Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 107

Ginpatawag sang Hari ang mga Gin-agda sa Punsion sa Kasal

Ginpatawag sang Hari ang mga Gin-agda sa Punsion sa Kasal

MATEO 22:1-14

  • ILUSTRASYON PARTE SA PUNSION SA KASAL

Sang manugtapos na ang ministeryo ni Jesus, padayon sia nga naggamit sing mga ilustrasyon para ibuyagyag ang mga escriba kag ang puno nga mga saserdote. Gani luyag nila nga patyon sia. (Lucas 20:19) Pero wala pa matapos si Jesus sa pagbuyagyag sa ila. Nagsugid sia sang isa pa ka ilustrasyon:

“Ang Ginharian sang langit mahimo ipaanggid sa isa ka hari nga naghanda sing punsion sa kasal para sa iya anak. Ginsugo niya ang iya mga ulipon nga tawgon na ang mga inagda sa punsion, apang indi sila magtambong.” (Mateo 22:2, 3) Ginsugdan ni Jesus ang iya ilustrasyon paagi sa pagsambit sang “Ginharian sang langit.” Gani mahimo gid nga si Jehova nga Dios ang “hari.” Sin-o ang anak sang hari kag ang mga inagda sa punsion? Sa liwat, indi mabudlay kilalahon nga ang anak sang hari amo ang Anak ni Jehova, nga amo ang nagsugid mismo sang ilustrasyon, kag ang mga inagda amo ang mangin kaupod sang Anak sa Ginharian sang langit.

Sin-o ang mga una nga gin-agda? Ti, sin-o ang ginbantalaan ni Jesus kag sang mga apostoles parte sa Ginharian? Ang mga Judiyo. (Mateo 10:6, 7; 15:24) Ginbaton sini nga pungsod ang Kasuguan nga katipan sang 1513 B.C.E., amo nga sila ang prioridad nga mangin “ginharian sang mga saserdote.” (Exodo 19:5-8) Pero san-o gid sila pagaagdahon sa “punsion sa kasal”? Maathag nga ini nga imbitasyon natabo sang 29 C.E. sang nagsugod si Jesus sa pagbantala parte sa Ginharian sang langit.

Kag ano ang reaksion sang kalabanan nga Israelinhon sa imbitasyon? Subong sang ginsiling ni Jesus, “indi sila magtambong.” Ang kalabanan sa mga lider sang relihion kag sa katawhan wala magbaton sa iya subong Mesias kag gintangdo sang Dios nga Hari.

Pero ginpakita ni Jesus nga may isa pa ka kahigayunan ang mga Judiyo: “Ginsugo [sang hari] ang iban pa nga mga ulipon. Nagsiling sia, ‘Isiling ninyo sa mga inagda: “Handa na ang panyaga, naihaw na ang akon mga toro nga baka kag pinatambok nga mga sapat, kag handa na ang tanan. Kari na kamo sa punsion sa kasal.”’ Apang wala sila magsapak. Naglakat sila, ang isa sa iya uma, ang isa pa sa iya negosyo. Ang iban naman nagdakop sa iya mga ulipon, kag ginbunal sila kag ginpamatay.” (Mateo 22:4-6) Nagapatuhoy ini sa kon ano ang matabo kon matukod na ang Cristianong kongregasyon. Sa sina nga tion, may kahigayunan gihapon ang mga Judiyo nga mangin bahin sang Ginharian, pero ang kalabanan nagsikway sini nga imbitasyon, kag nagsakit pa gani sa ‘mga ulipon sang hari.’—Binuhatan 4:13-18; 7:54, 58.

Ano ang matabo sa sini nga pungsod? Si Jesus nagsiling: “Naakig gid ang hari kag ginsugo niya ang iya mga soldado nga pamatyon ang mga nagpamatay sang iya mga ulipon kag sunugon ang ila siudad.” (Mateo 22:7) Naeksperiensiahan ini sang mga Judiyo sang 70 C.E. sang ginlaglag sang mga Romano ang “ila siudad,” ang Jerusalem.

Ang pagpangindi bala nila sa pangagda sang hari nagakahulugan nga wala na sing agdahon? Indi, suno sa ilustrasyon ni Jesus. Padayon sia nga nagsiling: “Dayon ginsilingan [sang hari] ang iya mga ulipon, ‘Handa na ang punsion sa kasal, ugaling ang mga inagda indi takus. Gani kadto kamo sa mga dalan pagua sa siudad, kag agdaha ninyo sa punsion ang tanan nga inyo masugata.’ Gani, ang mga ulipon nagkadto sa mga dalan kag gin-agda nila ang tanan nga ila masugata, malain man ukon maayo; kag ang kalan-an sa punsion napuno sang mga bisita.”—Mateo 22:8-10.

Talalupangdon nga ginbuligan sang ulihi ni apostol Pedro ang mga Gentil—ang mga indi Judiyo halin sa pagkatawo ukon ang mga wala makumbertir—nga mangin matuod nga mga Cristiano. Sang 36 C.E., nabaton sang opisyal sang mga soldado sang Roma nga si Cornelio kag sang iya pamilya ang espiritu sang Dios, amo nga mangin bahin sila sang ginsambit ni Jesus nga Ginharian sang langit.—Binuhatan 10:1, 34-48.

Ginpakita ni Jesus nga indi tanan nga nagkadto sa punsion batunon sang “hari.” Nagsiling sia: “Sang nagsulod ang hari sa pagtan-aw sa mga bisita, nakita niya didto ang isa ka tawo nga wala nagasuksok sing bayo para sa kasal. Ginpamangkot sia sang hari, ‘Abyan, ngaa nakasulod ka diri nga wala nagasuksok sing bayo para sa kasal?’ Wala sia makasabat. Gani nagsiling ang hari sa iya mga alagad, ‘Gapusa ninyo ang iya kamot kag tiil kag ihaboy sia sa kadudulman sa gua. Didto magahibi sia kag magapabagrot sang iya mga ngipon.’ Kay madamo ang gin-agda, apang diutay lang ang ginpili.”—Mateo 22:11-14.

Mahimo nga wala nahangpan sang mga lider sang relihion nga nagapamati kay Jesus ang kahulugan sang tanan niya nga ginsiling. Pero wala sila nahamuot sa sini kag nangin determinado pa gid sila nga patyon ang isa nga nagapakahuya sa ila.

Magtuon sing Dugang Pa

ANG LALANTAWAN

Si Jehova “Wala sing Ginapasulabi”

Ang Dios nagapamati sa pangamuyo sang iya mga sumilimba bisan ano man ang ila rasa, nasyonalidad, ukon tindog sa komunidad. Paano naton ina nahibaluan?