Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

Para Mailog si Jesus, Dapat ka Mangin . . .

Para Mailog si Jesus, Dapat ka Mangin . . .

MALULUY-ON

Bangod himpit nga tawo si Jesus, wala sia makaeksperiensia sang madamo nga kabudlayan kag kabalaka nga naagyan sang iban. Pero palangga niya ang mga tawo. Handa sia magbulig sa ila, kag himuon ang labaw pa sa kinahanglanon. Huo, napahulag sia sang kaluoy sa pagbulig sa iban. Binagbinaga ang mga halimbawa sa Kapitulo 32, 37, 57, 99.

MAHAPOS PALAPITAN

Nabatyagan sang tanan nga tawo—bata man ukon tigulang—nga makapalapit sila kay Jesus bangod may tion gid sia para sa ila kag wala sia nagapakaimportante. Bangod nabatyagan sang mga tawo nga nabalaka si Jesus sa ila, wala sila natahap sa iya. Para mahibaluan mo ini, tan-awa ang Kapitulo 25, 27, 95.

MAPINANGAMUYUON

Regular nga nagapangamuyo sing hanuot si Jesus sa iya Amay, kon nagaisahanon kag kon kaupod niya ang matuod nga mga sumilimba. Nangamuyo sia sa madamo nga higayon, indi lang kon tigkalaon. Nangamuyo sia para pasalamatan kag dayawon ang iya Amay, kag para mangayo sang iya panuytoy antes maghimo sing serioso nga mga desisyon. Binagbinaga ang mga halimbawa sa Kapitulo 24, 34, 91, 122, 123.

INDI MAIYAIYAHON

Kon kaisa, bisan gusto na magpahuway kag magrelaks ni Jesus, ginauna niya gihapon ang kinahanglanon sang iban. Wala sia sing panimuot nga ‘ako anay.’ Sa sini man nga bahin, nangin halimbawa sia nga mahimo naton sundon sing maayo. Tun-i kon paano niya ini ginpakita sa Kapitulo 19, 41, 52.

MAPINATAWARON

Wala lamang gintudlo ni Jesus nga kinahanglan magpatawad—ginhimo niya ini mismo sa iya pagpakig-angot sa iya mga disipulo kag sa iban. Pamalandungi ang mga halimbawa nga makita sa Kapitulo 26, 40, 64, 85, 131.

MAKUGI

Gintagna nga ang kalabanan nga Judiyo indi magbaton sa Mesias, kag pagapatyon sia sang iya mga kaaway. Gani mahimo kuntani nga ginlimitehan na lang ni Jesus ang iya ginhimo para sa mga tawo. Pero, makugi niya nga ginpasanyog ang matuod nga pagsimba. Nagpakita sia sing halimbawa sang kakugi sa tanan niya nga sumulunod nga mahimo indi pagsapakon sang iban ukon pamatukan pa gani. Tan-awa ang Kapitulo 16, 72, 103.

MAPAINUBUSON

Mas superyor si Jesus sa indi himpit nga mga tawo sa madamo nga paagi, pareho sang ihibalo kag kaalam. Bangod himpit sia, mas labaw ang iya pisikal kag mental nga ikasarang sangsa kay bisan sin-o nga tawo. Pero mapainubuson sia nga nag-alagad sa iban. Makita mo ang mga leksion parte sa sini sa Kapitulo 10, 62, 66, 94, 116.

MAPINASENSIAHON

Mapinasensiahon gihapon si Jesus sa iya mga apostoles kag sa iban bisan pa indi nila mailog ang iya halimbawa ukon maaplikar ang iya gintudlo. Mapinasensiahon niya nga ginaliwatliwat ang mga leksion nga kinahanglanon nila para mangin suod kay Jehova. Binagbinaga ang mga halimbawa sang pagkamapinasensiahon ni Jesus sa Kapitulo 74, 98, 118, 135.