Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 120

Mga Sanga nga Nagapamunga kag mga Abyan ni Jesus

Mga Sanga nga Nagapamunga kag mga Abyan ni Jesus

JUAN 15:1-27

  • ANG MATUOD NGA PUNO SANG UBAS KAG ANG MGA SANGA

  • KON PAANO MAGPABILIN SA GUGMA NI JESUS

Ginapalig-on ni Jesus ang iya matutom nga mga apostoles sa iya serioso nga pagpakig-istorya sa ila. Halos kaagahon na. Dayon ginsugid sa ila ni Jesus ang makapabakod nga ilustrasyon:

“Ako ang matuod nga puno sang ubas, kag ang akon Amay amo ang mangunguma,” siling niya. (Juan 15:1) Ang iya ilustrasyon may kaanggid sa siniglo na nga ginsiling parte sa pungsod sang Israel, nga gintawag sadto nga puno sang ubas ni Jehova. (Jeremias 2:21; Oseas 10:1, 2) Pero ginsikway ni Jehova ina nga pungsod. (Mateo 23:37, 38) Gani bag-o naman nga ideya ang ginasiling ni Jesus. Sia ang puno sang ubas nga ginpadaku sang iya Amay sugod sang ginhaplasan sia sang balaan nga espiritu sang 29 C.E. Pero ginapakita ni Jesus nga indi lang sia ang ginasimbulo sang puno sang ubas sang nagsiling sia:

“Ang akon tagsa ka sanga nga wala nagapamunga ginautod [sang akon Amay], kag ang tagsa ka sanga nga nagapamunga ginatinluan niya, agod magpamunga ini sing madamo pa. . . . Subong nga ang sanga indi makapamunga kon wala nagaangot sa puno sang ubas, kamo man indi makapamunga kon indi kamo magpabilin nga nahiusa sa akon. Ako ang puno sang ubas; kamo ang mga sanga.”—Juan 15:2-5.

Nagpromisa si Jesus sa iya matutom nga mga disipulo nga kon magbiya na sia, magapadala sia sing manugbulig, ang balaan nga espiritu. Pagligad sang 51 ka adlaw, sang nabaton sang mga apostoles kag sang iban pa ina nga espiritu, nangin mga sanga sila sang puno sang ubas. Kag ang tanan nga “sanga” kinahanglan magpabilin nga nahiusa kay Jesus. Para matuman ang ano?

Nagpaathag sia: “Ang bisan sin-o nga nagapabilin nga nahiusa sa akon kag ako nahiusa sa iya, nagapamunga sing madamo; kay kon nahamulag kamo sa akon wala gid kamo sing mahimo.” Ini nga mga “sanga”—ang iya matutom nga mga sumulunod—magapamunga sing madamo, nga nagailog sa mga kinaiya ni Jesus, aktibo nga nagasugid sa iban parte sa Ginharian sang Dios, kag nagatudlo sa mas madamo nga tawo para mangin disipulo. Paano kon ang isa indi magpabilin nga nahiusa kay Jesus kag wala nagapamunga? Si Jesus nagpaathag: “Kon ang bisan sin-o indi magpabilin nga nahiusa sa akon, mangin kaangay sia sang sanga nga ginpilak.” Sa pihak nga bahin, nagsiling si Jesus: “Kon magpabilin kamo nga nahiusa sa akon kag ang akon mga pulong magpabilin sa inyo, ang bisan ano nga pangayuon ninyo, ihatag sa inyo.”—Juan 15:5-7.

Karon, ginsambit liwat ni Jesus ang makaduha na niya nga ginsiling—ang pagtuman sa iya mga sugo. (Juan 14:15, 21) Ginlaragway niya ang panguna nga paagi nga mapamatud-an sang mga disipulo nga nagatuman sila: “Kon ginatuman ninyo ang akon mga sugo, magapabilin kamo sa akon gugma, subong nga ginatuman ko ang mga sugo sang Amay kag nagapabilin ako sa iya gugma.” Pero indi lang ang paghigugma kay Jehova nga Dios kag sa iya Anak ang kinahanglan. Si Jesus nagsiling: “Ini amo ang akon sugo, nga maghigugmaanay kamo kaangay sang paghigugma ko sa inyo. Wala sing makalabaw sa gugma sang isa nga naghatag sang iya kabuhi para sa iya mga abyan. Mga abyan ko kamo kon ginahimo ninyo ang ginasugo ko sa inyo.”—Juan 15:10-14.

Sa masunod nga mga inoras, ipakita ni Jesus ang iya gugma paagi sa paghatag sang iya kabuhi para sa tanan nga nagatuo sa iya. Ang iya halimbawa dapat magpahulag sa iya mga sumulunod nga magpakita sing masinakripisyuhon nga gugma sa isa kag isa. Ini nga gugma ang magapakilala sa ila, subong sang ginsiling niya sadto: “Paagi sini mahibaluan sang tanan nga mga disipulo ko kamo, kon nagahigugmaanay kamo.”—Juan 13:35.

Dapat madumduman sang mga apostoles nga gintawag sila ni Jesus nga “mga abyan.” Ginsugid niya kon ngaa: “Ginatawag ko kamo nga mga abyan, bangod ang tanan nga butang nga nabatian ko sa akon Amay ginapahibalo ko sa inyo.” Hamili gid ini nga kaangtanan—nga mangin suod nga abyan ni Jesus kag mahibaluan ang ginsiling sa iya sang Amay! Pero agod matigayon ini nga kaangtanan, dapat ‘padayon sila nga magpamunga.’ Kon himuon nila ini, nagsiling si Jesus, “bisan ano man ang pangayuon ninyo sa Amay sa akon ngalan, ihatag niya ini sa inyo.”—Juan 15:15, 16.

Ang gugma sa tunga sining mga “sanga,” ang iya mga disipulo, amo ang magabulig sa ila nga magbatas sa palaabuton. Ginpaandaman niya sila nga dumtan sila sang kalibutan, pero ginpabakod niya sila: “Kon ginadumtan kamo sang kalibutan, nakahibalo kamo nga antes sa inyo, una nila ako nga gindumtan. Kon kamo bahin sang kalibutan, higugmaon kamo sang kalibutan, kay ini ang nagapanag-iya sa inyo. Apang ginadumtan kamo sang kalibutan bangod indi kamo bahin sang kalibutan.”—Juan 15:18, 19.

Para ipaathag pa gid kon ngaa dumtan sila sang kalibutan, si Jesus nagdugang: “Himuon nila ini tanan nga butang batok sa inyo tungod sa akon ngalan, bangod wala sila makakilala sa Isa nga nagpadala sa akon.” Nagsiling si Jesus nga ang iya milagruso nga mga buhat daw kasubong nga nagahukom sa mga nagadumot sa iya: “Kon wala ko paghimua sa atubangan nila ang mga buhat nga wala sing iban nga nakahimo, wala sila kuntani sing sala; apang karon nga nakita nila ini, gindumtan nila ako kag gindumtan man nila ang akon Amay.” Ang matuod, ang ila pagdumot nagtuman sang tagna.—Juan 15:21, 24, 25; Salmo 35:19; 69:4.

Sa liwat, nagpromisa si Jesus nga magapadala sia sing manugbulig, ang balaan nga espiritu. Ining gamhanan nga puersa mabaton sang tanan niya nga sumulunod kag makabulig ini sa ila nga mamunga, ukon ‘magpanaksi.’—Juan 15:27.