Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 22

Ang Apat ka Disipulo Mangin mga Mangingisda sang mga Tawo

Ang Apat ka Disipulo Mangin mga Mangingisda sang mga Tawo

MATEO 4:13-22 MARCOS 1:16-20 LUCAS 5:1-11

  • GINTAWAG NI JESUS ANG MGA DISIPULO PARA MAGSUNOD SA IYA SING BUG-OS TION

  • MGA MANGINGISDA INDI SANG ISDA KUNDI SANG TAWO

Pagkatapos nga gusto patyon sang mga taga-Nazaret si Jesus, nagkadto sia sa siudad sang Capernaum nga malapit sa Dagat sang Galilea, nga gintawag man “linaw sang Genesaret.” (Lucas 5:1) Katumanan ini sang tagna sa libro ni Isaias nga ang mga taga-Galilea nga nagaistar sa higad sang dagat makakita sing daku nga kasanag.—Isaias 9:1, 2.

Padayon nga ginpahibalo ni Jesus sa Galilea nga “ang Ginharian sang langit malapit na.” (Mateo 4:17) Nakita ni Jesus ang apat niya ka disipulo. Kaupod sila ni Jesus nga naglakbay sadto, pero sang nagpauli sila halin sa Judea, nagbalik sila sa ila negosyo nga pagpangisda. (Juan 1:35-42) Pero karon, dapat na sila mag-upod pirme kay Jesus para mahanas niya sila sa pagpadayon sang ministeryo kon wala na sia.

Sang nagalakat si Jesus sa baybayon, nakita niya si Simon Pedro, ang utod sini nga si Andres, kag ang iban nga kaupod nila nga nagatinlo sang mga pukot. Nagpalapit si Jesus kag nagsaka sa sakayan ni Pedro, kag ginsilingan ini nga magpatunga. Sang medyo nakapalayo na sila, nagpungko si Jesus kag nagtudlo sang mga kamatuoran parte sa Ginharian sa mga tawo nga nagtipon sa higad sang baybay.

Dayon si Jesus nagsiling kay Pedro: “Pakadtua ninyo ang sakayan sa madalom kag iladlad ang inyo mga pukot agod makakuha kamo sang isda.” Si Pedro nagsabat: “Instruktor, sa bug-os nga gab-i nangabudlay kami kag wala kami sing nakuha, apang bangod ginsiling mo, iladlad ko ang mga pukot.”—Lucas 5:4, 5.

Ginladlad nila ang mga pukot kag tuman ka damo ang ila nakuha nga isda amo nga nagisi ang mga pukot! Ginsenyasan dayon nila ang ila mga upod nga ara sa pihak nga sakayan para buligan sila. Napuno ang duha ka sakayan sang isda amo nga amat-amat ini nga naglugdang. Sang nakita ini ni Pedro, nagluhod sia sa atubang ni Jesus kag nagsiling: “Ginuo, palayo ka sa akon, kay ako makasasala nga tawo.” Si Jesus nagsabat: “Indi ka na magkahadlok. Kutob karon magapangisda ka sang buhi nga mga tawo.”—Lucas 5:8, 10.

Ginsilingan ni Jesus si Pedro kag si Andres: “Magsunod kamo sa akon, kay himuon ko kamo nga mga mangingisda sang mga tawo.” (Mateo 4:19) Gin-agda man niya ang duha pa ka mangingisda nga sanday Santiago kag Juan, nga mga anak ni Zebedeo. Gilayon man sila nga nagsunod sa iya. Gani ginbiyaan sining apat ang ila negosyo nga pagpangisda kag nangin una nga bug-os tion nga mga disipulo ni Jesus.

Magtuon sing Dugang Pa

Ginbatuan ni Pedro ang Kahadlok kag Pagpangduhaduha

Ang pagpangduhaduha makatalagam gid. Pero nabatuan ni Pedro ang iya kahadlok kag pagpangduhaduha parte sa pagsunod kay Jesus.