Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 3

Natawo ang Magahanda sang Dalan

Natawo ang Magahanda sang Dalan

LUCAS 1:57-79

  • NATAWO KAG GINHINGALANAN SI JUAN NGA MANUGBAWTISMO

  • GINTAGNA NI ZACARIAS ANG PAGAHIMUON NI JUAN

Manugbata na si Elisabet. Tatlo ka bulan nga nagtener sa ila si Maria nga iya paryente. Dapat na magpaalam si Maria kag magpauli sa Nazaret. Malayo ang iya lakbayon pa aminhan. Mga anom na lang ka bulan, sia naman ang mabata.

Wala madugay paghalin ni Maria, nagbata si Elisabet. Matawhay man ang pagbata niya kag maayo ang panglawas nila sang iya lapsag! Sang ginpakita ni Elisabet ang iya lapsag sa iya mga kaingod kag paryente, nalipay man sila.

Suno sa Kasuguan sang Dios sa Israel, dapat tulion ang lapsag sa iya ikawalo nga adlaw, kag hatagan man sing ngalan. (Levitico 12:2, 3) Gusto sang iban nga ang ngalan sang bata pareho sa iya amay nga si Zacarias. Pero nagsiling si Elisabet: “Indi! Tawgon sia nga Juan.” (Lucas 1:60) Dumduma nga nagsiling si anghel Gabriel nga dapat ang ngalan sining lapsag amo si Juan.

Wala magpasugot ang iya mga kaingod kag mga paryente: “Wala gid ikaw sing paryente nga may amo sina nga ngalan.” (Lucas 1:61) Ginsenyasan nila si Zacarias kon ano ang gusto niya nga ngalan. Nangayo sia sing tapitapi nga kahoy kag nagsulat: “Tawgon sia nga Juan.”—Lucas 1:63.

Bangod sini, milagruso nga nakahambal liwat si Zacarias. Madumduman naton nga indi na sia makahambal bangod wala sia magpati sa ginsiling sang anghel nga magabusong si Elisabet. Gani sang makahambal na si Zacarias, natingala ang iya mga kaingod kag namangkot sila: “Mangin ano gid ayhan ini nga bata?” (Lucas 1:66) Nahangpan nila nga ang Dios amo ang naghatag sang ngalan ni Juan.

Paagi sa balaan nga espiritu, si Zacarias nagsiling: “Dayawon si Jehova, nga Dios sang Israel, bangod gintalupangod niya ang iya katawhan kag ginluwas sila. Kag nagbangon sia sing sungay sang kaluwasan para sa aton sa panimalay ni David nga iya alagad.” (Lucas 1:68, 69) Ang ginapatuhuyan niya nga “sungay sang kaluwasan” amo si Ginuong Jesus, nga matawo pa. Paagi sa sining Isa, siling ni Zacarias, ‘pagkatapos nga luwason kita sang Dios sa aton mga kaaway, hatagan niya kita sing pribilehiyo sa paghimo sing sagrado nga pag-alagad sa iya nga wala sing kahadlok, agod mangin mainunungon kag matarong kita sa bug-os naton nga kabuhi.’—Lucas 1:74, 75.

Parte sa iya anak, si Zacarias nagtagna: “Apang ikaw, anak ko, tawgon ka nga manalagna sang Labing Mataas, kay magauna ka kay Jehova sa paghanda sang iya mga dalan, sa paghatag sing ihibalo sa iya katawhan agod maluwas sila paagi sa pagpatawad sa ila mga sala, bangod sa mapinalanggaon nga kaluoy sang aton Dios. Bangod sini nga kaluoy, makakita kita sang kapawa halin sa kahitaasan nga nagasilak kaangay sang pamanagbanag, sa paghatag sing kapawa sa mga nagapungko sa kadulom kag sa landong sang kamatayon. Ina nga kapawa magapakita sa aton kon ano ang aton himuon agod matigayon ang paghidait.” (Lucas 1:76-79) Makapalig-on gid ini nga tagna!

Sini nga tion, nakaabot na si Maria, nga wala pa sing bana, sa iya balay sa Nazaret. Ano ang matabo sa iya kon mahibaluan nga nagabusong gali sia?