Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 32

Ano ang Ginatugot sang Kasuguan sa Adlaw nga Inugpahuway?

Ano ang Ginatugot sang Kasuguan sa Adlaw nga Inugpahuway?

MATEO 12:9-14 MARCOS 3:1-6 LUCAS 6:6-11

  • PAG-AYO SANG KAMOT SANG TAWO SA ADLAW NGA INUGPAHUWAY

Sang isa ka Adlaw nga Inugpahuway, nagkadto si Jesus sa sinagoga, nga mahimo sa Galilea. May nakita sia nga tawo didto nga naitus ang kamot. (Lucas 6:6) Ginapanilagan sing maayo sang mga escriba kag Fariseo si Jesus. Ngaa? Ginpakita nila ang ila tuyo sang namangkot sila: “Ginatugot bala sang kasuguan ang pagpang-ayo sa Adlaw nga Inugpahuway?”—Mateo 12:10.

Nagapati ang mga lider sang relihion sang mga Judiyo nga ang pagpang-ayo tugot sa Adlaw nga Inugpahuway kon delikado lang ang kabuhi. Halimbawa, indi tugot sa Adlaw nga Inugpahuway nga manghilot ukon magbendahe sang bali, kay indi man ini makamamatay. Maathag nga ang pagpamangkot sang mga escriba kag Fariseo kay Jesus indi bangod nabalaka sila sa pag-antos sang tawo. Luyag lang nila makakita sang rason nga pakamalauton sia.

Pero nahibaluan ni Jesus ang ila tiko nga pangatarungan. Narealisar niya nga sobra kag indi suno sa kasulatan ang ila pagtamod sa kon ano ang ginadilian nga mga obra sa Adlaw nga Inugpahuway. (Exodo 20:8-10) May naatubang na sia nga amo sini nga pagpakalain sang iya maayong mga buhat. Ginhimo karon ni Jesus ang dramatiko nga paghusayay paagi sa pagsiling sa tawo nga naitus ang kamot: “Magtindog ka kag magkadto sa tunga.”—Marcos 3:3.

Nagatulok sa mga escriba kag Fariseo, si Jesus nagsiling: “Kon kamo may isa ka karnero kag mahulog ini sa buho sa Adlaw nga Inugpahuway, sin-o sa inyo ang indi magkuha sini sa buho?” (Mateo 12:11) Ang karnero ginakapitalan, gani indi nila ini pagpabay-an sa buho asta sa masunod nga adlaw; mahimo ini mapatay kag mapierde sila. Kag bisan ang Kasulatan nagasiling: “Ang matarong nagaatipan sing maayo sang iya mga sapat.”—Hulubaton 12:10.

Sa pagpaanggid, si Jesus nagpadayon: “Ang isa ka tawo mas importante pa sangsa isa ka karnero! Gani ginatugot sang kasuguan ang paghimo sing maayo sa Adlaw nga Inugpahuway.” (Mateo 12:12) Gani wala malapas ni Jesus ang Adlaw nga Inugpahuway paagi sa pag-ayo sa tawo. Indi masupak sang mga lider sang relihion ining lohiko kag maluluy-on nga pangatarungan. Gani naghipos na lang sila.

Naakig kag nasubuan bangod sang ila sayop nga panghunahuna, nagtan-aw sa palibot si Jesus. Nian nagsiling sia sa tawo: “Untaya ang imo kamot.” (Mateo 12:13) Sang gin-untay sang tawo ang iya naitus nga kamot, nag-ayo ini. Nalipay gid ang tawo, pero ano ang epekto sini sa mga luyag pangitaan sing sala si Jesus?

Sa baylo nga malipay nga nag-ayo ang kamot sang tawo, naglakat dayon ang mga Fariseo kag naghimbon “sa partido sang mga Herodes agod mapatay nila [si Jesus].” (Marcos 3:6) Ining partido sang pulitika maathag nga nagalakip sang mga miembro sang grupo sang relihion nga ginatawag mga Saduceo. Pirme nagabangigay ang mga Saduceo kag Fariseo, pero subong nagtingob sila sa pagpamatok kay Jesus.

Magtuon sing Dugang Pa

SABAT SA MGA PAMANGKOT SA BIBLIA

Dapat Bala Magbantay sang Adlaw nga Inugpahuway ang mga Cristiano?

Kon indi, ngaa suno sa Biblia ang Adlaw nga Inugpahuway wala sing katapusan nga kasugtanan?