Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

Ang Dalan, ang Kamatuoran, ang Kabuhi

Ang Dalan, ang Kamatuoran, ang Kabuhi

Mahimo nalipay ka kon may maayo nga balita. Kag pat-od gid nga may maayo nga balita para sa imo kag sa imo mga hinigugma.

Ini nga balita yara sa Biblia, ang libro nga ginpasulat sang Manunuga sang uniberso, nga si Jehova nga Dios, mga tinuig na ang nagligad. Sa sini nga publikasyon, binagbinagon naton ang apat ka libro sa Biblia nga nagaunod sing maayo gid nga balita para sa aton tanan. Nakilala ini nga mga libro sa ngalan sang mga gingamit sang Dios sa pagsulat sini—Mateo, Marcos, Lucas, kag Juan.

Ginatawag sang madamo ining apat ka rekord nga apat ka Ebanghelyo. Ining apat nagsaysay sang ebanghelyo, ukon maayong balita, parte kay Jesus—nga sia ang paagi sang Dios sa pagluwas kag bilang Hari sang langitnon nga Ginharian sang Dios, magadala si Jesus sing permanente nga mga pagpakamaayo sa tanan nga nagatuo sa iya.—Marcos 10:17, 30; 13:13.

NGAA APAT KA EBANGHELYO?

Mahimo nakapamensar ka kon ngaa ginpasulat sang Dios ang apat ka rekord sang kabuhi kag mga panudlo ni Jesus.

May mga benepisyo kon ngaa apat ka rekord ang nagasaysay sang ginhambal kag ginhimo ni Jesus. Para iilustrar, imadyina nga may apat ka tawo nga nagatindog malapit sa bantog nga manunudlo. Ang tawo sa atubangan sang manunudlo manugsukot sing buhis. Ang ara sa tuo isa ka doktor. Ang nagapamati sa wala nayon isa ka mangingisda kag suod nga abyan sang manunudlo. Kag ang ara sa likod amo ang pinakabata sa ila nga apat. Tanan sila mga bunayag, kag lainlain ang interes sang kada isa sa ila. Kon isulat sang tagsa sa ila ang ginasiling kag ginahimo sang manunudlo, mahimo lainlain nga detalye ukon hitabo ang ila marekord. Kon binagbinagon ining apat ka rekord, nga nagahunahuna sang lainlain nga anggulo ukon tulumuron, mahibaluan naton ang kabug-usan nga ginhambal kag ginhimo sang manunudlo. Ginailustrar sini kon paano kita makabenepisyo sa apat ka rekord sang kabuhi sang Dakung Manunudlo, si Jesus.

Sa pagpadayon sang ilustrasyon, gusto sang manugsukot sing buhis nga mangin interesado ang mga Judiyo sa iya rekord, gani gingrupo niya ang pila ka panudlo ukon mga hitabo sa paagi nga mabuligan sila subong panguna nga bumalasa. Ginpadaku naman sang doktor ang pag-ayo sa mga nagamasakit ukon piang ukon lupog, gani wala niya ginlakip ang pila sa ginrekord sang manugsukot sing buhis ukon lain ang iya pagpasunod. Ang suod naman nga abyan nagpadaku sang mga balatyagon kag kinaiya sang manunudlo. Ang pinakabata naman sa ila mas malip-ot ang nasulat pero maathag. Apang husto ang rekord sang kada isa. Ginailustrar sini nga makabulig sa aton ang apat ka rekord sang kabuhi ni Jesus nga mahangpan ang iya mga hilikuton, panudlo, kag personalidad.

Mahimo ginatawag ini sang mga tawo nga ‘Ebanghelyo ni Mateo’ ukon ‘Ebanghelyo ni Juan.’ Indi man ini sala, kay ang tagsa sini nagaunod sing “maayong balita parte kay Jesucristo.” (Marcos 1:1) Pero sa kabilugan, isa lang ang ebanghelyo, ukon maayong balita, parte kay Jesus—nga mabasa naton sa apat ka rekord.

