Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 112

Leksion Parte sa Padayon nga Pagbantay—Ang mga Birhen

Leksion Parte sa Padayon nga Pagbantay—Ang mga Birhen

MATEO 25:1-13

  • GINSUGID NI JESUS ANG ILUSTRASYON PARTE SA NAPULO KA BIRHEN

Ginsabat ni Jesus ang pamangkot sang iya mga apostoles parte sa tanda sang iya presensia kag sang hingapusan sang sistema sang mga butang. Samtang ginahunahuna ini ni Jesus, naghatag sia sa ila sing maalamon nga laygay paagi sa isa pa ka ilustrasyon. Ang katumanan sini makita sang mga magakabuhi sa tion sang iya presensia.

Gin-umpisahan niya ang ilustrasyon sa pagsiling: “Ang Ginharian sang langit mahimo mapaanggid sa napulo ka birhen nga nagkuha sang ila mga suga agod sugataon ang kalaslon nga nobyo. Ang lima sa ila buangbuang, kag ang lima mainandamon.”—Mateo 25:1, 2.

Indi buot silingon ni Jesus nga ang katunga sang iya mga disipulo nga magapanubli sang Ginharian sang langit mga buangbuang kag ang katunga mga mainandamon. Sa baylo, ang punto niya amo nga makapili ang kada isa sa iya mga disipulo kon mangin mabinantayon sila ukon magpatublag, may kaangtanan sa Ginharian. Pero nagasalig si Jesus nga makapabilin nga matutom ang kada isa sang iya mga alagad kag makabaton sang mga pagpakamaayo sang iya Amay.

Sa ilustrasyon, naggua ang napulo ka birhen sa pag-abiabi sa nobyo kag magaupod sila sa prosesyon sa kasal. Kon mag-abot sia, pasanagan sang mga birhen ang alagyan paagi sa ila mga suga, nga nagapadungog sa iya samtang ginadala niya ang iya nobya sa balay nga ginhanda para sa sini. Pero ano ang natabo?

Si Jesus nagpaathag: “Ang mga buangbuang nagdala sang ila mga suga apang wala sila magbalon sing dugang nga lana, samtang ang mga mainandamon nagdala sang ila mga suga kag nagbalon sang suludlan nga may lana. Bangod madugay mag-abot ang nobyo, gintuyo sila tanan kag natulugan.” (Mateo 25:3-5) Wala mag-abot ang nobyo sa tion nga ginapaabot. Daw kadugay sa iya mag-abot, amo nga natulugan ang mga birhen. Mahimo nga nadumduman sang mga apostoles ang ginsugid ni Jesus parte sa isa ka dungganon nga tawo nga naglakbay kag ‘nagbalik sang nabaton na niya ang pagkahari.’—Lucas 19:11-15.

Sa ilustrasyon parte sa napulo ka birhen, ginlaragway ni Jesus ang natabo sang nag-abot na ang nobyo: “Sang tungang-gab-i na may nagsinggit: ‘Yari na ang nobyo! Gua kamo kag sugataa ninyo sia.’” (Mateo 25:6) Handa bala kag padayon nga nagabantay ang mga birhen?

Nagsiling pa si Jesus: “Gani nagbangon ang napulo ka birhen kag ginhanda nila ang ila mga suga. Ang mga buangbuang nagsiling sa mga mainandamon, ‘Hatagi kami sang inyo lana, kay nagapiraw na ang amon mga suga.’ Ang mga mainandamon nagsabat: ‘Kon hatagan namon kamo basi kulangon kami. Magkadto na lang kamo sa mga nagabaligya kag magbakal.’”—Mateo 25:7-9.

Gani ang lima ka buangbuang nga birhen wala nagabantay kag indi handa sa pag-abot sang nobyo. Kulang ang ila lana para sa ila mga suga kag dapat sila magbakal. Nagsiling si Jesus: “Sang naglakat sila agod magbakal sing lana, nag-abot man ang nobyo. Ang nakahanda nga mga birhen nag-upod sa iya sa punsion. Kag pagsulod gid nila, ginsiraduhan dayon ang puertahan. Sang ulihi, nag-abot man ang iban nga mga birhen. Nagsiling sila, ‘Ginuo, Ginuo, buksi kami!’ Nagsabat sia, ‘Wala ako makakilala sa inyo.’” (Mateo 25:10-12) Masubo gid ini nga resulta bangod wala sila magpabilin nga handa kag nagabantay!

Mahangpan sang mga apostoles nga si Jesus ang nobyo nga ginsambit niya. Antes sini, ginpaanggid niya ang iya kaugalingon sa isa ka nobyo. (Lucas 5:34, 35) Kag sin-o ang ginapatuhuyan sang maalam nga mga birhen? Sang ginpatuhuyan ni Jesus ang “diutay nga panong,” nga pagahatagan sang Ginharian, nagsiling sia: “Magpanapot kamo kag maghanda kag pasigaha ang inyo mga suga.” (Lucas 12:32, 35) Gani sa sini nga ilustrasyon parte sa mga birhen, mahangpan sang mga apostoles nga ang matutom nga mga disipulo kaangay nila ang ginapatuhuyan ni Jesus. Kon amo, ano ang mensahe ni Jesus sa sini nga ilustrasyon?

Ginsugid ini ni Jesus. Amo ini ang konklusion sa iya ilustrasyon: “Gani, magpadayon kamo sa pagbantay, bangod wala kamo makahibalo sang adlaw ukon sang oras.”—Mateo 25:13.

Maathag nga ginlaygayan ni Jesus ang iya matutom nga mga sumulunod nga dapat sila ‘magpadayon sa pagbantay’ sa tion sang iya presensia. Maabot sia, kag dapat sila mangin handa kag padayon nga nagabantay—pareho sang lima ka mainandamon nga birhen—para indi nila madula ang ila hamili nga paglaum kag padya.

Magtuon sing Dugang Pa

Ano Gid ang Ginatudlo sang Biblia?

Nagakabuhi Bala Kita sa “Katapusan nga mga Adlaw”?

Binagbinaga kon paano ang ginahimo kag batasan sang mga tawo sa palibot naton nangin ebidensia nga nagakabuhi kita subong sa “katapusan nga mga adlaw” nga gintagna sang Biblia.

ANG LALANTAWAN

Ano ang Katuyuan sang Pagbalik sang Cristo?

Ano ang katuyuan sang pagbalik sang Cristo? Sa ano nga paagi sia magabalik, kag ano ang iya himuon?

ANG LALANTAWAN (TULUN-AN NGA EDISYON)

Magapadayon Bala Kamo sa Pagbantay?

Basaha ining gin-athag nga paghangop sa parabola ni Jesus tuhoy sa napulo ka birhen, nga nagapadaku sang simple kag importante nga mensahe sini.