Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 8

Nakapalagyo Sila sa Malain nga Manuggahom

Nakapalagyo Sila sa Malain nga Manuggahom

MATEO 2:13-23

  • ANG PAMILYA NI JESUS NALAGYO PAKADTO SA EGIPTO

  • GINSAYLO NI JOSE ANG IYA PAMILYA SA NAZARET

Ginpukaw ni Jose si Maria para sugiran sia sang balita. Bag-o lang nagpakita ang anghel ni Jehova kay Jose paagi sa damgo, nga nagasiling sa iya: “Bangon ka, dalha ang bata kag ang iya iloy kag magpalagyo kamo sa Egipto, kag magpabilin kamo didto tubtob magsiling ako nga magbalik na kamo, kay pangitaon ni Herodes ang bata agod patyon sia.”—Mateo 2:13.

Gilayon nga nalagyo sina nga gab-i sanday Jose, Maria, kag ang ila bata. Eksakto gid ang ila pagpalagyo kay nabal-an ni Herodes nga gindayaan sia sang mga astrologo. Ginsilingan niya sila nga magbalik sa iya. Pero naglakat sila kag wala na magbalik. Naakig gid si Herodes. Bangod gusto gid niya patyon si Jesus, nagmando sia nga patyon ang tanan nga bata nga lalaki sa Betlehem kag sa palibot sini nga nagaedad sing duha ka tuig paubos. Ginbulubanta niya ini nga edad base sa ginsiling sang mga astrologo nga naghalin sa Sidlangan.

Grabe gid ang pagpamatay sa mga bata! Wala naton mahibaluan kon pila ang ginpatay, pero ang masakit nga paghilibion kag paghaya sang mga iloy nagtuman sa gintagna sa Biblia paagi sa manalagna sang Dios nga si Jeremias.—Jeremias 31:15.

Nakapalagyo si Jose kag ang iya pamilya sa Egipto, kag didto na sila nag-istar. Sang isa ka gab-i, nagpakita liwat ang anghel ni Jehova kay Jose paagi sa damgo. “Bangon ka, dalha ang bata kag ang iya iloy,” siling sang anghel, “kag magkadto kamo sa Israel, kay ang mga nagahingabot sa kabuhi sang bata patay na.” (Mateo 2:20) Gani nagdesisyon si Jose nga magbalik na ang iya pamilya sa ila pungsod. Paagi sa sini, natuman ang isa pa ka tagna sa Biblia—tawgon ang Anak sang Dios halin sa Egipto.—Oseas 11:1.

Mahimo gid nga plano ni Jose nga mag-istar ang iya pamilya sa Judea, ayhan malapit sa banwa sang Betlehem nga ila ginaistaran antes sila malagyo sa Egipto. Pero nabal-an niya nga ang malain nga anak ni Herodes nga si Arquelao amo ang hari sang Judea. Sa isa pa ka damgo, ginpaandaman sang Dios si Jose sa katalagman. Gani naglakbay si Jose kag ang iya pamilya pa aminhan kag nag-istar sa siudad sang Nazaret sa teritoryo sang Galilea, nga malayo sa sentro sang relihion sang mga Judiyo. Diri nagdaku si Jesus, nga nagtuman sa isa pa ka tagna: “Tawgon sia nga Nazaretnon.”—Mateo 2:23.

Magtuon sing Dugang Pa

Mga Pamangkot Gikan sa mga Bumalasa—Disiembre 2014

Ano ang buot silingon ni Jeremias sang ginsambit niya ang paghilibion ni Raquel tungod sa iya mga anak?

Ginproteksionan ni Jose, Gin-amanan, kag Padayon nga Gin-atipan ang Iya Pamilya

Paano ginproteksionan ni Jose ang iya pamilya? Ngaa gindala niya sanday Maria kag Jesus sa Egipto?