Madamo nga nagatuon sa Pulong sang Dios ang nagpaanggid kag nagpahisanto sang mga hitabo kag kamatuoran nga makita sa Mateo, Marcos, Lucas, kag Juan. Sang mga 170 C.E., ginhimo ini sang manunulat nga si Tatian nga taga-Siria. Ginkilala niya ining apat ka libro nga sibu kag gintuytuyan sang Dios, kag ginhimo niya ang Diatessaron, ang gintingob nga kasaysayan sang kabuhi kag ministeryo ni Jesus.

Amo man sini ang ginhimo sang libro nga Si Jesus—Ang Dalan, ang Kamatuoran, ang Kabuhi, pero mas sibu ini kag kompleto. Nangin posible ini bangod mas nahangpan na naton karon ang katumanan sang madamo nga tagna kag ilustrasyon ni Jesus. Bangod sini, mas maathag na ang iya ginsiling kag ginhimo, subong man ang pagpasunod sang mga hitabo. Bangod sang mga nadiskobrehan man sang mga arkeologo, nangin maathag ang pila ka detalye kag pagtamod sang mga manunulat. Siempre, wala sing makapat-od sang pagpasunod sang tagsa ka hitabo. Pero ginasaysay sini nga libro kon ano ang makatarunganon kag lohikal.

ANG DALAN, ANG KAMATUORAN, ANG KABUHI

Samtang ginabasa mo ini nga libro, hunahunaa ang panguna nga mensahe sini para sa imo kag sa imo mga hinigugma. Dumduma nga si Jesucristo mismo ang nagsiling kay apostol Tomas: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.”—Juan 14:6.

Ang libro nga Si Jesus—Ang Dalan, ang Kamatuoran, ang Kabuhi makabulig sa imo nga maapresyar kon paano si Jesus nangin “ang dalan.” Paagi lamang sa iya makapalapit kita kay Jehova nga Dios sa pangamuyo. Dugang pa, si Jesus ang dalan agod mapasag-uli kita sa Dios. (Juan 16:23; Roma 5:8) Gani, paagi lamang kay Jesus nga mangin maayo ang aton kaangtanan sa Dios.

Si Jesus “ang kamatuoran.” Naghambal sia kag nagkabuhi nahisuno sa kamatuoran; nga daw ang kamatuoran nag-abot paagi kay Jesus. Gintuman niya ang madamo nga tagna, nga “nangin ‘huo’ paagi kay Jesus.” (2 Corinto 1:20; Juan 1:14) Ini nga mga tagna nagabulig sa aton nga makita ang panguna niya nga bahin sa katumanan sang katuyuan sang Dios.—Bugna 19:10.

Kag si Jesucristo “ang kabuhi.” Paagi sa gawad, ang paghatag niya sang iya himpit nga kabuhi kag dugo, nangin posible ang pagtigayon naton sang “matuod nga kabuhi,” ang “kabuhi nga wala sing katapusan.” (1 Timoteo 6:12, 19; Efeso 1:7; 1 Juan 1:7) Sia man “ang kabuhi” para sa minilyon nga napatay pero pagabanhawon nga may paglaum nga mabuhi sing wala sing katapusan sa Paraiso.—Juan 5:28, 29.

Dapat naton tanan apresyahon ang bahin ni Jesus sa katuyuan sang Dios. Kabay nga malipay ka sa pagtuon pa gid parte kay Jesus—“ang dalan kag ang kamatuoran kag ang kabuhi.”

Magtuon sing Dugang Pa

Ano ang Katuyuan sang Dios Para sa Duta?

Ginapaathag sang Biblia kon ngaa gintuga sang Dios ang duta, kon san-o madula ang pag-antos, kag kon ano ang matabo sa duta sa palaabuton kag sa mga nagaistar sa sini.

Ngaa Masaligan Mo ang mga Ebanghelyo sang Biblia?

Binagbinaga ang mga pamatuod sang dumaan nga mga manuskrito.