Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 121

“Magpakabakod Kamo! Nadaug Ko ang Kalibutan”

“Magpakabakod Kamo! Nadaug Ko ang Kalibutan”

JUAN 16:1-33

  • INDI NA MAKITA SANG MGA APOSTOLES SI JESUS

  • ANG KASUBO SANG MGA APOSTOLES ISLAN SANG KALIPAY

Manughalin na si Jesus kag ang mga apostoles sa kuarto sa ibabaw diin nagpanihapon sila sa Paskua. Pagkatapos sila malaygayan, si Jesus nagdugang: “Ginasugid ko ini sa inyo agod indi kamo masandad.” Ngaa nagakaigo gid ini nga paandam? Ginsugiran niya sila: “Sikwayon kamo sang mga tawo sa sinagoga. Sa pagkamatuod, magaabot ang tion nga ang tanan nga magapatay sa inyo magahunahuna nga nagahimo sila sing sagrado nga pag-alagad sa Dios.”—Juan 16:1, 2.

Mahimo kinulbaan ang mga apostoles sa sini. Bisan pa ginsilingan na sila sadto ni Jesus nga dumtan sila sang kalibutan, wala niya sila direkta nga ginsilingan nga pagapatyon sila. Ngaa? “Wala ko ini ginsugid sa inyo sang una, kay kaupod pa ninyo ako,” siling niya. (Juan 16:4) Karon ginapaandaman niya sila antes sia magbiya. Mahimo ini magbulig sa ila nga indi masandad sa ulihi.

Si Jesus nagpadayon: “Makadto na ako sa Isa nga nagpadala sa akon; apang wala sing isa sa inyo ang nagpamangkot sa akon, ‘Diin ka makadto?’ ” Temprano pa sina nga gab-i, namangkot sila kon diin sia makadto. (Juan 13:36; 14:5; 16:5) Pero karon, bangod kinulbaan sila sa ginsiling niya parte sa paghingabot, grabe gid ang ila kasubo. Gani wala na sila makapamangkot parte sa nagahulat sa iya nga himaya ukon sa kahulugan sini sa matuod nga mga sumilimba. Si Jesus nagsiling: “Bangod ginsugiran ko na kamo, nagkasubo gid kamo.”—Juan 16:6.

Dayon si Jesus nagpaathag: “Para sa inyo kaayuhan nga malakat ako. Kay kon indi ako maglakat, ang manugbulig indi gid mag-abot sa inyo; apang kon maglakat ako, ipadala ko sia sa inyo.” (Juan 16:7) Kinahanglan anay mapatay si Jesus kag magkadto sa langit para mabaton sang iya mga disipulo ang balaan nga espiritu, nga ipadala niya nga manugbulig sa iya katawhan sa bilog nga kalibutan.

Ipakita sang balaan nga espiritu “sa kalibutan kon ano ang sala, kon ano ang pagkamatarong, kag kon ano ang paghukom sang Dios.” (Juan 16:8) Huo, malapit na lang ibuyagyag nga ang kalibutan wala nagatuo sa Anak sang Dios. Ang pagkayab ni Jesus sa langit magapamatuod sang iya pagkamatarong kag magapakita kon ngaa nagakadapat laglagon si Satanas, “ang manuggahom sini nga kalibutan.”—Juan 16:11.

“Madamo pa kuntani ako sing isugid sa inyo,” siling pa ni Jesus, “apang indi pa ninyo ini mahangpan subong.” Kon ibubo na niya ang balaan nga espiritu, giyahan sila sini nga mahangpan ang “tanan nga kamatuoran,” kag magakabuhi sila suno sa sina nga kamatuoran.—Juan 16:12, 13.

Naglibog pa gid ang ulo sang mga apostoles sa masunod nga ginsiling ni Jesus: “Sa indi madugay, indi na ninyo ako makita, kag sa indi man madugay, makita ninyo ako.” Nagpamangkutanay sila kon ano ang iya buot silingon. Narealisar ni Jesus nga gusto nila mamangkot parte sa sini, gani nagpaathag sia: “Sa pagkamatuod nagasiling ako sa inyo, magahibi kamo kag magahaya, apang ang kalibutan magakasadya; magakasubo kamo, apang ang inyo kasubo pagabayluhan sang kalipay.” (Juan 16:16, 20) Sang ginpatay si Jesus pagkasunod nga hapon, nalipay ang mga lider sang relihion, pero nasubuan ang mga disipulo. Pero ang ila kasubo naislan sang kalipay sang ginbanhaw si Jesus! Kag padayon sila nga nalipay sang ginbubo niya sa ila ang balaan nga espiritu sang Dios.

Ginkomparar ni Jesus ang kahimtangan sang mga apostoles sa nagapasakit nga manugbata nga babayi: “Kon ang babayi manugbata nagapasakit sia, apang kon mabun-ag na ang bata, malimtan na niya ang kasakit bangod sang iya kalipay nga nabun-ag ang isa ka bata sa kalibutan.” Ginpalig-on ni Jesus ang iya mga apostoles: “Nagakasubo man kamo karon; apang makigkita ako liwat sa inyo kag magakasadya gid kamo, kag wala sing bisan sin-o nga makakuha sang inyo kalipay.”—Juan 16:21, 22.

Tubtob sini nga tion, wala pa makapangabay ang mga apostoles sa ngalan ni Jesus. Sia nagsiling: “Sa sina nga adlaw magapangabay kamo sa Amay sa akon ngalan.” Ngaa? Indi bangod nagapangalag-ag ang Amay sa pagsabat sa ila. Ang matuod, si Jesus nagsiling: “Ginahigugma kamo sang Amay, bangod ginahigugma ninyo ako . . . subong tiglawas sang Dios.”—Juan 16:26, 27.

Ginpalig-on ni Jesus ang mga apostoles, gani nangin kumbinsido sila: “Bangod sini, nagapati kami nga ikaw halin sa Dios.” Ina nga pagpati pagatilawan sa indi madugay. Ang matuod, ginlaragway ni Jesus ang mahanabo sa ulihi: “Magaabot ang tion kag magaabot ini sa indi madugay, nga magalinapta kamo kay magapalauli kamo sa inyo kaugalingon nga balay kag bayaan ninyo ako nga nagaisahanon.” Pero ginpasalig niya sila: “Ginsugid ko ini sa inyo agod paagi sa akon may paghidait kamo. Sa kalibutan may kapipit-an kamo, apang magpakabakod kamo! Nadaug ko ang kalibutan.” (Juan 16:30-33) Indi sila pagpabay-an ni Jesus. Napat-od niya nga madaug man nila ang kalibutan, pareho niya, paagi sa matutom nga pagtuman sa kabubut-on sang Dios bisan pa ginatinguhaan ni Satanas kag sang iya kalibutan nga gub-on ang ila integridad.