48-51.

Sang tigpamulak sang 30 C.E., ginsilingan ni Jesus si Nicodemo nga ginahigugma gid sang Dios ang kalibutan amo nga gin-aman niya ang iya Anak subong Manluluwas. Ginpadaku karon ni Jesus nga kinahanglan ang pagkaon sang iya unod paagi sa pagtuo sa pagahimuon niya nga halad. Paagi sa sini, mabaton ang kabuhi nga wala sing katapusan.

Pero wala nag-ugyon ang mga tawo sa ginsiling ni Jesus. “Paano mahatag sa aton sini nga tawo ang iya unod agod kaunon naton?” pamangkot nila. (Juan 6:52) Gusto ni Jesus nga hangpon nila ini sing malaragwayon, kag indi literal. Amo ini ang buot niya silingon nga makita sa iya masunod nga ginasiling.

“Kon indi kamo magkaon sang unod sang Anak sang tawo kag mag-inom sang iya dugo, indi kamo makatigayon sang kabuhi. Ang nagakaon sang akon unod kag nagainom sang akon dugo makatigayon sang kabuhi nga wala sing katapusan, . . . kay ang akon unod matuod nga pagkaon kag ang akon dugo matuod nga ilimnon. Ang nagakaon sang akon unod kag nagainom sang akon dugo nagapabilin nga nahiusa sa akon.”—Juan 6:53-56.

Hunahunaa kon daw ano ini ka makangilil-ad pamatian para sa mga Judiyo! Mahimo nagahunahuna sila nga ginapasanyog ni Jesus ang kanibalismo ukon ang paglapas sa kasuguan sang Dios nga indi magkaon sing dugo. (Genesis 9:4; Levitico 17:10, 11) Pero indi buot silingon ni Jesus nga literal nga magkaon sang unod ukon mag-inom sang dugo. Ginapakita niya nga ang tanan nga luyag sang kabuhi nga wala sing katapusan kinahanglan magtuo sa halad nga iya pagahimuon kon ihalad niya ang iya himpit tawhanon nga lawas kag ibubo ang iya dugo. Pero bisan ang madamo sa iya mga disipulo wala makahangop sini nga panudlo. Ang iban nagsiling: “Mabudlay batunon ang iya ginsiling; sin-o ang makahimo sina?”—Juan 6:60.

Bangod natalupangdan ni Jesus nga nagakumod ang pila niya ka disipulo, namangkot sia: “Nadula bala ang inyo pagtuo bangod sini? Ano pa gid ayhan kon makita ninyo ang Anak sang tawo nga nagakayab pabalik sa iya ginhalinan? . . . Ang ginasiling ko sa inyo halin sa espiritu kag nagahatag ini sing kabuhi. Apang may iban sa inyo nga wala nagapati.” Bangod sini, madamo nga disipulo ang naglakat kag wala na magsunod sa iya.—Juan 6:61-64.

Gani namangkot si Jesus sa iya 12 ka apostoles: “Luyag man bala ninyo magbiya?” Nagsabat si Pedro: “Ginuo, kay sin-o kami makadto? Ikaw ang may pinamulong sang kabuhi nga wala sing katapusan. Nagapati kami kag nahibaluan namon nga ikaw ang Balaan sang Dios.” (Juan 6:67-69) Pagkamainunungon gid ini, bisan pa sa sini nga tion wala mahangpan sing bug-os ni Pedro kag sang iban nga apostoles ini nga panudlo ni Jesus!

Bisan pa nahamuot sa sabat ni Pedro, si Jesus nagsiling: “Ginpili ko kamo nga 12, apang ang isa sa inyo mabinutangbutangon.” (Juan 6:70) Ang ginapatuhuyan ni Jesus amo si Judas Iscariote. Posible nga sa sini nga tion, nakita na niya nga nagasugod na si Judas sa paglisa sa husto nga dalanon.

Pero, pat-od nga nalipay gid si Jesus nga wala nagbiya si Pedro kag ang iban nga apostoles kag padayon nga nakigbahin sa iya nagaluwas-kabuhi nga hilikuton.