Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 5

Diin kag San-o Natawo si Jesus?

Diin kag San-o Natawo si Jesus?

LUCAS 2:1-20

  • NATAWO SI JESUS SA BETLEHEM

  • GINDUAW SANG MGA MANUGBANTAY ANG LAPSAG NGA SI JESUS

Si Cesar Agosto, ang emperador sang Emperyo sang Roma, nagmando nga kinahanglan magparehistro ang tanan. Gani kinahanglan maglakbay sanday Jose kag Maria pakadto sa natawhan nga siudad ni Jose nga amo ang Betlehem, sa bagatnan sang Jerusalem.

Madamo ang tawo sa Betlehem para magparehistro. Gani ang bakante lang nga lugar para kanday Jose kag Maria amo ang toril, diin ginatipon ang mga asno kag iban nga sapat. Didto natawo si Jesus. Ginputos sia ni Maria sing mga lampin kag ginpahigda sa pasungan, diin ginapakaon ang mga sapat.

Mahimo gid nga ginpahanabo sang Dios nga magmando si Cesar Agosto sang pagparehistro. Ngaa? Agod mabun-ag si Jesus sa Betlehem, sa lugar sang iya katigulangan nga si Hari David. Madugay na nga gintagna sang Kasulatan nga sa sini nga siudad ibun-ag ang ginpromisa nga Manuggahom.—Miqueas 5:2.

Importante gid ini nga gab-i! Nagsanag ang palibot sang grupo sang mga manugbantay sang karnero nga ara sa latagon. Himaya ini ni Jehova! Ang isa sa mga anghel sang Dios nagsiling sa mga manugbantay: “Indi kamo magkahadlok, kay ginapahayag ko sa inyo ang maayong balita nga magahatag sing daku nga kalipay sa tanan nga tawo. Kay karon nga adlaw sa siudad ni David, natawo ang isa nga magaluwas sa inyo, nga amo ang Cristo nga Ginuo. Kag amo ini ang tanda nga makilala ninyo sia: Makita ninyo ang lapsag nga naputos sing mga lampin kag nagahigda sa pasungan.” Kag hinali lang nga nagpakita ang madamo pa nga anghel kag nagsiling: “Dayawon ang Dios sa langit, kag sa duta may paghidait ang mga tawo nga nahamut-an sang Dios.”—Lucas 2:10-14.

Sang naghalin ang mga anghel, naghagaray ang mga manugbantay: “Makadto kita subong sa Betlehem kag tan-awon naton ang nahanabo didto suno sa ginpahayag ni Jehova sa aton.” (Lucas 2:15) Nagdalidali sila kag nakita nila ang lapsag nga si Jesus sa lugar nga ginsiling sa ila sang anghel. Sang ginsugid sang mga manugbantay ang ginsiling sa ila sang anghel, nahayanghag gid ang tanan nga nakabati. Ginpabaloran gid ini ni Maria kag ginbinagbinag niya sing maayo ang kahulugan sini.

Sa karon, madamo ang nagapati nga natawo si Jesus sang Disiembre 25. Pero sa Betlehem, tingulan kag tigtulugnaw kon Disiembre. Kon kaisa naganiebe pa gani. Gani, imposible nga ara sa latagon ang mga manugbantay kag ang ila mga panong sa bilog nga gab-i. Indi man nagakaigo nga ipatuman sang Romano nga emperador sa mga tawo, nga nagaplano nga magrebelde sa iya, nga maglakbay sing inadlaw sa tion sang tigtulugnaw para magparehistro. Mahimo gid nga sa Oktubre natawo si Jesus.

Magtuon sing Dugang Pa

‘Ginbinagbinag ni Maria ang Kahulugan Sini sa Iya Tagipusuon’

Ang mga eksperiensia ni Maria sa Betlehem nagpabakod sang iya pagtuo sa mga promisa ni Jehova.